٣٠\٦\٢٠١٧

  لە پرسەی (نا)دا.

نەژاد عەزیز سورمێ

گۆری دوور لە مەرگ..
پەنجەرەی کراوەمان، بەسەر باپێوی
وڵاتی بە مردن تێر و بەشتی تر ناشتا
ئامرازی پاکەوانەکان...

گوڵئەندام،
لە پاڵ ئەوەی من و تۆ دەیزانین
ترسم لە ئاوی پەنگاوە...
لەم ڕێیەدا، کە زیاتر لە ئاوەڕۆیەکان دەچێ،
ترسم لە تیغی تازە ساوە..
لە چەپڵەی گەرمی ڕەعیەت..

لە کۆڵانە ڕووتەکانەوە بەرەو پەرستگا،
منداڵیی نیشتیمان و
نیشتیمانی منداڵیمان ھەڵواسیوە ...
بوونەوەری ڕەنگ داپچکوڕاوی
چاو زیت و کەمۆ،
لە کەندووی بەتاڵ ئەکەن
سێ وەختەی ڕۆژێ بۆش
کاسەی سمتیان داوەتە بەرخۆر...

گۆڕی دوور لە مەرگ
ئاسوودەییەک لە پێدەشتی چاونزیی و
بەدکریڤی و
تژی خۆھەڵخستن..
تەنگەڵانێکی بێ ھاوتا..
زڵکاوێکی خومار..
لە کۆڵانە ڕووتەکانەوە بەرەو پەرستگا
منداڵیی نیشتیمان و
نیشتیمانی منداڵیمان ھەڵواسیوە...

تەمووزی ١٩٩٦
ماڵپەڕی نەژاد عەزیز سورمێ