٢\٥\٢٠٢١

لەرزوتای بەها.

ئەرسەلان مەحمود    

شەن و شرۆڤە کردنی دۆخی هەرێم و عیراق، کوتانەوەی ئاسنە ساردەکەو جۆرە هەرە خراپەکەی بێهودەییە، دەوڵەتانی ناوچەکەو ئەمریکا شەڕیانە لەسەر عیراق، خودی سەرکردە عیراقی و عیراقیەکان خۆیان نەبێت، دنیا چاوی لەسەر بونیادنانەوەی پێگەی کوردو هەرێمەکەیەتی، سەرکردە کوردو کوردەکان خۆیان نەبێت!!

ئەم وڵاتە، بووە بەمەیدانی تەراتێن و پەلاماری گورگە بۆرەکان، بووە بەگۆڕەپانی دێوەزمە ڕەشەکانی ئەم دیوو سنوری نزیک و دور، بووە بەبازاڕی ساغکردنەوەو هەڕاجکردنی شتە کۆنەکان، بووە بەناوەندی ململانێی تائیفی و پێکدادانی مەزهەبەکان، بووە بەنیشتمانی بێکاری و بێئیشەکان، عیراق لەو خاک و ناچەیە دەچێ پێیدەگوترێ الأعراف، بەجۆرێ نەلەخۆیدا هەیە شانازی پێوە بکاو نەلەدەرەوەی خۆیشیدا هەن خۆزگە بەپێگەو جێگەو حاڵوئەحواڵی بخوازن، بەها لەپێکهاتە گشتییە مرۆییە کوردی و عیراقییەکەدا، بــووە بەڕشتەیەکی بازاڕی و دراوی، ڕۆژانە هاڕەیەتی!!

ئەگەر هەبێ دور لەجوینەوەی تەبلیغات و بانگەوازە کۆنەکان بیەوێ چارەسەرێکی ڕیشەیی بهێنێتە ئاراوەو لەڕێگەیەوە بۆتا هەتایە بەر بەم پەتا نیشتمانی و لەرزوتای بەها مرۆیی و جڤاکییە کوردی و عیراقییە بگرێ، دەبێ لەبری گەمەی هەڵبژاردن و هێنانە ئاراوەی گۆڕانکاری ڕواڵەتی، پەنا بەرێتە بەر هێنانە ئاراوەی گۆڕانکاری ڕیشەیی لەفۆڕمدا، بکەوێتە کارکردنی دامــەزراوەیی و ڕێکــخراو لەڕێگەی بەکۆمەڵایەتی کردنی ناوخۆیی و لۆبیکاری لەپێناو دەستەبەر کردنی پشتیوانی دەولی بۆ پرس و کەیسەکە، تا لەجێگەی ئەم فەزاو فەوزا هەمەکیەدا دواجار کۆنفیدڕالیزمی پێکهاتەیی بکات بەجێگرەوە.

رزگاری نابێ ئەم وڵاتە، دەربازی نابێ ئەم خەڵکە، تا هێزی بەرەنگار بونەوەی ئەم فەرهەنگ و ئەم عەقلیەتە کۆمەڵایەتی و سیاسیە ماوەیی خوازو زاڵە نەڕسکێ و نەشونما نەکات لەگۆشە بەگۆشەی ئەم خاک و تاک بەتاکی یەکە پێکهێنەرە مرۆییەکەیدا. دیارە ئەوەی لەمپەرە تیرەو هۆزو خێڵگەراکانن، سوننەتی و مەزهەبی و جڤاکگەراکانن، سەرۆک و سەرکردەو جڵەو بەدەستە جڤاکی و حزبی و یەکبەیەکی حزبەکانن، ئاڵەنگاری هەرێمایەتی و دەولی و قەومچییەکانن، ڕێ لەبەشەقام و جەماوەری بوونی ئەم فەرهەنگ و ئەلتەرناییڤە رزگاری و دەربازە نیشتمانی و مرۆییە کوردی و عیراقیە دەگرن!!

بەدڵنیاییەوە تێپەڕاندنی ئەم بەربەست و ئاستەنگە ڕەقانە، ئاسان نیە، بەڵام مەحاڵ و ئەستەم یا کارێکیش نیە لەکران نەهاتوو بێت، مەهام و ئامانجی ئەو کەمینە حاکم و حاکمیەتە نەزۆک و لەرزۆکەی هەموانی بەخۆیەوە مەشغوڵ کردوە، هەر جارەو بەجۆرێ، هەر ڕۆژەو بەشێوازێ دیارە، بۆ ئەوەیانە شەقام و ئەم خەڵکە غافڵگیر تر بکەن و بواری بێدار بوونەوەیان لەبەردەمدا نەهێڵێنەوە.

نەخێر لەسەروی هەر ئامانجێکیانەوە بۆ ئەوەیانە، دیالۆکی میللی و جەماوەری و جڤاکی نەیەتە ئاراوە، بەڵام کێشەو ئاریشە نیشتمانی و مرۆییەکەی گەلانی عیراق، ئەزەلی و ئاسمانی نین، تا هەتا سەر بتوانن ئاوا دڵخوازانە خەڵکەکەی شەتەک بدەنە مەزهەب و جەدەلە لاوەکی و دینیەکان، ئەمەی وایکردوە شاو گەدا، مەلاو مامۆستا، گوێگرو قسەکار، ببنە موفتی و ببنە پاسەوانی شەرەف لەوانی دی، ئەوا دەسەڵاتە، ئەم حاکم و حاکمییەتە نەفرەتاوییە کوردی و عیراقییە شەیداگەرەی پوچگەراییەن.

ماڵپه‌ڕی ئه‌رسه‌لان مه‌حمود