٧\٢\٢٠١١

کێ سەربەخۆیی و ئاسایشی وڵات دەخاتە مەترسیی، میلله‌ت یان دەسەڵات؟

عوسمان مەلا   

هەر وەک هەمومان ئگادارین، لە سەرتاسەری گۆی زەوی و بەتایبەتی وڵاتانی عەربی و روژهەڵاتی ناوەراست شورشی چین و توێژە چەوساوەکان لە دژی چینە چەوسێنەرەکان و سیستەمی دژی ئینسانیی سەرماێەداری و دیکتاتورەکانی دەستی پێکردوە. برسیەتی و نەداری، بێدەرەتانی و بێ دەرمانی، بەرین بونەوەی بێکاری، بێ سەرپەنایی و نا ئومیدی، بەرز بونەوەی قیمەتی خوراک و کرێ خانو، بەرز بونەوەی قیمەتی کەل و پەل و پێویستیەکانی بەرێچون، چونە سەری کرێ سیارە و تەیارە و بەنزین و ئاو و کارەبا، وە لە لاێەکیترەوە تێر و تەسەل بونی دەسەڵاتداران و دەست و پێوەندەکانیان وەک وەزیرەکان، پارلەمانتاران، فەرمانەکانی پۆلیس و ئەرتەش و بەرپرسانی دیکەی حکومی دبینین کە سیما و ناوەرۆکی سیستەمی حاکمی سەرمایەداریی جیهانیی پێک هێناوە کە چیتر تاقەت و تەحەمولی بۆ بەشەری ئەمرۆ نەهێشتوەتەوە. چیتر کارامەییەکانی ئاڵا و سەربەخۆیی وڵات، پاراستنی هەویەی نەتوەیی و نیشتمان، رێز گرتن لە پیرۆزیەکان و بەڵینە رەنگامەکان کە پاساوگەری تا ئێستای دیکتاوران بوە و لە پشت ئەم ئامرازانەوە دەستیان بەسەر سامان و مال و موڵکی میلەتدا گرتوە اریگەیی خوێان لەدەست داوە و چیتر ناتوانن میلەتانی تورە و بیزار و چەوساوەی پێ فریو بدەن.

کرێکاران و هەژارن و ژنان کە موحتاجی نانی شەون و لەبەر خوشەویستی دەکوژرێن، بوێان دەرکەوتوە کە نە وڵاتیان هەێە و نە ئاڵاێان هەێە و نە هەویە. باش دەزانن کە ئەم شتانە کەلەبچە و تەوقی کویلەتی ئەوان، وە کۆشک و تەلار و بەهەشتی سەران و دەسەڵاتداران بون و هەن. کرێکاران و زەحمەتکێشانی بەش مەینەت ئێستا ئیتر تێگەیشتون کە کویلەن و بەم تێگەیشتنە بەشیک لە کویلەتی خۆێان لە لابردوە و راپەریون بۆ رزگار بونی یەکجاری و گۆی زەویان لە ژێر پیی ستمەگەرانی ساختەچی و چەوسێنەرانی دیکتاتوردا هێناوەتە لەرزە. ئێستا تێگەیشتون کە نە شا، نە سوڵتان، نە شێخ و نە ئاسمان رزگاری ناکا! بەلکو تەنیا خۆێانن و یەکگرتویی ریزەکانیانە کە بۆ هەمیشە کوتی کویلەتی دەپسێنن و ژیانی شایستەی ئینسانی بۆ خویان و هاوچینەکانیان و هەموان دابین و دەستبەر دەکن.

ئەم شەپۆلەی شورشی بەش مەینەتان کوردستانیشی گرتوەتەوە و کورسیەکانی سەرانی تا بینەقاقە گەندڵ و هەلپەرەست و سپڵەی لەرزاندوە. سەرانی حکومەتی کوردی پێشتر کە خۆێان لە پشتی تەعەسوبی ناوچەگەری و دینی، ستەمی نەتەوایەتی و دیکتاوری سەدام و دەولەتانی دەوروبەر حەشار دابو، پاش ٢٠ ساڵ دەسلات و تالان و خۆ دەوڵەمەند کردن، لە کردەوەدا سەلماندیان کە هیچ پیوەندیەکان بە بەرژەوەند و قازانج و خۆشبەختی میلەتی کوردەوە نیە. ئاڵا و نیشتمان و نەتەوە و دین هەر مەموی ئامرازی فریودانی میلەتە بوە و لەە پشت پەردەی ئەم شتانەوە بەرژەوەندی چیناێەتی و حیزبی و گوروپیی خۆێان پاراستوە. ئێسا کە هەستیان بە زەنگی مەترسی و هوشیار بونەوەی میلەت کردوە، دیسانەکە کەوتونەتە کای کون بە با کردن. وە بە هێنانە گۆری پاراستنی ئەزمونی گەڵ و ولات و هێمناێەتی، بە هەرەشەی دەستێوەردانی دەرەکی و لە باربردنی بارودۆخی ولات، دەێانەوێ خەڵکی چاوکراوەی کوردستانی پێ فریو بدەنەوە.

یەکێک لە ریاکاری و چەواشەکاریەکانی رژیمە گەندەڵ و دیکتاتورەکان ئەوەێە کە دو مەسەلەی گرنگ واتە پاراستنی سەربەستیی ولات و ئازادی بە دژی یەکتر لە قەلەم دەدەن. بە بیانوی درۆێنەی زەرەورەتی پاراستنی ئاسایشی نەتەوەیی، ئازادی لە میلەت زەوت دەکەن و گەندەڵی و تالانکاریەکانی خۆیانی پێ پاساو دەکەن. دەسەڵاتدارنی گەندەل و دیکتاتۆر بە شیوەێەک پێناسەی نارەزاێەتیەکانی میلەت دەکەن کە، وەک بڵیی خواستی ئازادی و مافە سەرەکیەکانی خەڵک، لەگەڵ پاراستنی ئەمنیەت و ئارامیی وڵاتدا ناتەبا و دژ بە یەکن. بەم سیاسەتە ریاکارانەێە و بە بیانوی پاراستنی دەتکەوتەکانی نەتەوە و وڵات، ئازادێە دێموکراتیکەکان لە میلەت وەر دەگرنەوە و سەرکوتی دەکەن.

بێگومان دابین بون و پاراستنی ئەمنیەت و ئارامی، سەربەستی و بریاردان، قازانجی نەتەوەیی و بابەتەکانی دیکەی وەک ئەمانە ماف و بەرژەوەندی میلەتن. ئەرکی پاراستنی ئەم مافانە ئەرکێکە کە لە لاێەن میلەتەوە دەسپێردریت بە دەسەڵاتی هەڵبژیردراوی میلەت. لێرەدا دەسەلات دەبێ خزمەتکاری میلەت بیت نەک حوکمران. دەسەلاتی هەڵبژیردراو بۆی نیە لە بەرێوە بردنی ئەرکی پێ سپێردراودا، خوی بە خاوەن ماف، یانی میلەت دابن و بە بیانوی ئەنجامدانی ئەم ئەرکە، میلەت لە مافەکانی خۆی بێ بەش بکا. ئەوە دەسەڵاتە نانخۆری میلەت، نەک میلەت نانخۆری دەسەلات. بەڵام لە دەسەلاتە گەندەل و پۆخڵەکاندا، ئەم مەسەلەیە پێجەوانە دەبێتەوە و میلەت دەکرێتە نانخۆری دەسەلات. دەسەلاتی یاخی و گەندەڵ نانی میلەت دەبری و پاواانی دەکا بۆ خۆی. دواتر ئەگەر میلەت داوای مافەکانی دەکا، دەسەلات پێی دەڵێ تێکدەر و گێرە شیوین و ئاژاوەچی، وە بەم بیانوانە میلەت زیندان و سەرکوت و دەمکوت دەکا.

ئەو دەسەلاتەی کە لە لایەن خەڵکەوە هەڵدەبژێردری، حوکمی خۆی لە میلەت وەر دەگرێ و لە راستیدا خاوەنی هێج جۆرە ماف و دەسەلاتیک نیە. دەسەلات نوێنەری میلەتە و دەبێ بەریوەبری ئیرادەی میلەت بێ. هیچ دەوڵەت و دەسەڵاتێک حەقی نیە و نابێ و ناتوانێ تەکلیف بۆ میلەت دیاری بکا. دەسەلات لە لاێەن میلەتەوە هەڵدەبژێردری بۆ بەریوە بردنی بریاری میلەت، نەک بۆ بریاردان بەسەر میلەتدا.

هەر ئێستا لە کوردستان و هەموی ولاتانی دیکەی ژێر حاکمیەتی سیستەمی سەرماێەداری و پارلەمانیدا، حکومەت و میلەت دوژمنی یەکتر و لە بەرەی دژ بە یەکدا شەریکی چارەنو سازیان دەست پێکردوە. لە کوردستانی عیراق دەسەڵاتی کوردی خوی ناوەتە جێی میلەت و بە ناوی میلەتەوە بەردەوام بە ترساندن و سەرکوتی میلەت، خەریکی تاڵانکردنی ملک و مالی میلەتە و بە بیانوی رێگرتن لە هەڵوەشانی ئاسایش و ئەمنیەت و هەرێمی سەربەخۆی کوردستان میلەت بە خائێن بە خۆی لە قەلەم دەدا. هێزی چەکداری پولیس و ئەرتەش و پێشمەرگە لە ئامادەباشی بەردەوامدان بۆ سەرکوت کردنی مافخوازیە زەوتکراوەکانی میلەت لە لاێەن دەسەلاتەوە. ئەم هێزانە کە لەسەر سامانی میلەت بەخێو دەکرین و دبێ پاڵپشتی میلەت بن و دیفاع لە مافەکانی میلەت بکەن، بەردەوام ئامادە کراون بۆ سەرکوت کردنی نارەزایەتیەکانی میلەت دژ بە گەندەڵی و پێشێلکاریەکانی دەسەلات. بۆ نمونە هەر لە وڵاتی میسر کاتێک جەماوەری میلیونیی میلەت دژ بە دەسەلاتی گەندەڵ و نامۆ بە میلەت رژانە شەقامەکان، سپا و پۆلیس کەوتنە سەرکوت کردن، وە سەروک کومار بێ شەرمانە وتی کە ئەم نا ئارامیانە خەێانەتە بە میلەت و دوژمنانی ولات و میلەت رێکیان خستوە. هەروەها موبارەک وتی کە لە دەسەلات ماندو بوە و ئەگەر دەستی لێ هەڵبگری دەترسێ کە وڵات توشی هەرجومەرج و بشێوی بێت. ئەمە قسەی سەرانی کوردستان و هەمو دیکتاتورەکان بوە تا بە ئێستا.

بەڵام بە پێچەوانەی ئەم راگەێاندنانەی دەسەڵاتداران، ئەوە حکومەتە گەندەڵەکانن کە بە خەێانەت کردن بە متمانەی میلەت هوکاری هەڵوەشان و تێکچونی ئاسایش و ئەمنیەت و سەربەخویی ولاتن نەک میلەت. کاتێک حکومەت بە بیانوی دەستکردی خۆی دەکەوێتە هەوڵی رێگرتن لە ئازادیە دێموکراتیکەکانی خەڵک و سەرکوتیان دەکا، کاتێک ئیرادەی میلەت بۆ دابین بونی عەدالەت پێشێل دەکا، راست ئەو مانا دەدا کە میلەت هەر هەموی وڵات فرۆش و خائێن بە خۆێان و وڵاتی خۆێانن و ئەگەر ئەم میلەتە سەرکوت نەکرێ و رێی لی نەگیرێ، ئەگەر کونتروڵ نەکرێ و پێشی پێ بەگیرێ ئەوا ئەزمون و سەربەخۆیی وڵات لە ناو دەبەن. بەم شیوەێە دەسەڵات کە مەرجەعیەتی خوی لە میلەت وەر گرتوە، میلەت بە خائێن دادنێ و خۆی بە دڵسۆز، خوی لە جێی میلەت دادەنێ و میلەی بە بێگانە پەرەست و تێکدەر لەقەڵەم دەدا.

حکومەتە کە میلەت هەڵیبژاردوە و ئەرکی خزمەت کردنی وڵات و میلەتی پێ سپاردوە، پاش وەرگرتنی متمانەی میلەت و بەدەستەوە گرتنی دەسەلات، ئیتر هەلپەرەستانە ئاگاهانە لەبیری خۆێانی دەبەنەوە کە بەرژەوەند و قازانج و سەربەخویی نەتەوە و وڵات ماف و ملکی میلەتە، لە بیری خۆێانی دەبەن کە حکومەت تەنیا بە متمانەی ئەوەیکە لە لااێان میلەتەوە نوێنەراێەتی پاراستنی سەربەخویی ولات و ئاسایشی نەتەوەیی پێ سپێردراوە. بە پێجەوانەوە خویان دەسەپینن و دەست بەسەر ملک و ماڵی میلەتدا دەگرن.

بە پێچەوانەی رایکاریەکانی حکومەتە خائێن و دیکتاتورەکان، ئازادی میلەت و سەربەخویی وڵات نەک هەر دژ بە یەک نین، بەڵکە تەواوکەری یەکترن و پێکەوە پەیوەندیی ریشەییان هەێە. ئازادی چەمکیکە کە لە پێوەندیی نێوان سیستەمی دەسەلاتی سیاسی و تاکی کومەڵگادا مانا دەدا. نەبونی ئازادی کە زەمانەتی ئاسایشی وڵات دەکا، بەستراوەتەوە بە ناوەرۆکی سیاسیی حکومەتەوە. لە حکومەتێکی گەندەڵ و دیکتاتوریدا کاتێک کە تاکەکانی نەتەوە راستەوخۆ لە پێوەندیەکانی دەرەوەی حکەموتدا بەشدار نین، وە ئاگاداری کاروباری حکومەت نین، وە حکومەت بە ناوی میلەتەوە بە نهێنی و شاراوە لەگەڵ دەوڵەتانی دەرەکیدا پێوەندی پێک دێنی، بێگومان سەربەخۆیی وڵات ئیتر بێ ماناێە و تەنیا ئامرازێکە بو سات و سەودا بەدەست دەسەڵاتەوە.

ئازادی و سەربەخویی وڵات رەنگدەرەوەی کارکرد و سیاستە چیناێەتیەکانی سیستەمی حاکمە لەو وڵاتەدا. سیاسەت و کردەوەکانی ناوخوی حکومەت، یانی شێوازی هەڵس و کەوتی دەسەڵات لەگەڵ میلەت، دیاریکەری ئاست و سنوری ئازادی و دێموکراسیە. سیاسەتی ناوخوی حکومەت راستەوخۆ کاریگەریی لەسەر سیاسەت و هەڵسورانی دەرەوەی حکومەت لەگەڵ دەولەتانی دیکە و شیوازی پەیونندەیەکانی دەرەوە دادەنێ. ئەگەر سیاسەتەکان و رەفتاری حکومەت لە ناوخودا دژی خەلکی و نا دێموکراتی بێ، بێگومان سیاسەتی دەرەوەشی دژی قازانج و بەرژەوەندەکانی ولات و میلەتە.

حکومەتە سەرەرۆ و دژی خەڵکیەکان کە لە سیاسەتی ناوخۆی وڵاتدا خەڵک سەرکوت دەکەن، لە سیاستەی دەروەشدا بە پێچەوانەی قازانجی میلەت و بەرژەوەندە نەتەوەییەکان کار دەکەن. مانای سەربەخۆیی وڵات بێجە لە حاکمیەتی ئیرادەی میلەت و قازانجی نەتەوەیی هیچیتر نیە. لە ئاکامی سەرەرۆیی و گەندەڵیی حکومەتی دژی خەڵکیدا گرفت تەنیا ئەوە نیە کە کردەوەی دەرەوەیی حکومەت لە بواری قازانجی نەتەوەیی و میلەتدا ناتەبا و زیانبارە، بەڵکە بە هوی نەبونی ئازادی و دێموکراسی لە ناوخۆدا، ئیرادەی میلەت بەتەواوی پێشێل دەکرێ و مەجاڵەکانی گەشە کردنی وڵات لە ناو دەچێ و زەمینەکانی گەشە و کاردانەوە لەباری سیاسەتی دەرەوە بە تەواوی لەبار دەچێ. لە حکومەتە سەرەروەکاندا بریارە گرنگ و هەستیارەکان لە سیاسەتی دەرەوشدا لە پشتی درەگا داخراوەکان و ناوەندەکانی سەربازی و دەزگاکانی زانیاری و بە بێ ئاگاداری و چاوەدیری میلەت دیاری دەکرێ و بەرێوە دەچێ. میلەت کاتێک ئاگادار دەبێ کە گەندەڵیەکان ئاشکرا دەبن و بەرپرسان لە ناوەوە و دەروەی ولات توشی رسوایی بون. بەمشیوەێە نا ئارامی پەیدا دەبێ و حکومەت متمانەی خوی لای میلەت لە دەست دەدا و نارەزاێەتیە جەماوەریەکان سەر هەڵدەدەن و میلەت بەرەوروی حکومەت دەبێتەوە.

حکومەتە گەندەڵ و ستەمگەرەکان هەمیشە لە فیدا کردن و پێشێل کردنی مافی میلەت، وە سات و سەودا کردن بەسەر میلەتەوە لە پێناوی بەرژەوەندی چیناێەتی و گوروپی خۆێاندا سڵ لە هیچ خەێانەت و کردەوەێەکی ناشایست و تەنانت کوشتاری میلەتیش ناکەنەوە. بە مەبەستی پتەو کردنی دەسڵاتی دژی خڵکی و بەرژەوەندی خۆێان دەکەونە مامەڵە کردن بەسەر ملک و مالی میلەتەوە لەگەڵ هێز و دەوڵەتە ستەمگەرەکانی دیکە. بە یارمەتی و هاوکاریی هەمەلاێەنەی هیزە دەرەکیەکان دەکەونە داپڵۆسین و سەرکوتی میلەت.

حکومەتی کوردستانی عیراق کە بە هۆی سروشت و ناوەرۆکی دژی دێموکراتی و دژی خەڵکیی خۆێەوە لە ناوەوەی وڵات متمانە و پێگە و پێستیوانی میلەتی لە دەست داوە، کەوتوەتە هەرزان فرۆش کردنی سەربەخۆیی و ملک و سامان و بەرژەوەندەکانی کوردستان. لە دەرەوی سنورەکانی کوردستان بۆ پێدا کردنی پشتگری و پشتیوانی، دەستی کردوە بە بەخشینی ئەو سەروەت و سامانە کە لە میلەتی زەوت کردوە. بەردەوام وەک باج و حەقی بێدەنگی دەیبەخشن بە هێز کونەپەرەستە ئیسلامیەکان و حکومەتە فاشیەکانی دەوروبەر. هەر ئێستا تەواوی ئەم خاڵانە کە تا ئێرە ئاماژەمان پێکرد، لە سیاسەتی ناوەوە و دەروەی حکومەتی هەرێمی کوردستاندا بە ئاشکرا خوی دەنوێنی. گەندەڵیەکی هەمە لاێەنە سەرتاپای کوردستانی گرتوەتە بەر. میلەت بێزار و تورەێە و هەر کات ئەگەری راپەرین هەێە. حکومەتیش بۆ پاراستنی خوی، نەک هەر ئامادە نیە وڵامی داخوازەکانی میلەت بداتەوە، بە پێی ناوەرۆکی دیکتاورانە و کونەپەرەستانەی خوی کەوتوەتە پیلان گیران بۆ دروست کردنی شەری ناوخۆ، تا بەم شیوەێە درێژە بە دەسەڵاتی رسواێان بدەن.

گەورەترین هەرەشە و مەترسی بۆ سەر سەربەخویی وڵات و ئاسایشی نەتەوەیی، نەبونی ئازادی و دێموکراسیە لە ناوخۆی وڵاتدا. نا امید بونی میلەت لە حکومەتی سەرەرۆ و گەندەل، هەست و رۆحی شکست خوازی و بێزار بون لەواندا پێک دێنی و زەمینەی پێشوازی و ملدان بە هاتن و دەستێوەردان و تەداخول و سوڵتەی هێز و داگیرکەرە بیگانەکان دەرەخسێنی. تازەترین نمونەی ئەم راستیە، پێشوازی و خۆشحاڵ بونی خەڵکی عێراق و کوردستانی عێراق بو بە هاتنی هێزەکانی ئەمریکا و هاوپەیمانەکانی بۆ عیراق. ئەمە داگیرکاریەی عیراق کە بو بە هۆی لە دەست چونی سەربەخویی و دارمانی هەمەلایەنەی کومەڵگای عیراق و کوشتاری زیاتر لە یەک میلیون عێراقی، ئاکامی سەرەرویی و دیکتاتوریەت و گەندەڵیی حکومەتی عێراق بو بە سەروکاێەتی سەدام حوسەین. هەروەها لە زۆر وڵاتی دیکەش ئەم حاڵەتانە روی داوە کە لەم بابەتەدا مەجالی ئەوەمان نیە باسی بکەین.

لە هێچ قوناغێکی مێژودا شتی وا روی نەداوە کە مێلەتێک لە دژی حکومەتی دێموکراتی و خزمەتکار و دڵسۆزی خۆی راپەرێ. لە حکومەتێکی خەڵکی و دێموکراتیکدا کە بەرێوەبەری ئێرادەی میلەتە و پارێزەری ئازادی و مافەکانی میلەت بێ، وە ژیانی ئازاد و عادیلانەی بۆ هەموان دابین بکا و سیاسەتەکانی لە ئاراستەی دستەبەر کردنی مافەکانی خەڵک و قازانج و بەرژەوەندی میلەت بە گشتی و پاراستنی سەربەخویی وڵات سەرچاوەی گرتبێ بە دڵنیاییەوە سیاسەتی دەرەوەشی راست هەڵقوڵاوی هەمان قازانجی میلەت و لە ژێر چاوەدێریی رۆژانەی میلەت و بە ئاگاداری میلەت و بە بریاری میلەت دەباتە پێش.

بۆ پاراستنی سەربەخویی وڵات و دابین بونی ئاسایشی نەتەوەی و کومەڵگا، باشترین گرانتی و زەمانەت تەنیا دێموکراسی و ئازادیە دێموکراتیەکان و دابین بونی پێداویستیەکانی ژیان و بەرێجونی میلەتە. حکومەتێک کە لە ناوخۆدا سەرکوتگەر و دژی ئازادییە، بێ ئەملا و ئەلا لە بواری دەرەوەشدا توانای پارستنی سەبەخویی و بەرژەوەندی وڵاتی نابێ. ئەو شانۆگەریەی کە رژیمە دژی خەڵکی و دیکتاورەکان لە بابەت سەرکەوتنەکانی خۆێان لە بواری سیاسەتی دەرەوەدا نمایشی دەکەن و لە دەزگاکانی راگەێاندنەکانیەوە بلاوی دەکەنەوە، درۆ و ریاکاریەکی پوچ و دور لە راستیە. ئەمە هوڵدانێکە بۆ داپۆشینی ئەو دزی و گەندەڵیانەێە کە لە سامانی میلەت دزیویانە و وک باج دەیبەخشن بە بێگانەکان بۆ ئەوەی پشتیان بگرن.

حکومەتە دژی ئازادی و نا دێموکراتیەکان بە حوکمی سروشت و ناوەرۆکی دژی ئینسانیی خۆێان بەردەوام بە ئاراستەی سات وسەودا بەسەر وڵات و میلتی خۆێانەوە دەچنە پێش. کاتێک کە خەم و سیاسەت و پەروشی ئەم حکومەتانە قازانج و بەرژەوەندی وڵات و میلەت نیە، دیارە بە دڵنیاییەوە بۆ مانەوەێان و بەردەوام بونیان لەسەر دەسەلات و پاراستنی بەرژەوەندی چیناێەتی و گوروپیی خۆێان، وڵات و سامانی میلەت و خودی میلەتیش دەکەنە فیدای خۆێان.

کومەڵانی خەڵکی ستەمدیتوی کوردستان چیتر نابێ بە ریاکاریەکانی حکومەتی هەرێم فریو بخۆن. ئیتر ئامراز و کەرەسە کۆنەکانی وەک هەرەشەی دەوروبەر و ساوا بونی ئەزمەنەکەمان و بەڵێنە درۆینەکانی دەسەلات سواون و ئێکسپاێر بون. بون و نەبونی ئەو حکومەتە گەندەلە هیچ لە ژیان و چارەنوسی میلەت ناگورێ و بە پێچەوانەوە نەبونی دەتوانێ پەنجەرەێەکی رون بەروی داهاتوی میلەتی کوردا بکاتوە. نەبونی دەتوانێ رێخۆشکەری داهاتوێەکی گەش بێ بۆ یەکخستنی ریزەکانی میلەت و بۆ ئاوەدانی و ئازادی. لە هەمان کاتدا دەبێ وریایی و هوشیارمان بپارێزین و رێگا نەدری کەسانێک و ئەحزابێک کە کارنامەێان هەێە و ئیمتحانی خۆێان داوە، بە ریاکاری و یان نیشان دانی رواڵەتێکی خڵکی و دێموکرات بون جێگای ئەم دەسەڵاتدارانە بگرنەوە و سیتەمی سیاسی و دامودەزگاکانی داپلۆسینەر دەستیان لێ دەری. دەبێ بەرنامەی رون و دارێژراوی زانستی و ئینسانی کە رەنگدەرەوەی ماف و داخوازیەکانی کومەلانی خەڵکی کوردستان بەدیلی دەسەڵات بێ. تەنیا زامنی ماف و ئازادیەکانی خەڵکی کوردستان، سیستەمی شوراییە.

rashkaw@hotmail.com