|
٢٦\٦\٢٠٢١
لە پاش سزادانەوەی
بەندکراوانی بادینان
پێویستە مەکۆی ''دادوەریی ئازاد'' دابمەزرێندرێ!
دارا خونچە
 جێبەجێکردن
و سەروەریی یاسایەکان و دەستوور لە هەموو وڵاتان (هەر یەکەو بە جۆرێک)
تەنیا بۆ بەرزەفتکردن و سزادانی چەوساوان و ئازادییخوازانە.. لە وڵاتە
بە ناو پێشکەوتووەکانیش هەژموونی سەروەریی یاسایەکان هەر ئەوەیە کە لە
سەرەتا و بەر لە هەموو شتێک پارێزەری کارە چەوسێنەرییەکانی دەسەڵات و
تاک بە تاکی دەسەلاتداران بێ.. ئەوجا پاشان کەمێک ماف و ئازادیی سادە و
سەرەتایی بۆ هاوڵاتییان دابین دەکا بەڵام لە (مەمرە و مەژی) تێناپەڕێ و
هاوکاتیش بە دەستکەوتی تێکۆشانی حیزبەکان و دەسەڵاتداران دەیفرۆشنەوە.
بەڵام لە کوردستان لەبەرئەوەی چەند بنەماڵەیەکی خێلەکی-مافیایی
دەسەڵاتدارن؛ ئەوە هیچ کە دەستوور نییە و هەر کاتێک تێیاندەگیرێ پەنا
دەبەنەوە بەر دەستوور و یاسایەکانی حکومەتی داگیرکەر و رەگەزپەرستیی-
دینیی ئێستای ئێراق و سەردەمی سەدامی دیکتاتۆر کە بە شەمەندەفەری
رۆژئاواییەکان گەیشتە ئێراق و هەر خۆشیان لەنێویانبرد.. یاسایەکانیشیان
هەر لە بنەڕەتەوە کۆمەڵە دەقێکی پلاستیکیی و رووکەش و زۆر
دواکەوتووانەن چونکە راستەوخۆ و بە پلەی سەرەکیی بە پێی شەریعەتی دین و
خواستی سەرۆک خێلەکان و نێرسالاریی و دابونەریتە داڕزاوەکان داڕێژدراون
و هەندێک دامودەزگەی بە ناو داد و دادگە و دادگەریی و کۆمەڵە
فەرمانبەرێکی ملکەچ و بەکرێگیراوی کەسانی نێو دەسەڵاتیان بە ناوی
دادوەر و پارێزەر و داواکاری گشتیی بۆ دامەزراندوون.
هەر بۆیە ئەو یاسایە پەڕپووتانە نەک هەر ناتوانن هیچ لێپێچینەوەیەک لە
دز و گەندەڵکاران و سەرکوتکەرانی ئازادییەکان و ژنکوژان و کەسانی لەو
بابەتانە بکەن بەڵکە ئەگەر جاروبارێکیش بۆ لەخشتەبردنی رای گشتیی
هەندێک کەسی سووچبار لەوانە بگرن ئەوە هەر زووبەزوو هەندێک لەو
دەسەڵاتدارانەی هاوبەش و هاوکارن لە تاوانەکان دێنە سەر هێڵ و زۆر بە
ئاسانیی بەرەڵایان دەکەن و دیسان بەرینادەدەنەوە گیانی خەڵک! ئیدی
ئێستا زۆر ئاساییە ئەو دەسەڵاتە بە ناو دادەوەرییەی کوردستان دووبارە
سزای ٦ ساڵ زیندانیی بەسەر بەندکراوانی بادیناندا بچەسپێنێتەوە و لە
داهاتووشدا لەوە خراپتری لێبوەشێتەوە.
ئەوەی گرنگە لێرەدا ئاماژەی پێبدەین ئەوەیە پێوستە ئێستا خەڵکی
کوردستان تەواو لەوە دڵنیابێتەوە کە سەرجەمی یاسایەکان و دامودەزگە
دادوەرییەکان بە تێکڕای دادوەران و فەرمانبەرانی دیکەیانەوە ناوگەلێکی
رووکەش و بێ نێوەرۆکن و تەنیا لە پێناو بەرزەفتکردن و سزادانی
ئازادییخوازان و یەکسانییخوازان دەمەزراون، خۆ ئەگەر کۆمەڵێک دادوەر و
داواکاری گشتیی و پارێزەر و یاساناسیش هەن و بانگەشەی ئەوە دەکەن کە
ئەوان ئازادییخوازن و دەیانەوێ دادگە و دادوەریی بێلایەن بێ بەڵام
دەسەڵاتداران رێیان پێنادەن ئازادانە کارەکانی خۆیان بکەن.. ئەگەر
راستدەکەن با دەست لە کارەکانیان بکێشنەوە و بە هاوکاریی لەگەڵ
ئازادییخوازانی دوور لە دەسەڵاتداران لە نووسەران و رۆژنامەنووسان و
چالاکوانانی چین و توێژەکانی کۆمەڵ یەکبگرن و لە دەرەوەی دامودەزگەکانی
دەسەڵاتداران مەکۆیەک بۆ (دادوەریی ئازاد) بە نهێنیی یان لە هەندەران
دابمەزرێنن و بەرانگژی ئەو نادادیی و پێشێلکارییانەی سەر ماف و
ئازادییەکان ببنەوە!
٢٦\٦\٢٠٢١
ماڵپه‌ڕی دارا
خونچە
|
