١٨\١\٢٠١٦

کورد و هەڵپەڕکێ!

جەمال عەزیز     

لە مێژووی کورد و کوردستان هەڵپەڕکی جیگای تایبەتی گرتووە ، ئەم مێژووە ئەگەر خۆمان یاداشتمان کردبێ یان گەڕیدەو مێژوونووسان ، باش بێت یان خراپ ، لەدڵسۆزیان بێت یان لەدوژمنایەتی ، ئێستا هەڵپەڕکێ جێگایەکی بەرز و جوانی هەیە لە کلتوری نەتەوەیمان ، هەرچەندە ڕەنگاوڕەنگی جلوبەرگمان لەسروشت وەرگیراوە ، بەڵام ئەمڕۆ ئەوبەرگە بووە بەپێناسەی ناسینەوەمان بۆ حیزبایەتیمان ، لەکاتی خۆشی وناخۆشی ، لەکاتی جەنگ وئاشتی هەڵپەڕکێ جێگای شیاوی هەیە ، مێژوونووسان دەگێڕنەوە کاتی چوون بۆ شەڕ کورد هەڵپەڕکێی کردووە ، بەجۆرێک پیاوەکان خۆیان جووڵاندۆتەوە تانیشانی دوژمنی بدەن هیچ ترسێکیان نیەو هیچ ئەرزشێک بۆ دوژمن دانانێن ، ئەم باسەی مێژوو تاچەندە ڕاستە ئەوە باسێکی ترە ،بەڵام خۆمان هیچ گومانمان لەو ڕاستیە نیە کەزۆرمان حەز لەهەڵپەڕکێیە!

کاتی ڕاپەڕینی ساڵی ١٩٩١ جاش و طواری پیاوانی ڕژێمی بەعس تەقەیان لەخەڵکی ڕاپەریوو دەکرد ، لەلایەکی ترەوە خەڵکی ڕاپەریوو هەڵپەرکێان دەکرد ، ساڵی ١٩٩٢ خەڵکی برسی بوو بێ نان وئاو ژیانی کوولەمەرگی بوو، بەڵام بۆ هەڵبژاردنی حیزبەکەی کاری غەش وتەزوویر و هەڵپەڕکیی دەکرد بۆ ئەم حیزبانەی ئەمڕۆی کوردستان ، کاتی شەڕی براکوژی پێشمەرگەی ئەمبەر بۆ دژایەتی پێشمەرگەی ئەوبەر لەمەیدانی جەنگدا هەڵپەڕکێی دەکرد ، لەکاتی یادی دامەزراندنی ئەم حیزب یان یادی لەدایک بوونی فڵان سەرکردەی حیزب خەڵکی لەماڵەوە دێنەدەرەوەو دڵشاد ودڵتەنگ هەڵپەڕکێ دەکەن ، بۆ یەکگرتنەوە ، بۆ ئاشتەوایی ، بۆ هەواڵی ڕۆشتنی نەوت ، بۆ هەواڵی هاتنی مووچە ، بۆ وشکە ساڵی ، بۆ باران بارین ، بۆ جەژنی نەورۆز ، بۆ یادی پێغەمبەری ئیسلام ، خەڵکی هەڵپەڕکێ دەکەن ، کەواتە ڕاستە دوژمن دەڵێ کورد بکوژە ، بەڵام دەهۆڵ وزوڕنای بۆ لێبدە هەڵدەپەڕێ.

ئەمڕۆ خەڵکی لەباشوری کوردستان ، یان لە ڕۆژئاوای کوردستان لە ژیانێکی گەلیک سەختدان ، قورسی ژیان بڕسکی لە زۆر خێزان بڕیووە ، گرانی دەستی ناوەتە هەناوی زۆر لەخێزانەکان ، مووچە بە چەند مانگ دوادەکەوێ ، پێدانی مووچە بووە بە مژدانە ، بەجۆرێک خەڵکی مووچەی خۆش دەوێ ئەگەر لەسەرشەقامەکانیش هەڵپەڕکێی بۆ نەکەن بەدڵنیایەوە لەماڵەوە هەموو خێزانەکە بۆ هاتنی مووچە هەڵپەڕکێ دەکەن ، پێشمەرگە لەسەنگەردا بەرگری لەخاکی کوردستان دەکات ، منداڵەکەی لەماڵەوە شیری نیە، خاوەن خانوو داوای کرێی خانووەکەی دەکات ، منداڵەکەی بەبێ وەرگرتنی ڕۆژانەکەی دەچێتە قوتابخانە ، سەرکردەکەی هێندە بێ ویژدانە هیچ سۆزێکی نەبۆ پێشمەرگەو نەبۆ خانەوادەکەی هەیە ، چەند مانگە مووچەکەی دواکەوتووە ، بەرپرسێکی فشەکەر بۆ وێنەگرتن ئێوارانێک دەچێت بۆ لایان لەسەنگەرەکاندا چەند کاتژمێریک دەمێنێتەوە ، سەرەڕایی ئەم هەموو بەدبەختیانە کەچی دەبینی پێشمەرگەی قارەمان هەڵپەڕکێ دەکات،.

ڕێژەی زۆری ئۆتۆمبێلی بەرپرسەکان و ڕێژەی سووتانی سووتەمەنی ئۆتۆمبێلەکانیان گەر کەمبکرێتەوە دڵنیام مووچەی پاسەوانەکانیان دابین دەکات ، بەڵام پاسەوانەکانیان بەبێ مووچە بۆ شەوەئاهەنگێکی بەرپرسەکەیان هەڵپەڕکێ دەکەن. لەباشوری کوردستان حوکمەتێکی حیزبی وپەڕلەمانێکی ئیفلیجمان هەیە ، پارەیەکی خەیاڵی بۆ وەزیر و ئەندام پەڕلەمانەکان دەڕوات ، هەربەگەنجی خانەنشینیان دەکەن ، هیچ کەسێک نیە بڵێ ئەم هەموو سەروەت وسامانەی ئەم میللەتە بۆ بەهەدەر دەدەن ، بۆ وەزیر یان پەڕلەمانتارێکی وابەستە بەحیزبەکەیەوە لێپرسینەوەی لەگەڵ ناکەن ، بەڵام خەڵکی ئەم وڵاتەی لەمەڕخۆمان بۆ خۆشبەختی وەزیر یان پەڕلەمانتاریک بەناوی دەستبەکاربوونیان هەڵپەڕکێ دەکەن.

لەکوردستان چەندین کەناڵی تەلەفزێۆنی وڕادیۆ و بڵاوکراوە هەیە کە بەبواری میدیایی ناوزەندی دەکەن ، زیاتر لە ٢٠ کەناڵی ئاسمانی (سەتەلایت) هەیە تێچووی هەریەکێک لەو کەناڵانە مانگانە یان ڕۆژانە زیاتر لە ٢٠٠٠٠ تا ٢٥٠٠٠ هەزار دۆلارە ، هەرچەندە هەندێک لە کەناڵە ئاسمانیە ٢٤ کاتژمێریەکان تێچوویان دەکاتە ٥٠٠٠٠ هەزار دۆلار ، بێجگە لە کارمەندوو پەیامنێریان لە زۆربەی وڵاتانی دنیا ، هەرکەناڵێکی لۆکاڵی بۆ مانگێک زیاتر لە ١٠٠٠٠ دۆلار تێچوویەتی ، بێجگە لە ڕادوێ وبڵاوکراوەی حیزبی ، سەرەڕایی ئەم هەموو بەهەدەردانی سەروەت وسامانەی خەڵکی کوردستان ڕۆژێک نەمانبینی خەڵکی کوردستان بڵێن ئەرێ ئەی حیزبی فڵان ئەم پارە بێ شومارە ، ئەم تێچوونە زۆرەی پارە سەرچاوەکەی لەکوێووە دیت لەکاتێکدا ٤ مانگە مووچەخۆران چاوەڕوانی مووچە دەکەن ئەی خێرە نەمانبینی ڕۆژێک یان کەناڵێک لەبەر بێ مووچەی لەپەخش ڕابووەستێ ، بەڵام لەبەرامبەردا خەڵکی بۆ دەست بەکاربوونی فڵان کەناڵی حیزبی هەڵپەڕکێ دەکەن.

بەکوردی بەکرمانجی ئێمە میللەتێکین زوو شتمان لەبیر دەچێتەوە ، ئێمە میللەتێکین تاکو خەڵکانی تر لەبری ئێمە بیر نەکەنەوە بیرمان بۆ شتگەلێک ناچێ کەپەیوەندی ڕاستەوخۆی بەژیانی ڕۆژانەمانەوە هەیە ، ئەگەر وانیە ، ئەی بۆ قاید زەروورە هەر بوونی هەیە ، ئەی بۆ کۆبوونەوەکان قەت تەواو نابێ ، ئەی بۆ هۆنینەوەی بەیت وبالۆرە بەشانی ئەم حیزب وئەو حیزب بووە بەناسنامەمان ، ئەوەتە بۆ بەرژەوەندی حیزبی هەندێک دەوڵەتی کوردی دەوێ ، هەندێک دەوڵەتی کوردی بە دکتاتۆریەت ناودەبات ، هەندێک بووە بە پاسدار و حەشدی شەعبی ، هەندێک بووە بە ژەندرمە.

١٧\١\٢٠١٦
ماڵپه‌ڕی جه‌‌مال عه‌زیز