٢\٦\٢٠١٥

    لە کەرخی یارەوە!*

دارا خونچە

دیدەیەک..
لەسەر شووشەی پەنجەرەکەم خزیی
      تێڕامانم دنک دنک
                    داوەرینە نێو تارمایی
لێ هێشتاکەش..
چاوەکانم باش بڕ دەکەن؛
      دەتوانم
         پنتە رۆشنەکانی دوڕ شەوەزەنگ و
         تەلیسم و رازی پشت دیوارەکانیش
                                   ببینم!
      دەتوانم
         جوانییەکانی هندوڕ و**
                   هندوڕی جوانییەکانیش
                                  ببینم!
ئەوەی هەردەم
      لەسەر سەرم دەسووڕێنی و لوولم دەدا
      تەنێ ئەو جۆتە چاوانەن؛
         نە لە رامانم دەچنەوە
                 نە هەرگیز بیرم دەچنەوە!

رۆژانە لە رۆژ دەپارێمەوە
      تا دەرفەتەک وە شەو بدا و
                   خۆشی قیچەک بسێتەوە..
         خۆ ئەز هەمیشە ئاسوودەم
                 لە بن باری شەو بسرەوم
         چونکێ چاوانی
                 لە هەیوەشەوێ***
                          داگیریان کردم!
_________________________
* کەرخ: جێ، شوێن، وەک دەبێژن: ''لە چ کەرخەک؟'' واتە لە چ جێیەک؟ یان دەبێژن: ''کەرخت دیار بی'' واتە جوولە و بوونت دیار بی وەک شوێن.
** هندوڕ: نێو، ناخ، دەروون.
*** هەیوەشەو: مانگەشەو.

سەرەتای حوزەیرانی ٢٠١٥ - لەندەن
ماڵپه‌ڕی دارا خونچە