|
٢۴\١\٢٠١٠
کۆنه‌په‌رست .
به‌ندی عه‌لی
جه‌سته‌ی ڕزیوه ،
ئه‌و لاکه
چی لێ بکه‌ی یان لێ نه‌که‌ی
چی بپۆشێ یان نه‌پۆشێ
له‌ئاوریشمی کرمی لوسی دیموکراسی و
له‌که‌تانی ده‌شتی بێپایانی خه‌ونی
جیهانی نوێ
جه‌سته‌ی ڕزیوه ، ئه‌و لاکه
هه‌ر ئه‌پروێ
له‌کاغه‌زی بریقه‌داریه‌وه بپێچی و
به‌قردێله ڕه‌نگاوڕه‌نگه‌کانی دیاری
بی به‌ستیه‌وه
یان له‌نێو سندوقی خشڵ و
زێڕی بنێی
کوپه‌یه‌کیش ، گران به‌هاترین عه‌تری
به‌ناوبانگی پێدا بڕژێ
جه‌سته‌ی ڕزیوه ، ئه‌و لاکه
هه‌ر ئه‌پروێ.
جێنیوه‌ری
2010
گله‌یی.
من روحی مه‌لوولم به‌روخت
عاشیقه قوربان
تۆ چنگی موژانت له‌به‌هێی
دڵم گیر ئه‌که‌ی
من فه‌رشی حه‌ریری ئولفه‌تم
خستۆته ژێر پێت
تۆ ده‌شتی به‌راوی روخسه‌تم
لێ داگیر ئه‌که‌ی
من به‌حری ئه‌مه‌کدارم
له‌هه‌ڵچوون و سکونا
تۆ دۆندی چیای قه‌هری
حه‌ز له‌زه‌مهه‌ریر ئه‌که‌ی
من جه‌معی گه‌ڵای عومرم
له‌پاییزتا هه‌ڵوه‌ری
تۆ عه‌ینی گه‌رده‌لوولی
ئه‌به‌یت و له‌بیر ئه‌که‌ی
من قومێ ئاوی ڕوونم
له‌په‌رداخی جه‌سته‌یا
تۆ غه‌رقی مه‌تاهاتی
چاوه‌ڕێی ته‌فسیر ئه‌که‌ی
من خه‌سته‌م وتۆ ئازار
من جه‌سته‌م و تۆ هه‌ر خار
به‌م زه‌برو جه‌فای نازه
توفلی دڵم پیر ئه‌که‌ی
ده‌ست به‌رده له‌ئه‌تواری
پڕ ئه‌سراری مه‌کری مێ
به‌م هه‌وری جه‌وره نوری
مانگه‌شه‌و یه‌خسیر ئه‌که‌ی.
جێنیوه‌ری
2010
|
