په‌یوه‌ندیپه‌رتووکخانه‌رۆشنبیرییلینکئه‌رشیفنووسه‌رانده‌سپێک

٦\٨\٢٠١٤

    کورتە نامەی شیعریی.

         - بەشی یەکەم -

فەتاح حەسەن

من و تۆ سێبەری یەکین
کە شەو داهات.. هەردووك تەنهاین
هەر بۆیە.. رقم لە شەوە.

هەر کات توانیت
رووناکیی لە ئاگر داماڵی
منیش، دابماڵە.. لە خۆت.

کەی ئەستێرە
سنگی ئاسمانی بەجێهێشت
ئەو دەمەش، دڵی من.. تۆ.

خۆشەویستیی.. ئاوێتەبوونی یەکترە
نەوەك سووتان
گەر سووتان بێت!
کەی رەوایە، یەك بسوتێ
ئەویدیکە، بێ ئاگا بێ!!

ژیان، بێ خۆشەویستیی ئەستەمە
بۆیە، مردن
لە پێناو خۆشەویستییدا کەمە.

بمدەرە دەم رەشەبایەك
لە شاری بەفر و رەشەبا
راز و نیازی ئاشقانت
بە دیارییەك بۆ دەهێنم.

ببمە خاوەنی بەلەمێك
بە زەردەپەڕی ئێواران
لە بەلەما
هێدی هێدی.. لە جێی شیعر
ئەمن، پرچت دەهۆنمەوە.

ئەو ساتەی کە:
دڵتەنگ دەبم
نە گوڵ جوانە لە لام
نە بۆنی خۆشە.. رێحانە.

کە سەردەخەمە سەر سینەت
هێند ئاسوودەم.. لەو ساتەدا
هەرچی خەمی کۆن و نوێیە..
سەرلەبەری بەبادەکەم.

کلۆ.. کلۆ، بەفر دەباری
لە باڵکۆنی ماڵەکەما
بە بوتڵیك شەرابی سوورەوە
چاوەڕێت بووم
بۆ نەهاتی؟!

کە دەگرێم.. بیردەکەمەوە لە خۆم.
پێدەکەنم.. لە تۆ
ئەمێستا، بۆ خۆشم نازانم!!
بگرێم، یا..

هەڵوەدای کەسێکم
کە دیار نەمام.. هەڵوەدام بێ
بۆچی دەبێ
ئەوی لەبەرچاو بێ..
هەموو دەمێ
لەبەر دڵ بێ؟!

گەر دەپرسیت..
من و سروشت
کاممان جوانین؟؟
دڵنیابە.. هیچتان
بێ یەکتری، جوان نین.

ئای چ رۆژێکی بەدە
ئەو رۆژەی کە:
یادەوەرییەکانمان
بەر لە مردنی خۆمان دەمرن.

تۆ، خەم مەخۆ، گلێنەکەم
بارگەی خەمەکانت لێکنێ
بینێرە بۆم
خەمەکانت.. چاك دەزانن
ئەمنیش تۆم.

تا هەست بە بێ تۆیی نەکەم
لە بەرامبەر ئاوێنەیەك
دانیشتووم و لە چاوی تۆ..
پێك فڕدەکەم.


دانیمارك / ڤالبی
ماڵپەڕی فەتاح حەسەن

 

 

 

 

په‌یوه‌ندیپه‌رتووکخانه‌رۆشنبیرییلینکئه‌رشیفنووسه‌رانده‌سپێک