٦\١\٢٠١٢

     کێ تاوانبارە!؟

کامیل ژیر

لێم زویر مەبە، تازەخونچەکەى باخى ژیانم
من بێتاوانم
من نێچیرێکى باڵ بریندارى تیغی دەبانم
دەستەوستانم.
    *   *   *
بروسکەى چاوى خومارى تۆ بوو دڵى لێکڕیم
چریکەى بڕیم
بە دەم زامەوە روwە و هەوارت بە بێ باڵ فڕیم
گریام و چڕیم.
    *   *   *
لێم زویر مەبە ئەگەر تاوانم خۆشەویستیە
تۆپەرستیە
تاوانی مەزن لاى نێچیرەکەت تۆنەویستیە
بارى پەستیە.
    *   *   *
ئەى فریشتەکەم، خونچەکەى سەردەم، نابێ بێ تەگبیر
راوکەر و نێچیر
ئەم لەبری ئەو، بێ پرسینەوە، بێ پێوەرى بیر
بدرێتە بەر تیر.
    *   *   *
لێم زویر مەبە، کێ تاوانبارە؟ بەندەى بریندار؟
یا چاوى خومار؟
وا بە سانایی، داى لە ناو دڵی، مەڵبەندى ئازار
خەڵکینە هاوار!!

ماڵپه‌ڕی کامیل ژیر