|
|
|
١٨\٣\٢٠٢٠ کۆرۆنا و گەندەڵیی.
ئاری محەمەد سابیر
حکومەتی ھەرێمی کوردستان گەندەڵیی و
بێباکییەکەت زۆر بێ شەرم و بێزەوەرە، بەڵام لە سایەی دەسەڵاتداریی تۆ
وشەی شەرمیش شەرم نییە.. زۆر ترسناکتری لە پەتای کۆرۆنا، کۆرۆنا
پەتاییەکە و دێ و دەڕوا و ململانێی ژیانە لەسەر زەوی ھەروەک
پەتایەکانیتر سروشتییە! وا مەزانە لەبەر کۆرۆنا تۆمان لە یاد نییە.. لە
ناو گۆڕیش ھەر باست دەکەین، تۆ بەو ھەموو شان و شەوکەت و ناوبانگە بە
درۆ و دەلەسەیە ناتوانی منێکی ھاوڵاتی و مامۆستا رازیی بکەی کەچی هەر
ستەممان لێدەکەی.. لە شایی و زەماوەنددا لە شین و رۆڕۆ و لە سەرەمەرگ و
ئاویلکەدان شەو تا رۆژ دەبێتەوە ھەر تۆم لە بیرە ئەی حکومەتی ھەرێمی
کوردستان!
کۆرۆنا بە مردن کۆتایی بە ژیانی مرۆڤ دەھێنی و تەواو.. بەڵام مرۆڤەکانی ئەو ھەرێمە دەمرن و ھێشتا شایستەی دارایی و پاشەکەوت و پلەبەرزکردنەوەیان ھەر بۆ نەگەڕێندراوەیتەوە! بێ شەرم بڕۆ.. دەبڕۆ بە بازرگانی نەوت گەنم لە دەرەوە بھێنە و بیدە بەغدا و قوڕبەسەری جوتیاری هەژاریش بکە، چ نەمایە نەکەی.. گەر تۆ هەی ئەی بۆ دەسەڵاتت بەسەر ئەو کەسانە نییە کە لە ڤایرۆسی کۆرۆنا خراپترن؟ هەر کات تووشی بارودۆخیک دەبی داوای ھاوکاریی لە خەڵک و دەوڵەمەندان و وڵاتان دەکەی.. ئەی بە خۆت چی.. بەس خەریکی خەوتن و خواردن و رابواردن و حەز و ئارەزووەکانی خۆتی.
هەرگیز ناتوانم بڕوام بە تۆ هەبی ئەی دەسەڵاتداری ستەمگەر.. ئەوە بڕیاڕی خۆمە باوەڕم پێی هەیە.. ئیدی پێویستم بە کوردبوون و کوردایەتی نییە چونکێ خاوەنشکۆی وەک ئێوە هێندە دیموکراسین جوایەزیی لە نێوان من و بازرگانان و خاوەن کۆمپانیەکانی ئێراق و سوریا و تورکیا و ئێران و دەسەڵاتدارە بەرژەوەندپەرستە نامرۆییەکانی ئەوروپا و رۆژاوا ناکەی کە لەو هەرێمە جرتوفرتیانە! ئەگەر باسی کوردایەتی و کوردبوون دەکەی پاشەکەوت و مووچەی تەواو و دوانەکەوتن و پلە بەرزکردنەوە و شایستە داراییەکان بگەڕێنەوە، بەڵام تۆ خەڵکت وا پەروەردەکردوە کە باسی مووچە بکەی بە دەرۆزەکەری بزانی.. فشەت پێ دێ ٢٦ مووچەی فەرمانبەرانت لایە و بە سەر بڵندی دەڵێی دەبێ بەغدا بیداتەوە! ئەوە چ سەرئێشەیەکە تووشی فەرمانبەرانت کردوە؟!
حکومەتی ھەرێم بڕوا بکە کەس تۆی خۆشناوێ چونکێ ھەڵبژاردن بە خۆت دەیکەی و خۆت بڕیاردەدەی کێ دەربچی، نەوت و ئازووقە و مووچە و داودەرمان و دەرزی و پارەی نیوەی مووچەی فەرمانبەرانت لە بەغداوە بۆ دێ.. با بزانم ئازایەتیی تۆ چیە ناتوانی گەڕکێک ئاوەدان بکەیەوە.. ئاو و کارەبا بدەی و شەقامەکان قیرتاو بکەی!؟ ھەر دەڵێی بوودجە نییە و بەغدا دەیبڕی.. بۆ واز لە بەغدا ناھێنی؟ بێ بەغدا و بارودۆخی نێودەوڵەتی و ھاوپەیمانان نەبێ یەک مانگ ناتوانی خەڵک بەڕێوەببەی! ئەوە چ دەسەڵاتدارییەکە.. ئەفسانەیە یان تابلۆیەکی سوریالییە.
تۆ ناھێلی بایکۆت و خۆپیشاندان بکەین و گردبوونەوە ئەنجام بدەین.. کەواتە ناچارین بە نووسین ناخی خۆمان دەڕببڕین چونکێ گەندەڵییەکانت بەرەوە ئەوە دەچن ببیە دز و جەردە! بەسە.. ئیتر چاکە و کاری چاکە ئەنجام بدە نەک چاکسازیی بە قسە.. پاشەکەوت و مووچە ریکبخەوە ئەگەر نا بە هیوای چوونە ھەڵبژاردن مەبە و جارێکی دیکە بێجگە لە بەردەستە مل ئەستوورەکانت کەس دەنگت پێ نادا، ئەگەر هەڵبژاردنت دەوێ من هاوڵاتیم و یەک دەنگم بۆ ھەڵبژاردن.. بە خۆت ناڵێی یەک دەنگ گرنگە و کاریگەریی ھەیە.
|
|
|
