|
٢٤\٦\٢٠١١
لە بارەى کتێبە
تازەکەمەوە.
غه‌مگین بۆڵی
من هیچ دڵم بەچاپبوونى ئەم کتێبە خۆش نییە ، ئاخر چاپبوونى ئەم کتێبە و
چاپبوونى کتێب وا لە نووسەر دەکات ، دووبارە بە خۆیدا بچێتەوە . نووسەر
هەست بەوە دەکات کەوا ئەرکى قورستر دەبێت .ئەمە لەلایەک، لەلایەکى
ترەوە دڵم وەک هەناری دەستى منداڵێکى چەتوون دەکوشرێت ، ئاخر چەند
هەڵەیەکى ڕێنووسى تێکەوتووە .تەنانەت کتێبەکە کە لێکۆڵینەوەى ئەدەبییە،
لە سەر بەرگەکەى تەنیا نووسراوە ( لێکۆلینەوە) من ئەوانە بۆ بەهانە
ناهێنمەوە لەبەرامبەر کتێبەکەوە ، تەنانەت ئەم ڕەخنەیە یەکەمجار
ئاراستەى خۆم دەکەم و خۆم بە بەر پرسى یەکەم دادەنێم . ئاخر زۆر نووسەر
هەیە ئەمانە دەخاتە ئەستۆى هەڵەى چاپەوە ، کەئەمە لە ئەستۆى خودى
نووسەرە . چاپبوونى ئەم کتێبە دەبوایە زۆر لەمەو بەر بووایە ، وەلێ من
هەر ئەوەندەم دێتە دەست کە کتێبى پێ بکرم و نەبمە سێبەرى هیچ کەس و
لایەن و حیز بێکەوە ، تەنانەت یەک تاکە دینار لەهیچ لایەن و کەس و
حیزبێکەوە وەرناگرم و چاویشم لەو جۆرە خۆشگوزەرانییە نییە وەک بەشێکى
نووسەرانى ئەمرۆ .زۆرجار پارەم لەدەمى هاوسەرەکەم و هێورى کوڕم
دەرهێناوە و کتێبم پێکڕیوە ، تاکە گرفتێکى بەردەوامى من ئەوەیە دواى
خوێندنەوەى کتێبەکان ، نازانم کتێبەکانم لەکوێ بە نرخێکى شیاو
بفرۆشمەوە .لێرەوە ئەو راستییە بەیان دەکەم ، ئەوە یەکەمجارە بەهۆى
چاپبوونى کتێبەوە پارە وەربگرم . ئەمە بۆ ئەم پەتایە درێژ دەبێتەوە
کەوا ئەمرۆ بەشێکى نووسەران حەزەکانى خۆیان و ماڵ و منداڵیان دەخنکێنن
بۆ چاپکردنى کتێبێک. ئاخر لام وایە ئەم نووسەرانە ئەمە جگە لە بێ ئەقڵى
بەو لاوە هیچى تر نییە . دڵنیام رۆژگارێک منیش تووشى ئەم پەتایەى بێ
ئەقڵى چاپکردن دەبم . ئومێد دەکەم ئەم رۆژگارە زۆرى مابێت.
دیارە ئەم کتێبە یەکەمین کتێبى بڵاو کراوەى من نییە ، ئێستاش سەیرم بەو
عەشقە قووڵەى کتێب دێتەوە کاتێک بەدرێژایى رۆژ کرێکاریم دەکرد بۆ
کۆکردنەوەى پارەى چاپبوونى کتێب . لەزۆربەى دنیا وەها باوە کەوا نووسەر
بە پاداشتى کتێب و نووسینەکانییەوە دەژیەت . وەلێ لەکوردستان ئەمە
جیاوازە و زۆرجار دەبێت پارە لە دەمى حەزەکانمانەوە بگرینەوە بۆ
چاپبوونى کتێبێک ، هەڵبەتە لێرە کارم بەو نووسەرانەوە نییە کە ئێستاش
لە دەزگاکانى بڵاو کردنەوە بەبێ سڕە کتێبیان بۆ چاپ دەکرێت .سەیرترین
بەسمە ستانى ئەمرۆى بڵاوکراوەى ئەدەبى کوردى ئەوەیە ، کە بەهیچ جۆرێک
شیعر چاپ ناکەن و گوایە شیعر نافرۆشرێتەوە و خوێنەرى نەماوە و
کەمبۆتەوە . لێرە دەپرسم ئایا کتێبى کێیان چاپکردووە و نەفرۆشراوەتەوە
؟ ئایا ئەو شاعیرانەى کتێبیان بۆچاپ دەگەن رەچاوى چى دەکەن ؟ ئایا
بەکام پێوەر کتێبەکە هەڵدەسەنگێنن ؟ بەهەرحاڵ .پێم وایە چاپبوونى کتێب
و بڵاو کردنەوەى پرۆسەیەکى دژوارە کە من جاران وەک پێویست
تێینەگەیشتبووم . من لەم سەکۆیەوە دڵتەنگى خۆم دووبارە دەکەمەوە
بۆچاپبوونى کتێبى ( ئەدەب وەک بەشێک لەرۆح ) ، کە بەشێکى لێکۆڵینەوە
ئەدەبیەکانمە.
ماڵپه‌ڕی غه‌مگین بۆڵی
|
