٢٨\٨\٢٠١١

    کرۆسکەخەون...

شوان عوسمان

کچەکەم وەکو کرۆسکێکی دێمی ،
چاو ئەکاتەوە..
لە چاوی هەرمێیەکی بە ئاویشدا ،
دەم ئەکاتەوە...
تا تنۆکێک لەو ئاوی بە هەرمێ بوونە ،
بزێتە ناو دەوی...
کچەکەم...
هەمیشە خەون بەوە ئەبینێت ،
زوو گەورە بێت و
باڵا قۆپەنی و کەدە شلکە هەناریەکەی ،
لە بەژنی کوارگێکی شلوملەوە ،
زووتر هەڵچێت و
وەکو چنارێکی سەرەمر ،
شەنگتر باڵایەک دەرکات...
کچەکەم ئاخیر دەنکە قلی رەشمیریە ،
لە وشیەک ترێی تەمەنم ،
بەربۆتە ناو بەیاری رەزی من ...
ئەو تازە سەر لە ناو ساباتی پەلکەمێوی ماڵەکەم ،
دەردێنێ...
دەست لە دەستی توولەمێوەکانی داکی بەرئەداو
لەگەل دەنکە زەیتوونێکی رەش و گەشدا ،
چاوی رەش و گەش ئەکاتەوە و
خەون ئەبینێت...
کچە شەرمنەکەم....
شەرم مەکە خەون ببینە ،
هەقی خۆتە خەون ببینی...
ئەوەی خەونی نەبێت، ناتوانێ لە سبەینێش بڕوانێت..
ئەتوو بتەوێت یان نەتەوێت ،
هاژەی جۆگەی ژیانی تۆ ،
لە هەژان و خوڕە ناکەوێت..
رووباری تەمەنت ئەڕوا و
شۆڕ ئەبێتەوە و
ناوەستێت...
بەو نیگا کز سوتاوانەت ،
کە کزەیەکە و دڵم داخ ئەکەی...
وا لە داهاتووت بە کزی مەڕوانە ،
هەرچەندە ئەزانم حەز ئەکەی ،
بەو خەونانەش دەست لە ملی سەرخەوێک کەی و
ئینجانە گوڵی رۆژانت بە فرمێسکی خەونێکت ،
ئاوبدەیت....
تا قەدولکت پەل دەرکات...
هەر دەوەنەو ئەبێتە دار ،
ئەتووش ئەتەوێت لە دەوەنی خۆت ،
پازێک بدەی و
ببیتە درەختێکی هەراش...
لە گەمەی ماڵمالۆکانێی رۆژانەت ،
دەهریت و
ئەتەوێ وەک سەرەژنێک سەر دەرکەی و
چرایەکی خۆت داگیرسێنی..
ببیتە کابانێکی ئازادی دەست بەخەنە ،
لە بنەوانێکی سەرەبەخۆدا بەبەژنی چناری خۆتدا سەرکەوی و
وەکو لاولاوێکی سەوز هەڵبچیت...
کچە ناسکەکەم...
کێ بێت نەیەوێت ئازاد بێت و
خەون بە سەربەخۆ بوون نەبینێت...
منیش هەمیشە حەزم ئەکرد و
خۆزگەم ئەخوازت ،
خەونم ئەدیت...
وەکو ئێستا لە قەپێلکە بێیەکی تورت و
پێستێکی جیڕو چورچدا ،
هەناسەم تەنگەتاو نەبێت و
گەورە نەبووبام...
پایزی زەمەن لە پڕێکە پەلکەکانی تەمەنمی ،
نەوەراند با...
کە نەتوانم جارێکی دیکە ،
دەستم لە کەدی دەوەنێکی ساوادا ،
گیر ببێت و
لە تۆقەرانێکی داری رۆژانم ،
دابەزم ...
لە نۆژەن بە رەگە ساواکانم ،
داچووبام و
هەڵچووبام...
تا سەربوردەی منداڵیم ،
وەکو خۆخێکی سۆریساقەی بە کوڵک ،
بە منداڵ کردبایەوە...
رێم لە گەیی بوون و
گەورە بوونی خۆم بگرتبایە...
بەرائەتی دۆڕاوی زەمەنێکی لەدەستچووم ،
کە بۆنی شییری خاویان ،
بە ئاسماندا بڵاو ئەکردەوە ،
بە دەست بێنمەوە....
لە دواوە بە لاپەڕەکان بێمەوە و
لە نوێوە لەزەت لە تامی گەرازە کاڕکەکان ،
ببینمەوە...
کە هەمیشە لە ترسی چاوی باخەوان ،
نەوەک لە سەر نەوسێک بە دز ناومان بێنێ ،
زارمان ئاوی تێنەئەزا...
من یاخیم لە گەورەیی ئەو گەورە پیاوە ،
بەدبەختە...
کە هەموو سەروەریەکانی منداڵی و
بزە رەنگینەکانی ساتی گچکەیی ،
شێلوو ببوو...
هەر ئەو نەسیمەش دێت و
لە سوبحی تەمەنی تۆدا ،
سەوزەگیای بەختی کچێنیت ،
بۆگە ئەکات...
مێژوویەکی تەڕ لە بن تاریشکێکی زەرد ،
ئەنووسێتەوە...
لۆ پیاوێکی بەخترەش خەمێکی رەشتر ،
کەلەکە ئەکات ...
من منداڵیم ئەوە بوو لە سەر لانک ،
سەرەمەرگ بوو...
بە دەسرازەکەی رۆحی لە هەناسە کراو
بووە قوربانی بەر رەحمەتی زریانێک ،
لە قەدەری گەورەیی و
دەستکەوتەکانی شۆڕەسوارێکی مەغرور ،
کە هەر لە منداڵیەوە ناویان لێنا پیاو...
شمشێری پاسەوانی پاوانێکی مێیان ،
لە مست نا و
خەنجەرێکی بە رەچەلەک سوور و
بۆگەن بە بۆنی خوێنیان لە دەست نا ،
تانۆکێکی چڕیان لە نێوان هەردوو هەناسەدا ،
چڕ کردەوە....
شەریعەتێکیشیان لۆ مانەوەی ئەو مەرزە داهێنا ،
کە گوناهە گەورەکانی من حەلال و
هەقە گچکە رەواکانی تۆ حەرام..
لەو ساوە پێکی شەرابی ترێی تۆ ،
خەست ئەکرێتەوە...
بە فتوای پیاوە سەرخۆشەکانی بەر زیکری شەڕ ،
لە میحرابێکی پیاوانەوە..
خواردنەوەت بۆ منی پیاو حەلال کرا....
ئاخر تا ئەو هەناسانە دەربەست نەبن ،
تام لە هەناسە و
ترێ و
شەراب و
ماچ ناکرێت...
بۆیە حاشا لە من ،
ئەو منەی منی بە پاشای جانەوەران ناساند...
سەرشۆڕە پیاوەتیم ،
لە بەرامبەر مێژووی شکانی شەنگی ،
شۆرەبیت...
ئەی کچەژن....
کچەکەم...
تۆ لە زەمەنێکدا لە تەمەنی بە کرۆسکی خۆت ،
یاخیت ،
کە هێشتا کچەکانی وڵاتی من ،
لە زەمەنی بە هەرمێ بوونی خۆیان زیاتر ،
یاخین...
پرچک وگەرەشکی دەقە بۆگە ،
لە کەلک کەوتووەکانی ،
کەلتوور و شەریعەت ،
رێ لە باڵاو هەڵچوونیان ئەگرن..
بە بەرد بەردباران و
بە گوللە گوللەباران و
وەکو شەیتان سیمای نێرگز و
پەڕوباڵی فریشتەییان ،
رەجم ئەکەن...
کچە کابانەکەم...
تۆ هەر لە ئێستاوە ئەتەوێ ،
کابانێکی ئازاد بیت...
لە ماڵە بێسەروبەرەکەی کۆنەهەواری وڵاتمدا ،
هیچ جادەیەک نیە دەستی رەگەزی تۆ بگرێت ،
ئازادی کات...
بە خەنەی خوێن نەبێت دەلاقەیەک نابینێتەوە ،
تا مەرکانی سر و
خەمەکانی لێ دابنێت...
تا لە چنگی شاخێک رزگار بێت و
ناسنامەی ئاوێکی چۆڕاوەی سەربەخۆ ،
لە گیرفانی پیاوێکدا وەرگرێتەوە...
ئەو شەریعەتە چەند تاڵە ،
ئەیەوێ تاهەتایە من منێکی گەورە بم و
ئەتووش لەوێدا پنچکە پوونگەکی گچکۆکە...
هەر بە قوڕاوی خەون خۆت تەڕ کەیەوەو
قەت بە پێش سێبەری گەورەیەکیش ،
نەکەویت...
دەوری چیلکەدارێکی تێنووی بەوەفا ببینی و
نە پەلکت بتوانێ تەڕ ببێتەوە و
نە لاسکێکی لاساریشت بتوانێت ،
لە قەدوباڵای گەورەکان هەڵگەڕێتەوە....
ئازادی وسەربەخۆ بوون ،
دوو هەورازی سەختی سەر خەڕەندن ،
ئاسمانی سەریان پڕە لە ئەستێرەی ،
جریوەدار لە بن سێبەری مانگدا ،
خەون ئەبینن...
بەڵام لە خوارەوە دارستانێک هەیە ،
گەورە گچکە فڕ ئەکات..
خۆشبەخت بە زوو گەورە نەبیت ،
چونکە ئەترسم ....
لە خۆم و لە منێتی منێکی پیاوی ،
چاوسۆر ...
بە فڕێک فڕت کەن و
پەڕەی خونچەی تەڕت ،
بە دەردەسەری ژاکانی بەختی ،
گوڵە دەستەخوشکەکانی رەحمەتیت ببەن...
پەلە مەکە هێشتا رووبارەکان ،
لە ئاوەکانیان یاخین ،
دەقەکان وەکو خۆن ،
ئێرە هێشتا وڵاتی پیاو و
خوێن و کوفر و گوناهە...
لێرەدا هێشتا تاوانی پیاوە گوناهبارەکان ،
بە خوێنی تۆ و
کوفرێکی تۆوە ئەشوورێتەوە..
ئەو دەست بە خوێن سۆرانە ،
هەمیشە بە خوایەک سوێند ئەخۆن و
دڵی خۆیان بە خوایەک خۆش ئەکەن ،
بەڵام رۆژانەش لە سەر جادە و
کۆڵانە تەنگەکانی شارەکەم ،
پەڕەدڵی خوایەک ئەدڕن و
بتێک قیت ئەکەنەوەو
خواوەندێکیش لە سەر هیچ بەر ئەدەنەوە...
کوشتنەوەی بڕکەنەمامێکی ناسک ،
وەکو هەڵپچڕانی سیفۆنی سەری ،
شوشەیەک بیرەیە...
کچە چکۆڵانەکەم..
کە تەماشای کەزیە شۆڕەبی و
باڵا رێواسیەکەت ئەکەم...
حەز ئەکەم هەروا بمێنیەوە و
زیاتر باڵا نەکەیت و
باڵات هەڵنەچێت...
خەونت گەورە بێت بەڵام گەورە نەبیت..
تا بە دەردی حەشری سوتان و
بوونە قۆچی قوربانی خەونە دڵگەرمەکانت ،
نەبیت...
کچەکەم...
کوریکە هەناری کچانی وڵاتەکەم ،
بە رەشەبای باخەوانێکی دڵرەقی پیاوەوە ،
بە ناوی شەرەف ئەوەرێ..
کاتێک ئەیانەوێت شەونمی فرمێسکێکیان ،
بە پشتی دەستی رازێک ،
وشەیەک ،
نیگایەک ،
بسڕن..
ئاگر لە کەدو لک و پەڕ و باڵیان ،
بەر ئەدەن...
بە هەتک و تکانی شەرەف ،
توولەرێی زەمەنیان رائەگرن ،
لە گەرمەی برژانی ژانەکانیان ،
ئاگردانی دڵیان سارد ئەکەنەوە....
بۆیە ناچار ئەبن لەو پاییزەی خەزانەدا ،
بەر لەوەی بە بایەک هەڵوەرێن ،
پەنا بۆ دەنکەشقارتەیەک ببەن ،
تا چیتر خەون بە هەرمێیەکی تەڕی ،
تەمەنەوە نەبینن...

٩\٨\٢٠١١ - سویسرا - بادن
ماڵپه‌ڕی شوان عوسمان