تابلۆ: Hebriana Alainentalo

من جەستەی کات دەنووسمەوە،
بەناو هەموو لاواندنەکان دەچم (جووڵە هەمیشە لە کاتدایە)
کە شێوەی دەستەکانیان وا سازاند
کە ببنە دەستەکان.
هەست بکە چۆن هەزارەی ساڵەکان پێستیان وەرگرت و
کاتیش بۆنی گرت.
چۆن ئێمە شێوەمان وەرگرت،
چۆن شێوەکار شێوەی وەرگرت،
چۆن جووڵەی فڵچە لە ویستەوە شێوەی وەرگرت و
کە لە تۆ زیاتر بێت
لە ئەمڕۆ زیاتر بێت...
من دەخوازم بزانم
(بە سەری ڕوو لە زەویمەوە)
ئەوە چی بوو لەو هەموو بارانی فرمێسکی ئۆقیانووسییانەی
کە بەرەو ڕوومەتەکانمانەوە هاتنە خوار و
گەشەیان کرد
تاکوو دەست بەو بە زەوییەوە بگرن.
هەموو پێکەنینەکان کە بەناو هەوادا زرینگانەوە،
بەرەو کوێ چوون؟
چییان بەسەر هات؟
بێگومان جەستەیەک دروست دەکەن!
نیشانەی سەرسووڕمانەکانم لارن،
خواست و دڵەخورپەکانم
لەناو هەمان قووتیلکەدا
جێگەیان دەبێتەوە.
(چۆن لەو وڵاتەوە خۆم بنووسمەوە؟)
ئەوەی کە ئەمڕۆ بوو بە هی من و
وەک کاتیش چەسپیوە
هەر بە کاتیش شێوەی گرت.
من لە شەپۆڵەکان
لە ڕوومەتەکان دەهزرم
کە زەریا دەستی لەسەر دانا،
کە نەرمییەکەی هێشتەوە.
چۆن دەکرێ پیر وا نەرم بێت،
چۆن کات هێشتا لەگەڵ پەپوولەکاندا ڕەدوو دەوکەوێ.

 
2ی ژەنیوەری 2007. چۆن بەردەکان ئەوا کتومت بە دەستی زەریا خڕ دەبن، چۆن بەردەکان ئەوها یەکجار بە هەتاو گەرم دەبن، (تەنیا بەرد بوو) و چۆن من بەسەریاندا رامکرد، چۆن ئەم شیعرە لەو جووڵانەوە ڕایکرد.

تابلۆ: Hebriana Alainentalo

  

تابلۆ: Hebriana Alainentalo

دوو دێر لە ژێر و دەستپێکدا دەبینرێن
وەرە باڵاکان
هەموو ئەو ساردییانەی کە زەمینەی نێو دێرەکە حونجە دەکەن

هەڵدەگرن
ئەوە بڕبڕەی پشتە کە ئاماژە دەکات
کاتێک تۆ بە نزیکی دەبینی
چاوەکانمان خوازیاری
چاوی تر نین
کە چاویان تێ ببڕن

تابلۆ: Hebriana Alainentalo

فیکە لێدا بێ ئەوەی فیکە لێدا
دەبوایە ئێمە تکا لە زار نەکەین
کە زۆر قەڵەباڵغە و
هەموو شتێک دەڵێ
کە دەبێت توانای نەبێت
فرەوان بێ‌.

لە بری
ناو- ئەو جێگەی کە هێورە
ئێمە لەوێدا دەتوانین بە دەر
لە بینایی
بحەسێینەوە
ئێمە دەبوایە ئێستا
چاوەکانمان دا‌بخەین
چاوەکانمان
چیتر کاتیان نییە
کە بە چاوی زەقەوە قسە بکەین
چاوەکانمان تا بڵێی زۆر
تا بڵێی زۆر و
زۆر خێرا دەخوازن و
لە زاری یەکتریشدا
هیچ نابیستین

چاوەکان دەبوایە
یەک بە یەک
لە هەوادا بن و
هێڵی سەرەکی
بە چاوەکان ببەخشن
ئۆی ئومێدە خڕەکان

ڕۆژێک دێت تۆ هەموو سندووقی قەڵەمەکان بە یەکەوە دەچەسپێنی
لە شەوێکدا کە هەموو،
گشت جیهان دەڕازێ
بێدار بەناو شەودا دەڕۆی و
بە دەستێکت
قەڵەمەکانی جیهان هەڵدەگریت.
لە سپێدەشدا
کەڵەشێرەکە زوو لە خەو بێدارم دەکاتەوە و
بێ وشە،
ئەوان ئێژن:
- هیچ وشەیەک...
دوای وشەکان تەواو دەبن و
بێدەنگ دەبێتە بێدەنگیی
هێندە بێدەنگ کە بێدەنگی دەتوانێ
خۆی ببینێ
(لێرەدا دەستەکان شتێکن و
لێگەڕێ ڕووبدات)

ئێمە دەبوایە خۆمان
گەلێ زۆر نیگەران بکردبایە
ئەوەی کە زۆرە
نابێ لە فرەییدا بیبینین
بە بێدەنگی بێدەنگ
بە بێدەنگیی
بە تەک ئاقاری خێرایی دەنگتەوە بگوزەرێ
وشەی بێدەنگ بە دیار دەکەوێ

نووسەر: شیعر

بڕوا ناکه‌م پشکۆی حه‌زم جارێکی تر
له‌ کوانوی به‌ر ڕه‌شمالی ئه‌وینی تۆ
له‌م کوێستانی غوربه‌ته‌دا گه‌شبێته‌وه
مادامێ وا
نامه‌یه‌کی چاو به‌ خوێنی دڵ پڕ گرین ‌
ساڵێک ته‌مه‌نی تێ په‌ڕی و
بۆ جارێکیش نه‌ت خوێنده‌وه
له‌ هه‌چ کات و شوێنێکدا بوو
که‌ گوێبیستی ده‌نگت ده‌بووم
هه‌ر ئاخ بوو ده‌بویه‌ ئۆخه‌ی
به‌ ئومێدی گوڵی سوور بووم
لیم وه‌ربگری و
له‌ یه‌خه‌ی جوانی خۆت بده‌ی
وام ده‌زانی
که‌ تۆم هه‌بێ له‌م ژیانه‌
هه‌رگیز ڕێ به‌ گریان ناده‌م
چاوانم به‌ ئه‌شک سوورکا
نیگاری جوانی ڕوخسارت
که‌ ساڵێکه‌ له‌ گلێنه‌م هه‌ڵ گرتوه‌
هێند به‌ ئاسان له‌ چاوانمدا ده‌ر بکا
کێ وه‌کو من
فه‌رشی دڵی بۆ پێشوازیت به‌ خه‌نده‌وه‌ بۆ ڕاخستی
کێ وه‌کو من
ساڵێ ته‌مه‌نی غوربه‌تی به‌ ته‌نافی چاوه‌ڕوانیتۆ هه‌ڵخستی
نامه‌یه‌کم نه‌ما تیایدا بۆت نه‌نێرم
حه‌سره‌ت و ژان ره‌نگی سپی ڕه‌ش نه‌کردبێ
خۆ شه‌وێکیش نه‌بوو ته‌نها سه‌ری کاسم
شاره‌ مێروله‌ی یادی تۆ نه‌یروژێنێ
هه‌تا به‌یان گڕ به‌رنه‌ده‌ن له‌ دوو پرچی تاریکی شه‌و
خه‌و له‌ چاوم ناتارێنن هه‌تاکو دوا قۆناخی شه‌و
ئێواره‌یه‌کی خه‌مگین بوو که‌ ناسیمیت ده‌روێش ئاسا له‌ زکردا
چاو به‌ته‌م و دڵ پڕ خه‌م بویت له‌ چیرۆکێکی کوێردا
‌ له‌شه‌وێکی زۆر خامۆشی دوور و درێژی نه‌بڕاوه‌ی
ماڵه‌ تاک و ته‌نهاکه‌مدا
ئولفه‌تم گرت به‌و هه‌ناسه‌ی
ده‌رچوو له‌ سینه‌ی پڕ ئاهت له‌ سیمی ته‌له‌فونمدا

ئه‌م ئێستاکه

بۆم ده‌نوسیت ئولفه‌ت به‌ منه‌وه‌ مه‌گره

چنگه‌ ڕنی له‌ کێوی بێستونم ببڕه

تازه‌ پاش چی؟
له‌م به‌هاری ته‌مه‌نه‌مدا
گه‌ڵایه‌کت به‌ شۆڕه‌بی به‌ژنی سه‌وزم نه‌هێشته‌وه
ساڵێکی پڕ چاوه‌ڕوانی و نیگه‌رانیم
حه‌سره‌تێکمه‌‌
قه‌ت له‌ مێژوت نابێته‌وه
لێت خۆش ده‌بم که‌هه‌ر نه‌تهێشت
له‌م فه سڵی گوڵ بارانه دا
گوڵێکی سوور یادگارمان بێت
خه‌ونی جوانی ئه‌رخه‌وانیم
له‌م ساڵی چاوه‌ڕوانیه‌مدا
پرشنگی نیگای حه‌زێکت
له‌ ئامێزی خۆی بگرێت
لێت خۆش ده‌بم کۆشکی ئاوه‌دانی دڵمت
به‌ ته‌نهایی و غوربه‌ت سپارد
ئاواتو حه‌زی یه‌ک ساڵه‌م
به‌ به‌رچاوی خه‌ڵک و خواوه
بۆ گۆڕێکی تاریکت نارد
لێت خۆش ده‌بم له‌جێ خه‌نده‌و سۆزی عه‌شقێ
درکه‌زیت له‌ نێو دڵم نا
ئه‌و نه‌مامه‌ت بڕیه‌وه به‌ ئه‌شکی سوری چاوانم
ئاوی چوار وه‌رزه‌ی ساڵیم دا
له‌ هه‌موو شتێکت خۆش ده‌بم
به‌ڵام هه‌رگیز
له‌ بێ مه‌یلی یه‌ک ساڵی ئه‌م چاوه‌ڕوانیه‌ت
قه‌ت خۆش نابم
‌ له‌ کوێوه‌ هاتی ؟ نازانم
چۆن به‌ بێ پرس ده‌روازه‌ی ئه‌م دڵه‌ شێته‌و
سه‌ره‌ جه‌نجاڵه‌مت کرده‌وه‌
چۆن وا ئاسان له‌ پایته‌ختی ئه‌م وێرانه‌م
ئه‌م که‌لاوه‌ چۆڵه‌وانیه‌م
بارگه‌و هه‌وارت خسته‌وه‌
خۆ ساڵانێ زۆره‌ گوڵم
گوڵه‌ سوره‌کانی ته‌مه‌ن

له‌به‌ر ڕه‌شابه‌ی غوربه‌تدا هه‌ڵوه‌رین بۆ دیدارێکت
من چیم هه‌بو بیده‌مه‌ تۆ؟
ته‌نها گریانی شه‌وانێ
یان دڵێکی وێرانه‌ ماڵ
لاشم ڕوون بوو نه‌ده‌بوونه‌ ساڕێژ که‌ری برینێکت
وه‌ک ده‌روێشێ له‌ وه‌سوه‌سه‌ی خه‌ڵوه‌تێکدا

له‌ ته‌کیه‌ی نیگایه‌کتدا زکرم ده‌کرد
هێند به‌ ئاسان ئه‌م ده‌روێشه‌ به‌ وه‌فایه‌ت
بۆ له‌ کۆڕو
له‌ خه‌ڵوه‌تی زیکری شه‌وانی ته‌کێیه‌ت کرد
ئه‌ی پێم ناڵێی ئه‌م ئێستاکه
‌ ئه‌و هه‌موو نه‌وره‌سی عیشقه‌م
له‌ ده‌ریای چاوه‌ سه وزه که ت بۆ چی تۆران؟
مه‌گه‌ر ئه‌م چاوانه‌ نه‌بوون
بۆ نه‌خۆشیو ئازارێکت
له‌سه‌ر چرپای هۆتێلێکی ئه‌م غوربه‌ته‌ت
له‌ دووره‌وه‌
سیروانێ ئه‌شکیان باران
چی به‌و یادگاریانه‌ ده‌ڵێ سه‌ره‌تای ئه‌وینێکمان بوو؟
ئه‌مئێستاکه‌ له‌ دڵ ڕه‌قی و له‌ بێ مه‌یلت
هه‌مووی سوتان
هه‌موو خه‌ونم هه‌ر بۆ تۆ بوو له‌هه ر چوار وه‌رز که ی ساڵدا
که‌چی یارێ
سه‌دجار که‌وتمه‌ شه‌رای مه‌رگ و
ئاوڕێکت لێ نه‌دامه‌وه‌
خه‌می فیراقی ئه‌م دوره‌یه‌ت
ده لێنێ*** ئه شکی پێ ڕشتم
بۆجارێکیش نه‌هاتی به‌ هانامه‌وه‌
گه‌ر پرشنگی چاوه‌کانت لێم گه‌ڕابا
گه‌ر هه‌ناسه‌ و سۆزی ده‌نگت نه‌بادابا
بۆ خۆم له‌به‌ر تاڤگه‌ی سپی ئه‌م عه‌شقه‌ سه‌رابیه‌ی تۆدا ده‌شۆرده‌وه‌
بۆ ڕابردوو ئاینده‌شم هه‌ر به‌ته‌نها به‌ قه‌ده‌ری ئه‌م ئه‌وینه‌ت ده‌به‌سته‌وه‌
هه‌موو شه‌وێ تا کازیوه‌ وه‌‌ک ناڵی له‌ غوربه‌ته‌وه‌
به‌ -با-ی سه‌با چه‌ند هۆنراوه‌و
نامه‌ی چاو به‌ خوێنم بۆت نارد
سه‌ر ئه‌نجامیش له‌جێ سۆزو وه‌فاو ئه‌وین
چاوه‌ڕوانیت وه‌ک خه‌زانێک تاڵه‌ تاڵه‌ قژی ڕه‌شمی
سپی سپی لێم هه‌ڵوه‌راند.