|
١٦\٣\٢٠١٢
کوردی کڵۆڵ
-
قسەیەکی تر بۆ ھەڵەبجە.
گۆران رەسوول
ھەقە بەر لە ھەموو شتێک شیوەن بۆ تاکی کوردی بکەم. کوردی داماو، کوردی
کڵۆڵ و بەستەزمان. تاکی کوردی وەک خوویەک فێرە خوێ دەخاتە نێو
برینەکانییەوە. یەکەم یادکردنەوەی ھەڵەبجە کە لە یادمدا ماوەتەوە و بۆ
من شتێکی سەرسامکەربوو وەک ئەوەی لە خوێندنەوەی رۆمانێکی تراژیدی
ببمەوە و ئەو پاڵەوانەی لەناو ڕۆمانەکەدا منی پەلکێشی خۆی کردووە
لەکۆتاییدا بمرێت، ئەو یادە دروست لە ساڵی ١٩٩٣ بوو. ئەو کات ئەو
ھۆنراوە و گۆرانی و دروشم و ماتەمینییە، گوزارشتێکی زۆر تراژیدیان بە
ئەندازەی گەورەیی کارەساتەکە دەردەبڕی و ھەستی منیان شڵەقاند.
لێ دوای تێپەڕبوونی دوازدە ساڵ ھەر بە ھەمان شێوە و ھەر بەھەمان شین و
ڕۆڕۆ و داماوییەوە ئەو یادە دەکەینەوە. بە پێچەوانەی میللەتانی دی کە
ھێندە کار لەسەر ناساندنی و بە جیھانیکردنی کارەساتەکانیان نیو ھێندە
گریان و فیغان ناکەن. کوا کام فیلی سینەماییە ھەیە گوزارشت لەو
کارەساتە بکا و لە ڤیستیڤاڵە جیھانییەکان بەشداربووبێ؟ کوا کامە ڕۆمان
ھەیە پەڵەوانەکەی عومەری خاوەر بووبێ و بۆ سەر زمانە جیھانییەکان
وەرگێڕدرابێ؟ کوا کامە سیمنار و کامە چالاکی جیھانی ھەیە ھەڵەبجەی بە
جینۆساید ناساندبێ؟ ھەموو ئەو کارەساتانەی بە جینۆساید ناسراون ھەر
ھێندەی ھەڵەبجە تراژیدین.
عەلی کە ئەگەر خودی خۆی نەبا ھێشتا نەیدەزانی خەڵکی ھەڵەبجەیە و لەو
کارەساتەدا کەوتووەتە ئێران، دەی کوا گەڕان و بەدواداچوون بۆ
عەلییەکانی تر کە ھەر خوا دەزانێ ئێستا لە چ کونجێکدان.
مانای چییە دوای تێپەڕبوونی بیست و چوار ساڵ بەسەر وەھا کارەساتێکدا
ھێشتا ھەر گوێ لە گۆرانی (بە تەنیا جێیمەھێڵن) بگرین و دەقەیەک لەسەر
جادەکان بووەسین و لەسەر شاشەی تیڤییەکان ئەو دیمەنە تراژیدییانە
بۆخۆمان لێ بدەینەوە. ئەوانە شتی ڕەمزی و ڕووکەشن، ئاخر ئێمە ھێشتا
ناوەڕۆکی ھەڵەبجەمان ساڕێژ نەکردووەتەوە، ھێشتا ناخی تاکی
ھەڵەبجەییەکانمان ھێور نەکردووەتەوە ھێشتا ترس و فۆبیای کیمیایی و سێو
و فڕۆکە و بەعسی لە ھەڵەبجە نەڕەویوەتەوە.
تا ئێستا ھەموو حیزبە کوردییەکانی باشوور حیزباییەتیان بەو کارەساتە
کردووە، ئەو ڕووداوە و ھەموو بۆنە و ڕووداوە نەتەوەییەکانیان
حیزباندووە. ئەگەر تا ئێستا دەسەڵاتی کوردی خەولێکەوتوو کەمتەرخەمە
دەرھەق بە ھەڵەبجە، ئەدی کوا کامە دەوڵەمەند کامە بازرگان لەو یادەدا
شتێکی کاریگەری بۆ ھەڵەبجە کردووە. کوا کامە رێکخراو و مێکخراوی
خێرخوازی ھەڵەبجەیان لەو مەینەتبارییە داشۆریوە. نازانم دەبێ تاکەی ھەر
بەدیار چاوەڕوانی گەڕانەوەی دۆستە مردووەکەمان سفرەی خوانەکە
ھەڵنەگرینەوە.
١٥\٣\٢٠١٢
goranrasool@yahoo.com
|
