کێشەی سەرەکی
ئێستای نێوان بەغداو هەولێر،
دیالەو قەرەتەپەو
کەرکوک و خانەقین، نییە.
عهبدوڵا مەحمود
تەنگژەو ئاڵۆسکاویەکانی نێوان بەغداو هەولێر درێژەی هەیە، پێشبینی
دەکرێت ئەگەر هێوربونەوەیەکیش بەخۆیەوە ببینێ هاوکات هەڵگری کێشەو
تەنگژەوئالۆسکاوی تربێت، گرفتە بناغەیەکە چییە؟ بۆ بەم شوێنە گەیشت؟ چی
ڕوویدا هاپەیمانەکانی یەکتر ببنە ڕەقیبی یەکتر؟ سەرۆک کۆمار کوردە،
وەزیری خاریجی کوردە، سەرۆکی سوپای عێراق کوردە؟ .... کەچی کێشەو
تەنگژە لەدژی خۆیان و برەو پەیدا ئەکات.
وەڵامدانەوە بەم پرسە سەرەکیانەو خستنەڕووی لۆژیکی ڕووداوەکان و ڕیشەی
ڕووداوەکان، دەتوانێ کۆمەک بکات بە ڕۆشنبوونەوەی زۆر مەسەلەی بناغەیی
تر کە تا ئێستا ماسمیدیاو بەرپرسە حزبی و حکومیەکانی عێراق و کوردستان،
و تەنانەت میدیای بەناو سەربەخۆو غەیرە حزبی و دوور لەدەستی دەسەڵاتیش
خۆیانی لێنادەن.
کەرکوک و دیالەو قەرەتەپە، جەلاولاو جەبارەو... کێشەی بودجە، کێشەی
سنور، کێشەی پێشمەرگە، کێشەی فیدرالی، کێشەی ...... ئەمانە ئێستا
سەردێری گرفتەکانن، هەندێکیان ئێستا لە ئارادان و هەندێکی تریان
سەرەیان نەهاتووە، هەندێکیان قەدیمین و هەندێکیان تازەن.
بێگومان ناوچە سنوریەکان، ناوچە دابراوەکان و جێگا مشتومرەکان، ئەو
شوێنانەی لە باری میژوویەوە کێشەیان لەسەر هەیە، کەرکوک، دیالە،
قەرەتەپە، خانەقین، جەلەولا، زۆرشوێنی تری وەکو شەنگار، مەندەلی ...
ڕاستە ئەمانە هەموو جێگای مشتومڕو کێشەن. هاوکات زۆر کێشەی تر وەکو
بودجەو پێشمەرگە، سنور، خودی فدرالی، داهاتی سامانە سروشتییەکان،
پەیوەندی حکومەتی هەرێم و بەغدا، ئەمان هەمویان کێشەی واقعین، بەڵام
هیچ کام لەوانە گرفتی بناغەیی نین، مەبنای کێشەی سەرەکی نێوان هەولێرو
بەغدا نین، بەڵکە ئەمانە ئاکام و دەرئەنجامی گرفتێکی ڕیشەیی ترو
بناغەیترن.
کێشەی سەرەکی کە ئێستا لە ئارادایە، کێشەو بەیەکدادانی دوو بزوتنەوەی
سیاسی یە. کێشەی نێوان ناسیونالیزمی عەرەب " بەسونی و شیعە" وە، لەگەڵ
بزوتنەوەی ناسیونالیستی کوردە. لە چوارچێوەی بەیەکدادان و کێشمەکێشی
ئەم دوو بزوتنەوەیەدا، ئەم گرفتانە هاتونەتە ئاراوە و دروستبوون.
هەمیشە دیالەو قەرەتەپە، کەرکوک و خانەقین، کێشەی کۆمەڵگای عێراق
نەبوون، ئەم کێشانە دەرهاویشتەی شەڕ و پێکدادانی توندوتیژی ئەم دوو
بزوتنەوەیە بوون لە مێژوویەکی دورودریژدا کە ڕیشەکەی دەگەرێتەوە بۆ
پێکهاتنی دەوڵەتی عێراق لەسەربنەمای قەومیەتی عەرەبی. ئەم مەبنایە مۆی
هەڵاواردنی دا لە ناوچەوانی خەڵکی عێراق. مێژووی بەیەکدادانی ئەم دوو
بزوتنەوەیە لەدرێژەی خۆیدا سیاسەتی پاکتاوتەکردنی لەلایەن بەعسەوە کردە
حالەتێکی نەخوازراو زوڵمی قەومی لەسەرخەلکی کوردستان کردە واقعیەتێک و
پاشانیش دڕندەیی ڕژێمی بەعس کێشەی زوڵم و بێمافی خەلکی کوردستانی
توندکردەوەو لەسەر ئەم بنەمایەش بزوتنەوەی ناسیونالیستی قەومی کورد،
پێی گرتووەو ئەم مەسەلەیەی لە پیناو ئامانجەکانی خۆیدا بەدەستەوە
گرتووە.
بەدوای ڕوخانی ڕژێمی بەعسدا، ئەم دوو بزوتنەوەیە بزوتنەوەی
ناسیونالیستی عەرەبی لەگەڵ بزوتنەوەی ناسیونالیستی کورد، جێگاو ڕێگایان
گۆڕا. بزوتنەوەی ناسیونالیستی کورد لە بۆشایی و شکستی بزوتنەوەی
ناسیونالیستی عەرەبیدا کە لەدەسەڵاتخرا، وە بەمەوقعیەتێکی سیاسی کە
لەئاکامی جەنگی یەکەمی کەنداو لە کوردستان بۆی پێکهاتبوو وەدەسەڵاتی
پێبرابوو، ئەم مەوقعیەتە وای کرد کە ڕەوت و لایەنە سیاسیەکانی عێراق،
بزوتنەوەی ناسیونالیستی و دینی شیعەو بزوتنەوەی ناسیونالیستی عەرەبی
سونە، لە هەلومەرجی دوای کەوتنی بەعسدا، ئاشتبونەوەیەکی کاتی قبوڵ بکەن
لەگەڵ ناسیونالیزمی کوردو ئاگربەسێکیان لە ژێرناوی هاوپەیمانیەتیدا،
ڕاگەیاند.
ئێستا ئەم ئاشتبونەوەو لەڕاستیدا ئاگربەستە، توشی کێشەهاتووە، قڵشتی
تێکەوتووە، هۆکارەکەیشی ئەوەیە کە ئەمریکا لە پرۆسە پێکهێنانەوەی
حکومەتی عێراقدا ناکام ماوەتەوەو بەو مانایەش پرۆسەی فیدارلیزەکردنی
عێراق توشی بنبەست بووە.
تێکچونی ئەم هاوکێشانەو تێکچوونی باڵانسی هێزەکان لە عێراقدا، بۆتە
مایەی سەرهەڵدانەوەی کێشە قەدیمەییەکان، ئەو کێشانەی لە بنەرەتدا
میراتی، دەسەڵاتی بزوتنەوەی ناسیونالیستی بەعس و بزوتنەوەی
ناسیونالیستی کورد بووەو ئەوان لە چواچێوەی کێشمەکێشی خۆیاندا
خوڵقاندویانە.
بەڵام خودی کێشمەکێشەکە، بۆ هێزەکانی ئێستا، کێشەی دیالەو قەرەتەپەو
کەرکوک و خانەقین، نییە. بەڵکە ئەمانە دەروازەیەکن بۆ کێشمەکێشێکی
فراوانتر. کێشەی بزوتنەوەی ناسیونالیزمی عەرەبە بە دینی و سونییەوە
لەگەڵ بزوتنەوەی قەومی کورد کە ئێستا یەکێتی و پارتی هێزی سەرەکی ئەم
بزوتنەوەیەن.
بزوتنەوەی قەومی کورد خوازیاری بەشداربوونە لە دەسەڵاتی مەکەزیدا
بەمەبەستی درێژەدان بەدەسەڵاتی نزیک بەدوو دەهەی خۆیان لەکوردستان، و
بزوتنەوەی قەومی و دینی عەرەبیش لەژێرناوی یەکپارچەیی و عەزەمەت تەڵەبی
قەومی عەرەبی و ئیسلامیدا، خوازیاری گێڕانەوەی کوردستانە بۆ ژێرسایەی
دەسەڵاتی مەرکەزی. ئەمە مەبنای واقعی کێشمەکێشەکانی ئێستاو ئاینندەیە.
بەڵام پێچانەوەی ئەم فایلە، پێچانەوەی واقعیەتی دەسەڵاتدارێتی
بزوتنەوەی قەومی کوردو دەسەڵاتی یەکێتی و پارتی و کە نزیک بەدوو دەهەیە
لەکوردستان درێژەی هەیە، خەلق ساعە نییە. هەڵکوتانە سەر هەرێمی
کوردستان و گێرانەوەی کوردستان بە زۆری هێز بۆ ناوقەڵەمڕەوی دەسەڵاتی
مەرکەزیدا بەهەمان شێوە کارێکی سادەء ئاسان نییە. بۆیە بە ئاقاری
گێڕانەوەی کوردستان بۆ ناو قەڵەمڕەوی دەسەڵاتی مەرکەزیدا دەبێ لە
شوێنێکەوە دەست پێبکرێت، لەوچوارچێوەیەدا کێشەی کەرکوک و ناوچە جێناکۆک
و سنوریەکان دەکرێنە دەسپێکی ئەم کێشمەکێشە. بەهەرئەندازە دەسەڵاتی
مەرکەز بەهێزتر ببێت و پشتی ڕاستتر بکاتەوە، هێزی خۆی زیاتر نیشان
ئەدات و ممارەسەی دەسەڵاتدارتی خۆی لە عێراقدا دەکات.
بۆ بزوتنەوەی قەومی کوردیش بەدیاریکراوی بۆ یەکێتی و پارتی، کە لە
لایەکەوە ڕوبەڕووی ناڕەزایەتی جەماوەری خەڵکی کوردستانن، ء لە لایەکی
تریشەوە لە ماوەی کەوتنی بەعسەوە تائێستا نەیانتوانیووە زامنی
بەشداربوونی خۆیان لەدەسەڵاتی مەرکەزیدا زامن بکەن، بۆیە لاوازتر و
سازشکارانەتر ڕوبەڕووی ڕِوداوو تەنگژەکان دەبنەوە. تا هاتوشە جێگاو
ڕیگایان لە مەرکەزدا بەرەو لاوازی براوە.
دڵخۆشکردن بەوەی سەرۆک کۆمار کوردە، وەزیری خاریجی و کوردە، چەندین
کوسی پەرلەمانیان!! هەیە، ناتوانێ ئەم ڕاستییە بشارێتەوە کە
ناسیونالیزمی عەرەب بەپشتیوانی ئیقلیمی تەجروبەیەکی دورو درێژی
دەسەڵاتدارێتی و ڕەوتگەلە قەومی و شیعیەکان بەهاوپشتی ڕژێمی جمهوری
ئیسلامی، لە تواناو هێزی گەورەتر بەهرەمەندترن و لەوڵاتێکیشدا کە زۆری
هێز بریار بدات، بوونی پەرلەمان و پۆستی جۆراوجۆری حکومی و ئیداری بۆ
پێکهاتەکان جگە لە کارتۆن بوونی، تەنها دەتوانێ بە پشتیوانی هێز
مەوقعیەت و قەڵەمرەوی دەسەڵات و توانایی نفوزی خۆی دیاریبکات، نەک
بەدیبلۆماسیەت و کڕوزانەوە.
بزوتنەوەی ناسیونالیستی کورد بەپێی ماهیەتی خۆی، لەکاتێکدا لەناوخۆی
کوردستان نەیتوانیوە سیمایەکی دیموکراسی و ئازادیخوازی نیشانبدات و
نەیتوانیوە لە ئاست خواست و پێداویستیەکانی ژیان و گوزەرانی خەڵکیدا
بێت و نەیتوانیوە ڕێز لە پێکهاتە نەتەوەییەکانی وەکو عەرەب و تورک و
ئاشوری و کلدان بگرێت و لەکوردستان ... وای کردووە چ لەناوخۆیدا "سەرباری
بانگەشەکانی" متمانە لەدەست بدات، ڕوو بەڕای گشتی و ڕەسمی دنیای
دەرەوەش نەیتوانیووە پشتیوانیەکی زامنکراوی نێوەدەوڵەتی بە تەعوداتی
سیاسی یەوە، بەدەست بهێنێت.
ئەمە ئەو مۆتەکەیەیە کە یەخەی دەسەڵاتی کوردی و گشت بزوتنەوەی
ناسیونالیستی کوردی گرتووە. ئەوەی کە هێڵی شین لە لایەن
هاوپەیمانیەکانیەوە بۆ هێزەکانی پێشمەرگە دەدەنرێت، و ڕاوەدودەنرێن.
ئەوە کە وەزیری دەرەوە حسابێکی بۆناکرێت و ئەوە کە بەرپرسی سوپای
عێراقی کورد، جێی پرس پێکردنیش نییە. تا دەگات بەوەی مالکی لە پاڵ
دانانەوەی خەتە شینەکە" هێلی 36" کە هاوپەیمانەکان لەژێر ناوی پاراستنی
خەڵکی کوردستان لە دەسەڵاتی بەعس داینا، باسی ئەوە بکات کە بودجەی
هەرێم زیاد لە بودجەی ڕاستەقینەیەو...هتد، واتە ڕاگەیاندنی کۆتایهێنان
بە هاوپەیمانیەتیەکانی پێشوو. واتە کۆتایهێنان بە ڕێکەوتننامەکان. واتە
پێناسەکردنەوەی جێگاوڕێگای هێزەکان و مەوقعیەتی دەسەڵاتیان، واتە
دەستپێکردنی فازێکی تر لە بەرەو پێشەوەبردنی گەمە سیاسیەکان لە عێراقدا.
دەستپێکردنی تەجاوەزەکان، بەزاندنی هێڵە سورەکان، پشتکردن لە بریاری
140 و هێنانەوەی دەیان هەزار کەس لە فەرماندە و کادرانی عەسکەری سیاسی
و بەعس بۆناوسوپا، هێنانی سوپا بۆناوچە جێناکۆکەکان و دەرکردنی هێزی
پێشمەرگەی لێیان، هێنانی یاسای 24 و،..... ئەمانە سەرەتای خۆنواندنی
بزوتنەوەی ناسیونالیستی عەرەب وئیسلامی شیعی عێراقە. دوای تێکچوونی
هاوپەیمانیەتیەکانە و سەرەتای دەورەیەکی نوێیە. ئەم دەورە تازەیە زۆر
هەڵچون و داچون و تەنانەت ئەگەری بەیەکدادانی چەکداری لێرەو لەوێ و
ڕێکەوتنەوەو تێکچونەوە بەخۆیەوە دەبینێ، بەڵام سەرئەنجام هەوڵی
بزوتنەوەی ناسیونالیستی عەرەب و ئیسلامی عێراقە، بۆ ملکەچ پێکردنی
دەسەڵاتی ناسیونالیستی کورد بە عێراقی عەرەبی و کورتکردنەوەی
دەسەڵاتدارێتیەتی بەسەرکوردستان و کۆتاییی هێنانە بە هەراوهۆریای
هەرێمی فیدارڵی!! کوردستان و هەوڵێکە بۆ گێرانەوەی قەڵەمڕەوی دەسەڵاتی
مەکەزی بەسەر کوردستاندا.
بۆ یەکێتی و پارتیش خستنەگەڕی هەوڵەکانیەتی بۆ هێشتنەوەی سەهمی دەسەڵات
لە مەرکەز لە پێناو درێژەدان بەدەسەڵاتدارێتی بەسەر هەرێمی کوردستاندا.
بەدەستەوەگرتنی کەرکوک، خانەقین و قەرەتەپەو جەلەولاو..... ئەو
کارتانەن لە دڵی ئەو کێشمەکێشەدا. هیچ درۆیەک لەودرۆیە گەورەتر نییە کە
چ یەکێتی و پارتی و چ بزوتنەوەی قەومی و ئیسلامی عەرەبی دەیکەن،
سەبارەت بە دڵسۆزیان بۆ کەرکوک و ئەم ناوچانەی تر. کەس دەستی یەکێتی و
پارتی نەگرت لە کەرکوک و ناوچە جێناکۆکەکانی تردا، خزمەتگوزاری بکات.
ئازادی سیاسی رێزلێبگرێت، سیماو کارنامەکانی بەعس تور بدات. ڕێز لە
دانیشتوانەکەی بگرێت بێگویدان ناسنامەی قەومی و دینیان، و برینەکانی
پێشووی دەستی بەعس سارێژ بکات.
هەروەها کەس دەستی حکومەتەکەی مالکی و ناسیونالیستە عەرەبی و
ئیسلامیەکانی نەگرت، بێن و ئاوڕێک لەوەزعی وێرانکاری کەرکوک بدەنەوە،
ژیان و ئاوەدانی و خزمەتی پێشکەش بکەن، ئەمە لەکاتێکدایەو کە بەملیونان
دۆلار لەبەردەستی هەردوولادا بووە.
ڕاستی ئەوەیە کە کەرکوک و تەواوی ناوچە جێناکۆک و سنوریەکان، قوربانی
سیاسەتی نائینسانی و دژی ئازادی هەردوو بەرەی کێشمەکێشەکانی ئێستان، و
بۆیە هیچ چاوەروانییەک نەک نییە بۆئەوەی ئەم دوو بزوتنەوەیە کێشەی ئەم
شوێن و ناوچانە بەقازانجی خەڵکدا چارەسەربکەن، بەڵکە ئەمانە بەو
کارنامەو مێژووەی هەیانەو بەو پەیام وسیاسەتانەی بەدەستیانەوە گرتووە،
سەرچاوەی بە قوربانی کردنی خەڵکی ئەم ناوچانەو کوردستانن لە کێشمەکێشی
خۆیاندا و بۆ ئامانجی تر.
بەڵام نابێ ئەوەمان لەبیر بچێت ئەم کێشمەکێشە بۆ ئەو ئامانجانەی کە
بزوتنەوە قەومی ئیسلامی و عەرەبی بزوتنەوەی قەومی کورد لەگەڵ یەکتری
هەیانە، مەترسییەکی گەورەیە بۆ سەر خەڵکی عێراق و کوردستان، بۆسەر
خەڵکێک کە هیچ قازانج و بەژەوەندیەکیان لەگەڵ ئاسۆ ئامانجی ئەم
بزوتنەوانەو سیاسەت و ڕێگاچارەکانیان نییە.
هەوڵی بزوتنەوەی قەومی عەرەبی و ئیسلامی بۆ گێڕانەوەی کوردستان بۆ ژێر
قەڵەمڕەوی دەسەڵاتی خۆیان، بەمانای داسەپاندنەوەی زوڵمی قەومی و دینی
بەسەر خەڵکی کوردستان و مۆری پلە دوودانەوەیە لە ناوچەوانی
دانیشتوانەکەی و دەسپێکردنەوەی شەڕو کێشمەکێشە.
هەوڵی بزوتنەوەی قەومی کوردیش بۆ بەشداری لەدەسەڵاتی مەرکەزیداو
درێژەدانی بەدەسەڵاتدارێتی ئێستای لە کوردستاندا، بەمانای درێژەکێشانی
ئەم وەزعیەتە پڕگێژاو بێمافی و بێ خزمەتگوزاری و سەرکوتی ئازادی و
بێمافی فەردی و مەدەنی و پێشێلکردنی ئیرادەی سیاسی خەڵکی کوردستان لە
دیاریکردنی چارەنووسی خۆیەتی بەدەستی خۆی و سەرئەنجامیش دوبارە
تەسلیمکردنەوەی خەڵکی کوردستانە بە شێوەی ئاشتی بە دەسەڵاتی مەرکەزیەوە،
بەڵام بە بەشداری و ڕەزامەندی بزوتنەوەی قەومی کورد خۆی. یەکێتی و
پارتی 5 ساڵە خەرێکی ئەم گەمەیەن کەچی ئەمەیان لێقبوڵنەکراو ئێستا
بەزۆر ئەیانەوێ ملکەچیان بکەن.
لەو نێوەدا هەڕەشەکە لەسەر خەڵکی کوردستانە و ئاینندە سیاسییەکەیەتی.
خەڵکی کوردستان بە خوێن و ئێسک و پروسکەوە دەسەڵاتی ناسیونالیستی
عەرەبییان تاقی کردۆتەوە، هاوکات نزیک بە دوودەهەیە زیاتر لەنیو
ئەوەندەی دەسەڵاتی بزوتنەوەی قەومی کورد" یەکێتی و پارتی"یان
تاقیکردۆتەوە. هەردوو ئەم دەسەڵاتە جگە لە موسیبەت و کوێرەوەری، جگە
لەسەرکوتی سیاسی و ڕۆژنامەگەری و بێمافی، جگە لە ژێرپێخستنی
سەرەتایییترین مافە فەردی و مەدەنییەکان، کوشتاری ژنان و تیرۆر و...
هیچ خێرو بەرەکەتێکی نەبینیووە. ئێستا کە ئەم تەنگژەو ئاڵۆسکاویانە
سەریان بەرزکردۆتەوە، چارەنوسی خەڵکی کوردستان هەر بەدەستی ئەم هێزو
بزوتنەوە کۆنەپەرست و دژی ئازادیانە نییە، ڕێگایەکی تر، ڕیگایەک کە
خەڵکی کوردستان بە خۆجیاکردنەوەیان لە ئاسۆ ئامانجی بزوتنەوەی
ناسیونالیستی کورد، وەڕێخستنی بزوتنەوەیەکی گەورەی کۆمەڵایەتی بۆ
جیاکردنەوەی کوردستان لە عێراق و پێکهێنانی وڵاتێکی سەربەخۆی سکولارو
غەیرە قەومی ڕێگاچارەیەکی ترە. ڕێگا چارەیەکە بە جێبەجێ بوونی دەتوانێ
بۆهەمیشە دەسەڵاتی زۆرو بێمافی قەومیء پلە دوویی و کێشمەکێشی بزوتنەوەی
ناسیونالیستی کوردو عەرەب کۆتایی پێبهێنێت.
خەڵکی ناڕازی کوردستان لە دەسەڵاتی قەومی و ئیسلامی عێراق و،
لەدەسەڵاتی یەکێتی و پارتی، کە هەموو ڕۆژێک لە کوردستان بەبەرچاوی
خۆمان ئەیبینین، هێزێکی گەورەو بەرینە. هێزێکە بەدژی گەندەڵی و دزی و
بەدژی پێشلکردنی ئازادی و تیرۆرو قەسابیکردنی ژنان، بەدژی بێمافی لاوان،
بۆ خواستی خزمەتگوزاری و ئاسودەیی و ئازادی، بۆ چارەسەری کارسازی کێشەی
خەڵکی کوردستان لە مەیداندایە. خواستی جیابوونەوەی کوردستان
ئارەزویانەو لە هەڵبژاردنەکانی ڕابردوودا نیشانیاندا کە 98% خوازیاری
سەربەخۆین، ئەم هێزە و ئەم جەماوەرە هێزی واقعییە بۆ جیاکردنەوەی
کوردستان و پێکهێنانی وڵاتێکی سەربەخۆ، هەر خەڵکێکی ئاوا کە خوازیاری
ئازادی و سەربەخۆییە دەتوانێ کێشە هەڵپەسێردراوەکانی داهاتووش بە
شێوەیەکی شیاو بەچارەسەر بگەیەنێ.
خەڵکی کوردستان، نابێ فریوی درۆو بەڵێن و سیاسەت و بانگەشەکانی یەکێتی
و پارتی بخۆن و ببنە بەشێک لە هێزو قوربانی ئەوان. ئەگەر بڕیارە
قوربانی بدرێت، ئەگەر بڕیارە ڕێگای سەخت و پڕکێشە تێپەڕێنرێ، ئەگەر
بڕیارە وەستانەوە بەڕووی سیاسەتی دەوڵەتی مەرکەزی و وڵاتە ئیقلیمەیەکان
و دەستێوەردانیان لە کوردستان بکرێت، دەبێ ئەم قوربانیە بۆ جیاکردنەوەی
کوردستان بێت. دەبێ بۆسەربەخۆی بێت. دنیای شارستانی ئەم سەردەمە بە
بینینی هێزێکی ئازادیخوازو پێشڕەو بۆ سەربەخۆی، پشتیوانی بێدریغی خۆیان
ڕادەگەیەنن. هەرئەمەشە دەتوانێ دەستی دەوڵەتی مەرکەزی و وڵاتانی
ناوچەکە کورت بکاتەوە لە ملهوری نواندن .
ئەگەر بڕیاربێت خۆپیشاندان بکەین، ئەگەر بڕیاربێت چەک هەڵگرین، کە
بڕیار بێت هەموو شێوەکانی خەباتێکی ئازادیخوازانە بگرینە بەر، کە
هەموویان بۆ ئێمە خەڵکی کوردستان پێویستن، ئەوا دەبێ لە پێش هەموو
شتێکەوە لە پێناو جیابونەوەی کوردستان و پێکهێنانی وڵاتێکی سەربەخۆ بێت.
وڵاتێکی سەربەخۆی پێشکەوتنخواز کە ئینسان تیایدا ئازادەو
پێداویستیەکانی ئینسانەکان تیادا دابین و کە کار تیادا ئاوەڵایە، کە
مافە فەردی و مەدەنییەکان ڕێزیان لێدەگیرێ. کە هەمووان مافی هاوڵاتی
بوونی یەکسانیان بۆ پارێزراوە. دەتوانێ گەورەترین کۆمەک بکات بە
چارەسەری ئەو ناوچانەی کێشەو ناکۆکی لەسەرە. خەڵکی کوردستان پێویستە لە
ڕاستای جیابونەوەی کوردستان و پێکهێنانی وڵاتێکی سەربەخۆدا، ڕێگای
جیابونەوەی یەکجاری لەئاسۆو ئامانجەکانی بزوتنەوەی ناسیونالیستی کورد
بگرنە بەر، کە لەسایەیاندا دوو دەهەیە برسین، بێکارن، بیمافن، بئ ئاوو
کارەباو خزمەتگوزارین، بی ئازادین، ئایندەی سیاسیشی کراوەتە کارتی سات
و سەودا، لەگەڵ ڕژێمە چنگ بەخوێنەکان و هێزە تاسەرمۆخ دژە ئازادی و
ئینسانیەکان.
|