|
٤\١٠\٢٠١٣
کورد و، پاکێجەکەی
ئەردۆغان.
ئەرسەلان مەحمود
پەیەدە، پاکێجەکەی ئەردۆغانی ڕەتکردەوەو، حکومەتی هەرێمی کوردستانیش
لەسەر زاری وتە بێژە فەرمییەکەی خۆیەوە پشتیوانی لێکرد، دەی کەوابێ بۆ
دەبێت پەیەدە ڕەتیکردبێتەوە؟، یان ئەی کاتێ پەیەدە ڕەتیدەکاتەوە، بۆ
دەبێ حکومەتی هەرێم پێشوازی و، پشتیوانی لێبکات؟..
لەڕاستیدا، پوختەترین وڵام بەلای"پەیەدە"وە، لەبەر ئەوەیە چجۆرە
ماددەیەکی تایبەت و هەستیاری پەیوەست بەپرسەکانی چارەسەری کێشەی کورد
بەدیاریکراوی، لەپاکێجەکەدا، بوونی نییەو، ئاماژەی پێنەکراوە، بەنمونە:
چاکسازی لەیاساکانی هەڵبژاردن و، بەشداریکردنی بواری سیاسەت، لەتورکیا،
یان لەهەر وڵاتێکدا، نەبەتەنها بریتییە لەبڵاوکردنەوەی پڕۆپاگەندەی
حزبی بەزمانی غەیرە تورک و، غەیرە زمانی زۆرینە، نەڕێگە پێدانی مۆدێلێک
لەحزبایەتی هەڵگری چجۆرە چارەسەرێکی بابەتیانەیە، تا کورد لەناو وەها
سیستمێکدا بتوانێ تەمای لەسەر هەڵبچنێت.
تەعدیلکردنی یاسایەک تا رێگە بەحزب بدا سودمەند بێت لەخەزێنەی دەوڵەت
و، گەڕاندنەوەی ناوی گوندو، شوێن و، شارە تەتریککراوەکان، ئەویش وەک
ئەوەی هاتووە، ئەگەر داخوازی لەسەر هەبێ و، هەڵگرتنی یاسغ لەسەر بەکار
بردنی تەنها چەند پیتێک/ لەوانە (Q، X، W)
وەک ئەلفبای کوردی لاتین و، هەروەها ڕێگەپێدانی پەروەردە بەزمانی "غەیری
تورک و، غەیرە زمانی زۆرینە، ئەویش دیارە تەنها لەخوێندنگە "تایبەتـ"ـەکاندا،
هەرگیز ناچنە خانەی چارەسەرکردنێکی دیاریکراوی سیاسیانەی کێشەی کورد،
یا هەر میللەتێکی تری بندەست لەچوارچێوەی وڵاتێکدا.
لەبەر ئەوە، ئەوەی ئاکەپە، بەدرێژایی ئەم ١١ ساڵەی لەحکومڕانێتیدا،
بەرامبەر بەکورد کردوویەتی و، هەتا ئێستاو، دڵنیام لەداهاتووشدا ئەگەر
بۆی بڕواتە سەر هەر دەیکات، جگە لەڕەتکردنەوەو، بێحورمەتیکردنێکی
ڕاستەوخۆو، زۆرینەی جاریش ناڕاستەوخۆییانە بەهەست و نەستەکانی مرۆڤ و
کولتووری کورد وەک نەتەوەیەکی بندەست، تشتێکی دی نەبووەو، هەمان ئەو
پاکێجەیش دوبارە وێناکردنەوەی هەمان ئەو سیناریۆو، سوکایەتیکردنەیە
بەرامبەر بەکورد، بەڵام لەژێر ناوێکی جیاوازدا.
ئەمە بەتەنها هەر تێفکرین و، خوێندنەوەی منێک نییە، هەموو ئەوانەی
رۆژێک لەرۆژان، ڕوداوەکانی ئەم بەشە بندەستەی تورکیا، سەرنجی ڕاکێشاون،
گەر بیانەوێ لێرەوە بەئاسانی دەتوانن لەوە تێبگەن و، بزانن ئەردۆغان
ئیدی نەک هەر بەتەمای چاکسازی نەبووەو، نییەو، نابێ، بەڵکە ئەوەی
لەنیازو، نیەتی ئەوندا هەیە، بەتەنها هەر هەیمەنەپێکردنەوەو،
زیندوکردنەوەی کولتووری عوسمانیەوەو، بەس، بەڵام بێگومان لەفۆڕمێکی
تردا " ئیخوانی ".
پوختەی باس:
ئەردۆغان و، پارتەکەی ، تەنانەت خودی دەوڵەتیش " تورک "، نەلەڕابردوداو،
نەلەئێستاو، نەلەداهاتووشدا، بەنیاز نەبوون و، بەنیاز نابن و،
نیەتیشیان نیە، هیچ شتێک وەک ئەوەی شایستە بەهەبوونی خۆیەتی بۆ کورد
بکەن، ئەوان هەتا ئێستا چۆن بەناوهێنانی ناوی کوردو، ناوی کوردستان،
دوچاری هەڵچوون و، هستریا دەبن، لەداهاتووشدا هەر وا دەبن.
لەبەر ئەوە ئەوەی لێرەدا، ئەگەر هەڵەی گەورەی پەیەدەو، کوردەکانی
باکوور ئەوەبێ هەتا ئێستا نەیانتوانی بێت خۆیان لەزمانی نەتەوەی تورک
دووربخەنەوەو، هەتا ئێستایش هەر بەتورکی قسە بکەن، ئەوە دور
لەڕەخناژۆکارییەکی دوژمنکارانە، حکومەتی هەرێمی کوردستان، بەبیانووی
هاو سنوری و، بازرگانی هاوبەش و، بەناو بەرژەوەندییە هاوبەشەکانەوە،
ساڵەهایە ئەم هەرێمەی کردۆتە ئامرازی دەسەڵاتداری راستەخۆی و،
ناڕاستەوخۆی دەوڵەتی تورکیا، ئەگەر وانییە ئەی بۆ ڕۆژێ لەڕۆژان
نەبیندرا، حکومەتی هەرێم هاوسۆزو، هاو پشتیوانی کوردانی باکور، بداتە
سەر هاوسۆزی و، پشتیوانییەکانی بۆ دەوڵەتی تورک.
دیارە ئەمەم بۆ ئەوە نییە، بووترێ حکومەتی هەرێم بەشێوازێکی سیستماتیک
دژایەتی مافی کوردەکانی باکور دەکات، بەڵام بمانەوێ یان نەمانەوێ،
پشتیوانیکردنی تورکیا بەم جۆرە، هەم کوردانی باکوور، لەبەرچاوی کوردانی
باشوور دەخاو، هەم پرسەکانی چارەسەریش لەنیەتی کورداندا وەک نەتەوە
دەخاتە ژێر پرسیارو، مەترسییەوە.
ماڵپه‌ڕی ئه‌رسه‌لان مه‌حمود
|
