٨\١\٢٠١٠

کوشتنی شوان و پرسەباری ئەڵوەنزادەکان.

سەلام عەبدوڵا  

قەدریە خان و خەلیل بارام ئەو خێزانە کرێکارەیە کە بە هەژاری و نەگبەتی منداڵەکانیان گەورە کردو ئێستا لە ئێوارەی تەمەن نەخۆشی و دەستکورتی تەنگی پێهەڵچنیون و کەسیش لێیان ناپرسێتەوە. کوڕە گەورەکەیان(جەلیل حەلاج)، بۆ وەڵاتێکی تر دەگەڕێ، تێدا کەرامەت و ویژدانی مرۆیی حاکم بێت، خەمی بژێوی و راکەڕاکەی مرۆڤ، برەوێتەوە. ساڵانێکە ئەم دایکوباوکە چاوەڕوانی گەڕانەوەی دوو کوڕە بێسەروشوێنەکانیان دەکەن لە جەنگە کۆنەپەرەست و ناسیونالیست و میلیتاریستانەکانی عیراق لەگەل ئێران و لە کوێت. هێشتا بە لە ئامێزگرتنی ئەوان شادنبوونەوە، ئیمڕۆ لە کاتژمێری شەش و نیو دەستی تاوانکاری مەزهەبی ئیسلامی مرۆڤکوژ، گوڕگ ئاسا، کوڕێکی تری ئەم خێزانە لەناوبردو بەو تەمەنە پڕ نەهامەتییە، دەبێ پرسەو خەمباری بۆ(شوان)بگێڕن.

شوان وەک کوڕی زۆربەی خێزانە هەژارەکان، ناچار بوو ببێ بە پۆلیس و ئەم بەیانییە لەکاتی پشکنینی مینێکی کاتیدا لەتەنیشت حوسێنییەی گەورەو هەر کە زانی دەتەقێتەوە، خۆیی بەسەری هەڵدا و بەگیانی خۆی، ژیانی زۆرێک لە هاوپیشەکانی لە مەرگ رزگارکرد.

ئەم بەیانییە جەنگی مەزهەبی، وێنەو سمبۆلی شاری پێکەوە ژیانی ئاین و تایفەو نەتەوەو کەمایەتیەکانی ئەڵوەنزادەکان، ناشرین کرد.

لەو کاتە کە خەڵکێکی زۆر خەریکی مەراسیمەکە بوون، مام خەلیل دوور لە پرسەکە، بە تاقی تەنها و بە دوو چاوی نابینا و بە بێدەنگی لەبەردەم دەرگای ماڵەکەی دانیشتبوو، وەک بڵێی گەڕەکی(عەبدوڵابەگ)ی هەژارنشین و کەلاوە شڕەکان، جیهانەو (مام خەلیل)یش پەیامبەری ئاشتی و تۆلەرانت وبرایەتی، وەک باوکێک بە کوڕەکانی دەڵێ(بۆچی وائەکەن....شەڕ مەکەن... کوڕەکانم! ئێمە پێویستیمان بە وێرانکاری و خوێنڕشتن نییە)!

یارییەکی قیزئاوەر یەخەی ناوچەکەی گرتووەو بەڕێوبەرانی مەزهەب و ئاینەکان، پەوپەڕی بێویژادنییەوە تەڕو وشک دەسوتێنن و بەسەر لاشەی مرۆڤ دەڕۆن. فاشتی تیوکراتی لۆژیکی خۆی دەدۆزێتەوە بۆ تاوانکردن، لەبری((ئەوەی نەفسێک بکوژێ، وەک ئەوە وایە هەموو خەڵکی کوشتووە))، ئایەتەکەی ئەنفال بەکاردەهێنن"ارهبوا بها عدو الله و عدوکم"؛ چەندە قوربانییە بێتاوانەکانیان زۆرتر بن، ئەوەندە زیاترو زووتر لە خوداکەیان نزیکتر دەبنەوە: کلتوری کۆمەڵکوژی ئاین و فکری خۆی هەیەو تاوانە نەگریسەکەی ئیمڕۆ لە خانەقین، تەنها نموونەیەکی بچووکیانە.

مارکس وتویەتی(ئاین تلیاقی گەلە)، بەڵام زۆر جار ئەم وتەیە بەهەڵە بۆ کوردی وەرگێڕاوەو(گەل)ەکەیان کردووە بە کۆ(گەلان)، بەڵام لەبەر ئەوەی پەیامی بۆچوونەکەی مارکس بە وەرگێڕانە هەڵەکەوە درووستترەوبەم شێوەیە هەموو ئاینەکان دەگرێتەوە، بۆیە منیش لەمەودوا ئەگەر پێویستیم بە ئاماژەکردن هەبوو بۆ ئەم وتەیە، ئەوا وەرگێڕانە( هەڵەکە) بەکار دەهێنم، چونکە بەڕاستی(ئاین تلیاقی گەلان)ەو خۆی خۆی رسواو عیبرەت کردووە(جەنگی سونی-سونی و شیعە- شیعەو سونی شیعە لە عیراق، شیعە-شیعە لە ئیران، کاسۆلیک-پرۆتێستانت لە ئیرەلەند، ئەسلامی- یەهودی، مەسیحی-ئیسلام، ئەسلام-مەسیحی، بوزی-بوزی، بوزی-سیخ، سیخ-ئەسلام...هتد)لەبرچاون و"خوا پشتیوانی" ئەو لایەنە دەکات کە بەباشترین شێوە خۆیی پڕچەک کردووەو بەهێزەکەیانە! کێشەکە لەلای ئەو وەهمە کەناویان لێناوە"خودا"، نییە، بەڵکو لە کارتێکردنی ئاینە لەسەر ژیانی رۆژانەی خەڵک. هەڵەیەکی کەوشندە دەکەین ئەگەر رمی رەخنەکەمان ئاراستەی ئاسمان بکەین!

ئەوانەی مینی کاتی لەسەر شەقامی گشتی دەشارنەوەو خۆیان لەناو خەڵکانێک(بە پیاو وژن و دایکی حامیلەو منداڵ) کە نایانناسن، دەتەقێننەوە، هیچیان لە مرۆڤ ناچێت و ئاژەڵگەلێکی خوێڕین لە پێستی مرۆڤ!

دڕندەکان پرسەیان تەنها نەخستووەتە ناو ماڵی دایکە قەدریە و مام خەلیل، بەڵکو ناو ماڵی گشت خاوەن ویژانێکی شارەکە.