|
٦\٣\٢٠١٢
کۆترە رەش و
سپیەکان!
جەلال قادر
قوتابیەکان بە مامۆستا کەیان گوت : لەم شارە
پڕ لە چەکدارە بێزارین!
مامۆستاش وەلامی دانەوە : پشووتان درێژبێت ئەمەش کۆتایی دێت!
یەکێ لە قوتابیەکان گوتی : مامۆستا پلانێکم هەیە دەمەوێت بە هاوکاری
هاوپۆلەکانم ئەنجامی بدەین!
مامۆستاش گوتی : لەگەل ئەم دەسەلاتە پلان نایخوات ، بەس فەرموو
پلانەکەت بلێ!
قوتابیەکە گوتی : مامۆستا ؛ لە مێژە لەو خەیالەم هەزارەها کۆتری سپی
پەیدا بکەین وەک سمبولێک بۆ ئاشتی و ئازادی بە ئاسمانی شارەکەمان
بیفڕێنین !
مامۆستا و قوتابیەکان سەریان سوڕما لەم بیرۆچکەیە ، گوتیان : ئافەرین
.. ئەوان بەچەکدار کوچەو کۆلانەکەیان گرتووە . ئێمەش ئاسمان پڕدەکەین
لە کۆتری سپی!
بەم جۆرە لەگەل هاتنی وەرزی بەهار قوتابیەکان ئاسمانی شارەکەیان
ڕازاندەوە بە کۆتری سپی ..کەچی چەکدارەکان تەقەیان بە ئاسمانا کردو
دەیان کۆتریان خەلتانی خوێن کرد و چەند دانەیەکشیان بە باڵ شکاوی
بەردایە خوارەوە.
بۆ ڕۆژی دوایی سولتانەکان قوتابی و مامۆستاکەیان سزا دا . مامۆستاکە لە
پیشەکەی دوورخرایەوە ، قوتابیەکانیشیان دابەش کرد بەسەر
قوتابخانەکانیتری شار.
لەو ڕۆژەوە دانشتوانی شار بەلێنینادا هەموو سالێک یادی فڕینی کۆترەکان
بکەنەوە.
ئەو سالە لە لایەن دەسەلاتەوە بڕیار درا بە هەموو شێوەیەک کڕین و
فرۆشتن و بە خێوکردنی کۆتری سپی قەدەخە بکرێ!
بۆ سالی نوێ و یادی ماتەمینی کۆترە سپیەکان .. قوتابی و مامۆستاکان لە
ژێر زەمینی شار کۆبوونەوە بە پلانێکی نوێ.
لە ڕۆژی یادەکە هەرچەندە بەفردەباری ، کەچی دوو ئەوەندەی تر چەکدار
ڕژانە ناوشار و بازگەیان لە سەر سووچی هەموو کۆلانەکان دانا.
مامۆستا و قوتابیەکان هەرچی کۆتری ڕەش هەیە کۆیان کردەوە وەک سمبولێک
بۆ ماتەمینی ، لەسەربانی هەموو مالێک کۆتر لە شەقەی باڵیدا و ئاسمانی
شارەکەیان داپۆشی.
کاتێک ئاسمان ڕەش و سپی هەلگەڕا ، چەکدارەکان لوولەی تفەنگیان ڕوو لە
ئاسمان کرد و کۆترە ڕەشپۆشکانیشیان بە زاماری بەردایە خوارەوە.
پەڕی ڕەشی کۆترەکان ئاوێتەی کلۆبەفرەکان بوون و شاریان بە ڕەنگی ڕەش و
سپی و سوور داپۆشی!
بۆ سبەینێ گوێمان لە ڕادیۆی سولتانەکان بوو دەیگوت : چەکدارەکانمان بێ
تاوانن ..لەبەرئەوەی لە کاتی فڕینی کۆترە ڕەشەکان بەفر باریوە و ڕەنگی
کۆترەکان گۆڕاون!
هەرچەندە هەندێک کەس بەم پاساوەی سولتانەکان فریو دران ، کەچی لەبیریان
چوو بوو کە کۆتر هەر کۆترە ئەگەر ڕەش بێت یان سپی!
ماڵپه‌ڕی جه‌لال قادر
|
