٢٢\٤\٢٠٢٢

    لە ئاخەوە.. لە یارەوە!

دارا خونچە

چوون ئەوەی دەمخواست

لەسەر بەرزاییەکانی نیشتیمان وەدەرکەت

لە کەلەنی دارسنەوبەرە بەرزەکانی پشت ماڵی یار

     پڕشنگی دا..

     وە نێو دڵی پێنووسەکەمدا تێپەڕی و

                        چۆڕ چۆڕ خۆبەخۆ دارژیا

هەرچی وە مەژییمدا هات بەخشیم

          هەرچی لە دەستم هات درێخییم نەکرد..

نیشتیمان هەڵدێرا و خۆی وە من گرتەوە

         یار باڵی شکا و وەسەر شانی من نیشتەوە

دەروازەی بەندیخانەکانم لەڕێسمەبردن

     لە هەر جێژوانەک سەکۆی ئازادییم داگیرساند..

تێکڕای زیندانییانم بەرهەڵدان و

                لە زێدی خۆیانم ئاکنجی کردنەوە..

سروودی رامووسان و پەخشانی ماچم

                وە کەشکەلانی ئاسمانان گەیاند..

لێ هێشتاکە لە سەنگەری ئەڤینداریی

            لە دەڤەری وارپەروەریی

     ئاخ و جوانییەکان هەراج دەکرین و

     پەڕوباڵی زار و زمانان دەردەکێشرێن

        هەست و سۆز و خولیای دڵان دادەپاچرێن

ئای کوو وەدەستی هاوزێدگیریی

        ئای کوو وەدەستی خێزانگیریی

                               گیرمانخواردیە!

نێوەڕاستی نیسانی ٢٠٢٢ - لەندەن

ماڵپه‌ڕی دارا خونچە