!کۆبوونەوەى ئەم هەفتەیەى مەکتەبی راگەیاندنى پارتى ئاژاوەى لێکەوتەوە

مەولود خیابان

لاى هەموو مرۆڤێکى بە ویژدان روون و ئاشکرایە کە هەردوو حیزبى دەسەڵاتدارى کوردستان، هەموو رێگایەکیان گرتۆتەبەر و تاقیکردۆتەوە بۆ شاردنەوە و پەردەپۆشکردنى سیاسەتە نا دورست ودزى و گەندەڵى و رێکەوتن و هاوپەیمانەتیە ژێرەو ژوورەکانیان و سەرکوت و ئیستبداد و بێمافیەکان، هەر لە گرتن و رفاندن و بێسەروشوێنکردن و تۆمەت دورستکردنەوە بگرە تا دەگات بە زیندانى و دادگایکردن،ئەمانە ئامراز گەلێک بوون بۆ مانەوەیان لەسەر پێیەکانیان(ئەو کەسانەى ویژدانیان بە بەرژەوەندییەک نەفرۆشتبێت و چاویلکەى تەلخیان لەچاو نەکردبێت، ئیستا سەدان نموونەى جۆراو جۆرى بە خەیاڵدا دێتلەم بارەیەوە).

ئاخر حیکمەتێکى تیایە، لەم کوردستانەى دوو دەیەیە بەناو حکومەت بوونى هەیە و زۆرترین ئیمکانیات لەبەردەستا بووە،بەڵام سەرەتاترین پێداویستیە سەرەتاییەکانى لەبابەت ئاو کارەبا و سوتەمەنى و رێگاوبان لەلاى خەڵک بۆتە خەون و خەیاڵ،ساکارترین ماف و ئازادییەکانى تاک لەژێر پرسیاردایە،نایەکسانى و جیاوازى نێوان چینەکان بەوپەرى خۆى گەیشتووە،چەندین کەڕەتە چارەنووسى ئەو خەڵکە بەچاوبەستراوى تەسلیم بە ئایندەیەکى نادیار دەکرێتەوە ...،بەڵام خەڵک لێیان هەڵناستێت و شار بەدەریان ناکات سەرەرایى نارەزایەتیەکى قوڵ لەنێو چین و توێژەکانى خەڵکى کوردستان،نهێنیەکە لێرەوەیە ئەو حیزبانە بە توندترین رەفتارى سیخورى و عەسکەرتاریەتانەى فاشیانەوە رەفتار دەکەن و مامەڵە لەگەڵ دەوروبەرەکانیان دەکەن و هەناسەیەک بۆ جیاوازتر لەوان ناهێڵنەوە.

ئێوە سەیرکەن ،دوایى ئەوەى لە هەفتەى پێشوو مەکتەبى راگەیاندنى پارتى لەسەر پێشنیارى سەرۆ قادر بریاریدا کە هەموو وێنە و پۆستەراتەکانى شەهیدى جوانەمەرگ سۆران مامە حەمە لە هەولێر بدڕێندرێت و بەهاوکارى پۆلیس و شارەوانى ئەو کارە کرا،ئەمجارەشیان لە کۆبوونەوەى ئەم هەفتەیە واتە یەک شەمە رێکەوتى(10/8/2008)سەرۆ قادر هەڵسا بە پێشنیارکردنى دورستکردنى تیم و گروپێک بۆ چادێریکردن و دەمکوتکردنەوە و چاوترساندنى هەموو ئەو نووسەر و رۆژنامەنووسانەى کە ئەم ماوەیە لە هەولێر خەریکى نوسین و کارى رۆژنامەگەرین،سەرۆ بە شێوەیەک باسى ئەو لیژنەیە کردووە و گووتویەتى ئەگەر زانیتان رۆژنامەنوسێک زۆر لێتان یاخى دەبێت و کۆڵ نادات ئاگادارم بکەنەوە و من پیاو کوژم زۆرە،ئەوەى جێگاى ووتنە ئەم پێنیارە لەلایەن (نەژادى عزیز سورمێ و عبدلرزاق عەلى و نیاز لاجانى)زۆر بە توندى رەتکراوەتەوە گووتویانە دورستکردنى گروپێکى سیخورى تۆقێنەرى لەم شێوەیە کارێکى تاسەر ئیسقان سەرمەزارانەیە و مایەى ریسواییە و ئەو کارانە دەبێتە هۆى ریسوایى زیاترى پارتى و راگەیاندنى پارتى بۆیە ئاژاوە کەوتە نێو کۆبوونەوەکان و نەژاد و نیاز و عبدلرزاق کۆبوونەوەکەیان بەجێهێشتووە،دواتر سەرۆ قادر هەر سوربووە لەسەر پێکهێنانى ئەو لیژنەیە چونکە گووتویەتى ئەم ماوەیە کۆمەڵێک گەنج دورست بوونە لە هەولێر سڵ لەهیچ شتێک ناکەنەوە و پێویستە کاریان لەسەر بکرێت،بۆیە لەکۆتاییدا بریاریاندا بە دورستکردنى ئەو لیژنە لەکەسە ریسوا و بێ مستەواکانى ناو راگەیاندنى پارتى (فواد سدیق لە هەفتەنامەى گوڵان،مکائیل ئیبراهیم بەرپرسى رادیۆى زاگرۆس و سایتى پەیامنێر و سالار عوسمانى بەرێوبەرى رادیۆیى کوردستان)کە تەنها تەکەتولى نێو راگەیاندنى پارتى قەدەرى مانەوەى ئەمانەى لەناو راگەیاندن درێژ کردۆتەوە ،ئەگەرنا دەبێت بچنەوە لادێکانیان تور و پیاز بچنن!دواتر سەرۆ قادر بەناوى مەکتەبى راگەیاندنى پارتى راپۆرتێکى بۆ مەکتەب سەرۆک بەرزکردۆتەوە کە ئەو سیانە رێگرن لەبەردەم کارەکانى مەکتەب راگەیاندن و داواى کردووە کە لاببرێن و فواد و میکائیلیشى پێشنیارکردووە بۆ جێگرتنەوەیان.

هه‌ولێر