٢٢\٤\٢٠١٦
لە سالڤەگەڕی ١١٨
ساڵەی رۆژنامەگەریی کوردی.
لەو قۆناغەدا تانەوتەشەر و سووكایەتی پێكردن یەكێك بووە لە خەسڵەتە هەرە دیارەكانی رۆژنامەگەری و راگەیاندنی كوردی، دوای هێوربوونەوەی رەوشی شەڕ و بەرقەرار بوونی ئاشتی ،لەو نێوانەدا سەبارەت بە هەبوونی جۆرە پەراوێزێكی ئازادی (دیاركراو) و كەشێكی تارادەیەک نیمچە دیموكراسی چەندین كەنالی میدیایی سێبەر لەڵایەن حیزبەكانی گۆڕەپانی سیاسی كوردستان دروستبوون ، هەڵبەت لەرووی ژمارەوە نەك جۆرەوە ئەگەر چی ئەم كەناڵانە لەڵایەن حیزب و رێكخراوە سیاسییەكانەوە قۆرخ كران. نەیانهێشت دەرفەتێك بۆ میدیای ئازاد و ئەهلی فەراهەم بكەن و رێگا خۆشبكەن تا رۆژنامەو گۆڤار و رادیۆو تەلەفزیۆنی ئەهلی نەك ئەوانەش بەناوی كەناڵی میدیای ئەهلی و ئازاد مۆڵەتیان پێدرا ، بەڵام لەڕاستیدا ژێر بەژێر لەڵایەن حیزب و حكوومەتی دەسەڵاتدارەوە لەرووی دارایی و سیاسییەوە پشتگیریان لێدەكرێ، تا كەناڵە ئەهلییەكان بتوانن لەڕێگای خۆیانەوە گوزارش لەرای گشتی و خواستی كۆمەڵانی خەڵك بكەن و زۆربەی رۆشنبیرانی دەرەوەی حیزبی دەسەڵات بەشداری دیالۆگەكانی لەمەڕ دیموكراسیەت و گرفتە هەنووكەییەكانی خەڵكی كوردستان بكەن (کام دیالۆگ..)، كە ئەمەشیان یەكێكە لە پرەنسیپەكانی پراكتیزەكردنی چەمكەكانی دیموكراسی و راپەڕاندنی ئەركە هەنووكەییەكانی كۆمەڵگای مەدەنی كە ساڵانێكە میدیای حیزب و دەسەڵاتی كوردی لەسەر ئاستی ناوەوەو دەرەوەی كوردستاندا بانگەشەی بۆ دەكات وا لەڕای گشتی رادەگەیەنێ كە كوردستان كۆمەڵگایەكی مەدەنی و سیستەمی حكومڕانییەكەش دیموكراسییەكی بێ وێنەیە لەناوچەكەدا کە لاواری پراکتیکیدا نەک هەر وا نەبوو بەڵکو گاڵتەجارییەکی بێوێنەی لێدەرچوو، ئایا بەراست خەڵك بێ جیاوازی ئینتیمای سیاسی و ئایدیۆلۆژی بۆی هەیە راشكاوانە گوزارش لەڕاوبۆچوونەكانیان بكەن و داكۆكی لە مافەكانی مرۆڤی و ئازادی چاپەمەنی و بڵاوكردنەوەو راگەیاندن بكەن ،بۆیە ئێمە كاتێ كە باسی میدیایەكی ئازاد و سەربەخۆ دەكەین لەكاتێكدا میدیای ئازاد و سەربەخۆ لە كوردستاندا بوونی نییە.
هەق وایە كەناڵە حیزبی و حكوومییەكان زێتر دەرفەت بە رۆشنبیرانی ئازاد و سەربەخۆ بدەن ، کەلە راستیدا ناتوانن بیدەن. تا باس لە مەسەلە چارەنووسسازەكان بكەن كە پەیوەستن بەژیانی سەرجەمی خەڵكی كوردستان و چارەنووسی هاوبەشیان لەومیانەدا ئاڵوگۆڕی بەردەوامی جیاوازی ئەو وتووێژە بەرفراوانەی خەڵك و رۆشنبیرانی بیروڕا جیاواز ،پێموایە زێتر خزمەت بەڕەوشی سیاسی و کولتووری كوردستان دەگەیەنێت نەك بەپێچەوانە كە مخابن هەتا ئێستا راگەیاندنی كوردی لەڵایەن چەند کادیرێکی دۆگمای حیزبیەوە قۆرخ كراون و سەكۆیەكانیش دەربڕینیان هەر تەنها بۆ خۆیان قۆرخ كردووە .هەنووكە كاتی ئەوەش هاتووە تەلیەمی ئەم قۆرخكردنە وردوخاش بكرێ و دەروازەیەكی واڵا بخرێتە بەردەم رووناكبیران و رۆژنامەنووسانی دیكەی كوردستان ئەویش بەمەبەستی زێتر خزمەتكردنی پڕۆسەی راگەیاندنێكی دروست و تەواوكردنی پڕۆسەی دیموكراسی. ____________________________ * سەرۆکی رێکخراوی خانی بۆ لێکۆڵینەوەی هزریی.
هەولێر - باشوری کوردستان
|