|
٨\٣\٢٠١٢
لە یادی ھەشتی
مارسدا.
ئەمساڵ لە کاتێکدا یادی ھەشتی مارس دەکرێتەوە، کە ساڵی ڕابردوودا
شەپۆلێک لە خۆپێشاندان، ناڕەزایەتی دەربڕین و شۆڕش بەشێک لە وڵاتانی
خۆرھەڵاتی ناوەڕاستی گرتەوە، و چەند سەرۆکێکی دکتاتۆری سەرمایەیان
وەلانا.
بەڵام لەو نێوەدا دژە شۆڕش بۆ سەرکوت و لەباربردنی شۆڕش، بۆ ھێشتنەوەی
ڕژێمەکان پاش وەلانانی سەرانی دەوڵەتی، توانی خۆی کۆبکاتەوە لە شکڵی
ھاوپەیمانیەتی دامەزراوەی سەربازی ئەو وڵاتانە لەگەڵ بزوتنەوەی ئیسلامی
سیاسی بەھاوکاری لیبراڵەکان و دەستخۆشانەی وڵاتانی ئیمپریالیستی
ڕۆژئاوا.
ھەوڵدان بۆ کردنی شەریعەتی ئیسلام بە دەستور و یاساو ڕێسا، ھەروەھا
داسەپاندنی یاسای دژە ژنی ئیسلامی و زیندووکردنەوەی فەرھەنگ و
دابونەریتی دواکەوتوانەی ئایینی، ھەر لەو وڵاتانەدا کە ساڵی پار بە
بارودۆخی شۆرشگێڕانەدا تێپەڕیون، ئەمانە پێشەنگی ھەڵمەت و دەستوەشاندنی
دژەشۆڕشی بورژوازیە بۆسەر ماف و ئازادیەکانی تەواوی ھاوڵاتیان. ئەوەی
کە چاوەڕوانی زوربەی کۆمەڵە لە کرێکاران و زەحەمەتکێشان و ئازادیخوازان،
بەتایبەت لە وڵاتانی ڕۆژھەڵاتی ناوەڕاستدا، ھەر لە ئێستادا لە بێ ماف
کردن و پلەدوو کردنی پایەی کۆمەڵایەتی نیوەی کۆمەڵدا کە ژنانن
دەبیندرێت.
ئاسۆیەک کە سندوقی دراوی نێودەوڵەتی بەھاوکاری گۆپاڵی "ناتۆ" و ھەر سێ
ڕەوتی ئیسلامی سیاسی، دامەزراوەی سەربازی و لیبراڵەکانی ئەو وڵاتانە
خەریکی داسەپاندنین بەسەر جەماوەری ناڕازایدا، ھەر ئەوەی لێ چاوەڕوان
دەکرێت کە ئێستا پێشەکیەکەی بە فشار بۆ سەر ژنان و بێ مافکردنیان دەستی
پێکردوە.
دیاری کردنی ھەشتی مارس وەک ڕۆژی خەبات لە پێناو یەکسانیدا، بەرھەمی
ئینتەرناسیونالی دووەم و پێشڕەوی کۆمۆنیزمی مارکس بوو لەدەرونی
بزوتنەوەی کرێکاریدا لە کۆتایی سەدەی نۆزدە و سەرەتای سەدەی بیستەمدا.
ئەمڕۆژە لەسەر پێشنیاری ھەڵسوڕاوی کۆمۆنیستی ئەڵمانی و ئەندامی
ئینتەناسیوناڵی دووەم کلارا زتکین دیاری کراوە. بە درێژایی مێژووی
سەدەی ڕابردووش ئەوە کۆمۆنیستەکان، بزوتنەوە کرێکاری و سۆشیالیستیەکانی
جیھان بوون کە پەرچەمداری ئازادی و یەکسانی ئینسانەکان بوون.
پێشڕەوی بزوتنەوەی ئازادیخوازانە و ڕزگاریبەخشی ژنان، ھەروەھا
بەدەستھێنانی ماف و ئازادیەکانی ژنان و یەکسانی ژنان و پیاوان، لە
بنەڕەتدا بەستراوەتەوە بە پەرەداربوونی ئاسۆی ڕزگاریبەخشی سۆشیالیستی
بەسەر ئەو بزوتنەوە و لێکھەڵپێکانی بە بزوتنەوەی کرێکاری و کۆمۆنیستی
لەھەر وڵاتێکدا.
یادی ھەشتی مارس وەبیر ھێناوەی ئەو ڕاستیە مێژوویانەیە تا ببێتە
پاڵنەرێک بۆ ھەرچی چالاکبون و پەرەدارکردنی ئاسۆی ڕزگاریبەخشی
سۆشیالیستی لە بزوتنەوەی ئازادیخواز و ڕزگاری ژناندا.
رەوەندی
سۆشیالیستی کرێکاریی
rewend.info@googlemail.com
|
