|
٢٢\١١\٢٠١٧
لە پەراوێزی مردنی
(مام جەلال)دا.
عامر سابیر
جەلال تاڵەبانی سەرۆکێکی کاریزماتیک و بە ئۆتۆریتەی بزووتنەوەکەی خۆی
بوو. سەرکردەیەکی لێھاتووی ناسیۆنالیزمی دواکەوتووی کورد بوو، ئەو لە
٣ی ئۆکتۆبەری ٢٠١٧دا ژیانی کۆتایی پێھات.
ئەو لە سایەی ٢٦ ساڵی دەسەڵاتی گەندەڵ و سەپێندراویدا، لە ھیچەوە بوو
بە ملیاردێر. ئەم ملیاردێرە نووێنەری چینی سەرمایەداری کوردستان و
پارێزەری بەرژەوەندییەکانی بۆرژوازی کورد بوو. خۆی و خانەوادەکەی لە
سایەی گەندەڵی و تاڵانیدا بوونەتە بلوێنێر.
ئەو کەسێکی ئۆپۆرتۆنیست بوو، ڕۆژگار و بەرژەوەندییەکانی چی بخواستایە،
ئەوە بوو. سەردەمێک چەپ و مارکیسیست بوو، وە نامیلکەی (ماتریالیزمی
دیالەکتیک)ی وەردەگێڕایە سەرزمانی کوردی. سەردەمێکی تر شانازی بەوەوە
دەکات کە نازناوی ئایەتوڵا تاڵەبانی بۆ دادەندرێت پاش ئەوەی کە سەردانی
گۆڕی خومەینی ئەکات و فرمێسکی بۆ دەڕێژێ و بە باشترین دۆستی خەڵکی
کوردستان وەسفی دەکات.
تاڵەبانی لە لای دۆستانی ئەوروپای خۆی بە دیموکراتیک پیشان ئەدات،
بەڵام لە کوردستان لەگەڵ مەسعودی ھاوچینیدا دەسەڵاتێکی کۆنەپەرست و
خێڵەکی و عەشایەری و میلیشیایی ئەسەپێنن. ئەو کەسێکی ھەلپەرست و دووڕوو
بوو، لە ساڵی ٢٠٠٠دا پیلانی تیرۆرکردنی ئەندامانی حیزبی کۆمۆنیستی
کرێکاری دادەڕێژێ و ئەیداتە دەست نەوشیروان مستەفا و مەکتەبی
سیاسیییەکەی تا بۆی جێبەجێ بکەن. بەڵام لە ساڵی ٢٠٠٦دا گێچی پاراستنی
مافی مرۆڤی بەرزدەبێتەوە و ئەڵی من ئەندامی (ئەمنستی ئینتەرناشناڵ)م و
ئیمزا بۆ لە سێدارەدانی سەدام ناکەم.
تاڵەبانی لەو شوێنانەی بە پێویستی ئەزانی، خۆی بە پێشکەوتووخواز و
سۆشیال دیموکرات وەسف ئەکات. لە کاتی تریشدا مەلا عەلی بزووتنەوەی
ئیسلامی سەرسام دەکات و ئەچێتە دوایەوە نوێژدەکات، یان خامی سپی لە خۆ
دەپێچێت و دەچێت بۆ مەکە بۆ عەمرە.
تاڵەبانی و حیزبەکەیلە کاتێکدا کە بڕیاری ھەڵوەشانەوەی یاسای فرە ژنی
ئەدات، بەڵام ئەندامانی سەرکرایەتی و کادیرانی حیزبەکەی ژنی دووەم و
سێھەم ئەھێنن و تاڵەبانی بێدەنگە. تاڵەبانی ئەچێتە مەراسیمی ٨ی مارس و
باسی مافی یەکسانی ژن و پیاو ئەکات. بەڵام لیستی ژنانی تیرۆرکراو و بی
مافی ژنان لە سایەی دەسەڵاتی عەشایەری و ئیسلامیاندا ھەر لە
ھەڵکشاندایە. تاڵەبانی یەکێکە لە تاوانبارانی شەررێ ناوخۆ لە شار و لە
شاخ، بە ناڕاستەوخۆیی تاوانبارە لە کارەساتی کیمیابارانی ھەڵەبجەدا و
ئەنفالدا.
تاڵەبانی ھەموو کات بە ناوی ھەموو خەڵکی کوردستانەوە قسەی ئەکرد، بەڵام
ھەردەم ئەو کەسانەی کە ئەیکردە سوتەمەنی شۆڕشە نوێکەی لە شاخ، وە
پاراستن و چەرخاندنی دەسەڵاتی گەندەڵی لە شار، بەردەوام کرێکاران و
ھەژاران بوونە کە بە کوشتی داوان لە پێناو بەرژەوەندی خۆیدا. تاڵەبانی
کە دەسەڵاتی میلیشیایی ئەسەپێنێ، لە سایەی تاڵانیدا خۆی و سەرانی
حیزبەکەی ئەبنە بلوێنێر. بەڵام کرێکاران بێ ماف و ھەژاران بەشخوراو
ئەکات، فەرمانبەران بێ مووچە و مامۆستایانزەلیل وکاسبکاران و بێکاران
بێ ئیرادە ئەکات. لە بەرانبەریشدا لە سایەی دەسەڵاتی
ڕەشیداسەرمایەداران و چاوچنۆکان تاڵانی زیاتر ئەبەن و سەرمایەی زیاتر
کەڵەکە ئەکەن.
کە نەوشیروان مستەفای ملوێنێر و قوتابی قوتابخانەکەی تاڵەبانی لە ١٩ی
مەی ٢٠١٧دا مرد. زۆر لە کرێکارانی ساویلکە و ھەژارانی ناھوشیار و ھەندێ
نووسەری گەمژە و دەربار، بە باوکی ھەژاران وەسفیان کرد و سەریان بۆ لە
قوڕ نا. کە تاڵەبانی مرد، زۆر لە فەرمانبەرانی بێ مووچە و ھەژارانی
نەگبەت و بێ ماف و بێ ئیرادەکراو شین و شەپۆڕیان گێڕا. ئەی ئەگەر سبەی
گەورە تاوانبار و گەورە تاڵانکاری کوردستان، مەسعود بارزانی بمرێ، ئەبێ
ھەژاران و مافخوراوانی ساویلکەی ئەم وڵاتە چێ بۆ بکەن؟
١٧\١١\٢٠١٧
ماڵپه‌ڕی عامر سابیر
|
