٢١\١١\٢٠٢٤

لەکەیەکی سوور.

جەلال قادر       

شیرینم لە ناو ئەو (پاس)ە ناسی کە هەفتەی جارێک یان مانگی جارێک لە زانکۆی بەغدا دەگەڕاینەوە بۆ شاری (کەرکووک).

ئەو لەبەشی زمانی عەرەبی دەیخوێند، منیش لە بەشی دەروونناسی. لەناو پاسەکە چەندینجار ئاخافتنێكی کورت دەکەوتە نێوانمانەوە. شیرینی کچێكی ئەندام وردیڵانەو چاو قڵەترێ و شەرمن بوو، هەمیشە مڵپێچێکی رەساسی خەت سپی و ناوازەو نازداری لە گەردنی دەبەسەت. منیش‌ لاوێکی ڕەشتاڵەی نەختۆکەک پیس و چڵکن بووم. ماڵی شیرین لە گەڕەکی تەپە بوو، ماڵێ ئێـمەش کەوتبووە ناو خانووە قوڕەکانی گەڕەکی شۆریجە، لە کۆڵانی ڕەشیدئاوا.

ئێوارەکیان لە بەغدا دەگەڕاینەوە، ڕۆژی پێنج شەمە بوو، هێشتا خۆر ئاوا نەبووبوو. نزیک بە شارۆچکەی (خالس) پێدەچوو شوفێری ئۆتۆبوسەکەمان خەوی لێکەوتبێت، لەسەر جادە قیرتاوەکە لایدا و سووکانی لەدەست دەرچوو. پاسەکە کەوتە ناو دۆلێکەوە، زۆربەی موسافرەکان سەروگوێڵاکیان شکاو برینداربوون.

منیش لووتم بەر کورسییەکەی بەردەمم کەوتو خوێنی ڵێبەربوو. ئاوڕێکم بۆ لای شیرین دایەوە، بینیم ئەو تەندروستی باشە و خەمنی منیەتی. مڵپێچەکەی لە مڵی کردەوە خستیە سەر لووتم تا بەر لە خوێنڕژان بگرێت. لووتم ئاوسابوو، ئازارێكی زۆری هەبوو، بەس لەشەرما دانم بەخۆمدا گرتبوو.

لەپاش پانزە خوولەکێک کە سەرجەم موسافرەکا هەریەک لەلایەک و بەسەروڕووخساری زامارەوە بەسەر زەوی پاڵکەوتبووین. شوفێرەکە بە شەڵە شەڵ بەسەرماندا دەسووڕایاوە و دڵنەوایی دەداینەوە. گوێم لێبوو نەفەرێک دەیگوت : ئەلحەمدولا سەلامەتین…

وردە وردە گەشتیارو ئۆتۆمبیلەکانی خەتی ڕێگاوبان فریامان کەوتن. ئەو ئۆتۆمبیلانەی بەرەو بەغدا دەچوون چەند بریندارو موسافرێکیان لەگەل خۆیان گواستەوە.

خۆرئاوابوو، دونیا تاریک داهات، بۆ بەدبەختی ئێمە ئۆتۆمبیلێک نەبوو بەرەو کەرکووک بگەڕێتەوە. شیرین دەیگوت : ئێستا خەمی دایکمە، چاوەڕووانمە و نیگەرانە.
دوا جار قەمەرەیەکی سپی بەرزایلی ڕایگرت و گوتی: فەرموون، سواربن من دەتانگەیەنمەوە کەرکووک.
لە ڕێگا بە شیرینم گوت: لەگەلتا دێم تا بەردەرگەی ماڵتان بۆئەوەی دایک و باوکت دڵنیابن کە ئێمە تووشی ڕووداو هاتووین.
شیرین بە بزەخەندەیەکەوە گوتی: دەزانیت باسی تۆم کردووە لای دایک و باوکم.
- بەڕاستە، بۆچی؟
+ هەر حەزمکرد کە دایک و باوکم دڵنیابن کە لەو ڕێگایە هەمیشە چەند لاوێکی کوردم لەگەڵدایە.

بەهەربار، کاتژمێر نۆی شەو گەیشتینە سەر کۆلانەکەی ماڵی شیرین، بینیمان دایک و باوکی لەبەردەم دەرگا ڕاوەستاون.

شوفێرەکە ڕووی دەمی لەمن کرد و گوتی: پێویست ناکات تۆ دابەزی، تۆش دەگەینمەوە ماڵ.
- سوپاس، ماڵت ئاوابێت، من ئەمشەو لێرە دەمێنمەوە.

ڕاستی من نەمویست چیتر شوفێرەکە ئەزێت بەم، چونکە هەرچەند هەوڵماندا پارەی کرێی لێوەرنەگرتین.

لەپاش ئەوەی بەسەرهاتەکەمان بۆ دایک و باوکی شیرین گێڕایەوە، گوتیان: ئێمە خەمی تۆمانە لووتت ئاوساوە پێویستە بچیت بۆ نەخۆشخانە تیمارت کەن.
لەم قسانەدا بووین (سەردار) برای شیرین بە تویۆتایەکی کۆرۆنا لەبەردەم ماڵ ڕایگرت و هاتە حەوشە، لەپاش هەواڵپرسین گوتی: ئێستا منیش لە نەقلیاتی بەغدا لە شوفێرەکانی خەتم پرسی گوتیان ڕووداوێک بەسەر ئۆتۆبیسێکی خەت هاتووە. یەکسەر هەستمکرد شیرینی خوشکم لەناو ئەو ڕووداوەبێت.
بەهەرحال، براکەی شیرین منی گەیاندە نەخۆشخانەی (کۆماری)، پەرستارەکان بەخێرایی برینەکانی سەر لووتیان پێچاو گوتیان پێناچێت شکابێت، بەلام ئەگەر کاتت بوو سبەینێ بگەڕێوە سکرینی دەکەین.

تا نیوە شەو سەردار برای شیرین بەردەوام لەگەلمابوو. لە ڕێگا کە بەرەو ماڵ دەگەڕاینەوە، گوتم: ڕاستی نازانم چۆنچۆنی سوپاسی تۆ بکەم!
سەردار دەستی خستە سەرشانم و گوتی: بە پێچەوانەوە، ئێمە سوپاست دەکەین، کە هەموو جارێک لەگەڵ شیرین خوشکم دەگەڕێیتەوە و چاوت لێدەبێت. تەنانەت ئەمڕۆ شیرین کە لە گەڕانەوە دواکەوت، باوکم دەیگوت؛ ئەگەر ئەو کوڕە شۆڕیجەیی لەگەڵدابێت، خەمم نییە.
پێشئەوەی کۆتایی بەم بەسەرهاتەم بهێنم، حەزدەکەم پێتان بێژم کە مڵپێچەکەی شیرینم بەردەوام بەدەستەوەبوو. لەماڵ چەندیجار دایکم بەدەستەکانی خۆی شۆری و گوتی: کوڕی خۆم، چەند هەوڵدەدەم ناتوانم شوێنی خوێنەکە لێبکەمەوە.
بۆ هەفتەی داهاتوو، مڵپێچەکەم خستبووە ناو زەرفێکەوە لە حانووتی زانکۆ شیرینم بینی و پێمگوت: ببورە، مڵپێچەکەت شوێن دڵۆپە خێنەکانی لووتمی پێوە ڵکاوە ، چەندیجار دایکم بەدەست شۆری نەیتوانی لێیبکاتەوە.
شیرین چاو پڕ لەگریان و بە ڕووخۆشی و پێکەنینەوە گوتی: پێدەچیت ئەو مڵپێچە ببێت بە لەکەیەکی سوور بۆ یادگارییەکانی ژیانم. چونکە چوارساڵ لەمەوبەر کوڕێک لە گەڕەک کە زۆرم خۆشدەویست، بە دیاری بۆی هێنام، ئەویش بە یەکجاری بەجێی هێشتم. ئێستاش دەبێت دڵۆپە خوێنەکانی تۆ لە گەردنم بئاڵێنم.
بەنەرمی نووکی قامکی دەستم نا بەسەرشانیاو گوتم: دڵگران مەبە، هەر یەک لە ئێمە لەکەیەکی سووری بە روحەوە نووساوە. بەس بەڕاستی ئەو مڵپێچە بە گەردنی تۆوە زۆر جوانە!

ماڵپه‌ڕی جه‌لال قادر