لیستی ڕەش بۆ ڕۆشنبیران و ئازادیخوازان !!

یان بۆ ئەو دەسەڵات و دام و دەزگایانەی سەرکوتی ئازادی دەکەن .

رێبین فاروق       

دووابەدوای ڕێکەوتنی ستراتیژی یەکێتی و پارتی لێرەو لەوێ باس باسی لیستی ڕەشە بۆ ڕۆشنیران و ئازادیخوازان ، کەگوایە ئەم لیستە ڕەشەی دەسەڵاتی ناسیۆنالیزمی کوردی ئەوکەسانە دەگرێتەوە کە بەزمانی زبر دەنوسن و دەدوێن و ڕەخنەی توند لە دەسەڵات و لەم حکومەتە گەندەڵ و بێسەرەو بەرەیە دەگرێ و ئەم لیستە ڕەشە بۆ ئەو کەسانەیە کەپەردە لەسەر ڕووی ڕاستەقینەی دەسەڵاتی یەکێتی وپارتی و حکومەتەکەیان لادەدات .
ئەم لیستە ڕەشەی دەسەڵاتی ناسیۆنالیزمی کوردی ، شتێکی زۆر شازنییە کە تەوەقوعی شتێکی لەم جۆرەیان لێ نەکرابێ ،دەسەڵاتی بزوتنەوەی کوردایەتی بەردەوام ڕۆشنبیران و ئازادیخوازان و میدیاکان و بزوتنەوە جەماوەرییەکان و ئەو حیزب ولایەنانەی کە گوێڕایەڵی سیاسەتەکانیان نەبوبێ بە پاساوی بێ بنەما ناوزەند و تاوانباریان کردووە ، وەک ئەم بزوتنەوە جەماوەرییەو ئەم خۆپیشاندانەو ئەم ڕۆژنامەیە دەستێکی ڕەشی لە پشتەوەیە ، یاخود ئەم نوسینەو ئەم ووتەیە خەتەر بۆ ئەمنی قەومی دروست دەکات ، جارێک بە گێرە شێوێن تاوانبار دەکرێن و جارێک هێڵە سووری یەکێتی و پارتی بەزێنراوە و لە موقەدەسات و لە دین دراوە و جارێک دەڵێن نابێت دڵی دۆستانی وەک جمهوری ئیسلامی و مەلاو شێخ و تەکـیەو پیاوانی نەزانـی ئیسلامیمان لێ بڕەنجێنن و جارێک ناڕەزایەتییە جەماوەرییەکان بەوە تاوان بار دەکرێ کەگوایە مۆلەتیان نییە و خزمەت بە تیرۆر و تیرۆریستان دەگەییەنن و جارێک بەتوندڕە و بیری هەرزەکارانە تاوان بار دەکرێن .

پاساوی ئەم جارەیی یەکێتی و پارتی کە سەرکوتی ئازادی ومخالفینی خۆیانی پێ بکات زمانی زبر ئاخاوتنە ، بەڵام مندەپرسم خۆ میدیاکان و نوسەران و ڕۆشنبیران تانک و زرێپۆش و قومبەلەو تۆپیان پێ نییە تا لیستی ڕەشەشیان بۆ بکەنەوە ،خۆ ئێوەش بە حسابی خۆتان قەڵم بەدەستان هەیە بۆ جوابی ڕوشنبیران و نوسەران و میدیاکان داواکارییەکانی خەڵکی کوردستانتان پێنادرێتەوە ، ئێوە ئەو کەسانەی پێویستە لیستی ڕەشیان بۆ بکەنەوە ، لەپێشی پێشەوە پێویستە لیستی ڕەش بۆ خۆتان و بۆ نوسەرە جنێو فرۆشەکانی کاتی شەڕی ناوخۆتان بکەنەوە و پێویستە لیستی ڕەش بۆ حکومەتە گەندەڵاوییەکەتان بکەنەوە ،پێویستە لیستی ڕەش بۆ دۆستە ئیسلامییەکانتان بکەنەوە کە ئینسان بە سەر ئینساندا دەتەقێننەوە ، بەڵام ئێوە لابەرامبەر ئیسلامییەکان و پیاوانی نەزان و تیرۆریستی ئیسلامیدا ملتان لەموو باریکترە ، ئێوە پێویستە لیستی ڕەش بۆ ئەو کەسانە بکەنەوە کە لە میمبەری مزگەوتەکانەوە و لە شاشەی TV کانەوە فتوای کوشتن و تیرۆری بۆ ژنان و ئازادیخوازان دەردەکەن، پێویستە لیستی ڕەش بۆ ئەو کەسانە بکەنەوە کە دەیانەوێت خەڵکی کوردستانیش بەدەردی خەڵکی ئێران خومار و بێ ئاگابکەن و دەیانەوێت خەڵکی کوردستان لە ڕێگەی تلیاکی ئیسلامییەوە خەوڵێبخەن .

ئەوەتا هەر دووا بەدوای ڕێکەوتنی ستراتیژی یەکێتی و پارتی ئەگەر چى تا ئێستا بەڕەسمی لیستی ڕەشیان ڕانەگەیاندووە بەڵام بە عەمەلی دەستیان بە سەرکوتی ئازادی کردووە ، دەسەڵاتی کوردی ئەمەیەکەم جاری نییەو حەتمەن دواجاریشی نابێت لیستی ڕەش و زیندان و ئیهانە کردن و چاو سورکردنەوەو لێدان ، بەرامبەر بە ڕۆشنبیران و ئازادیخوازان و کۆمۆنیستەکان بەکار بهێنێت ، حکومەتی کوردی هەزارو یەک ڕێگەی گرتۆتەبەر بۆ سەرکوت و دەمکوتکردنی ڕوناکبیران و ئازادیخوازان !! بەیاسای کۆنەپەرەستی ئیسلامی و بە پۆلیس و بە زیندان و بە تەقەکردن لە خۆپیشاندانەکان و داخوازییەکانی خەڵکی ، بەرامبەر بە نوسەران و بەرامبەر بەو کەسانەی کە بە دڵی دەسەڵاتی کوردی کارناکەن ، ئەوەتا هەر لەم ڕۆژانەی ڕابردودا(نەبەز گۆران) ی پەیامنێری ڕادیۆی نەوا لە شارۆچکەی دوکان دەفڕێنن و لە زیندان توندی دەکەن تۆمەتی ئەوەی دەدەنەپاڵ کە گوایە دەواو دەرمانی ئیکسپایەرو خراپبوی ئاشکرا کردووە ، دەواو دەرمانێکی ئێکسپایەر دابەشکردن بەسەر خەڵکیدا!! ژەهر دابەشکردنە بەسەر خەڵکیدا، یان وەک هەمووان دەزانین حەملەیەکی بەهێزیان کردە سەر ڕۆژنامەی هاوڵاتی و هەتا بەزیندانی کردن و بە تۆمەتدانە پاڵیان کە گوایە بانگەشە بۆ تیرۆر و تیرۆریستان دەکەن و هەتا لەڕێگەی چەند کەسێکەوە هێرش دەکرێتە سەر تاریق فاتیحى خاوەن ئیمتییازی ڕۆژنامەی هاوڵاتی و لێیدەدەن و برینداریی دەکەن وە مەعلومە لێدان و هەڕەشەو فڕاندن زیندانی کردن دەست ڕەنگینی کێن ، هەوڵی سەرەکی دەسەڵاتی کوردی لە ئێستادا بە پلەی یەک دەیەوێت کارێک بکات تا سنورێک بۆ internet دابنێت و خەڵکی هەروا بە ئاسانی نەتوان internetبەکاربێنن ، فەترەیەک بەر لە ئیستا هەوڵک درا کە خەتی internet بە ماڵان نەدرێت ، بەڵام ئەو هەوڵە هەر زوو فەشەلی هێنا ، بەڵام لە هەوڵێکی تریاندا paltalk یان کردە نیشانەو ئێستا هیچ کەسێک لە شاری سلێمانی ناتوانێت بێتە ژوورە کوردییەکانی paltalk وە ، هەموو کەسێک دەتوانێت paltalk بکاتەوە و بچێتە تەواوی ژورەکان جگە لە ژوورە کوردییەکان ، بەڵام دووای بەدواداچــونێک زانرا کە بە تەوجـیهاتی حیزبی حاکم لە سلێمانی کە بە کۆمپانیاکانی internet ی داوە ڕێگە گیراوە لەو کەسانەی کە دەیانەوی بچنە room) ) ە کوردییەکانی paltalk وە ، ئەمەش یەکێکی ترە لە سەرکوتی ئازادی ، ئەتوانم بڵێم ئەم هەوڵانەی دەسەڵات کە بەرامبەر بە نوسەران و میدیاکانی بینین یاخود بیستن دەیدات سەرەتای دەست پێکردنی ئەولیستە ڕەشەیە ، هەرچەندە یەکێتی و پارتی لەسەرەتای دەسەڵاتیانەوە بەردەوام سەرکوتی ئازادییان کردووە و ڕۆشنبیران و ئازادیخوازان و کۆمۆنیستەکان و ئەو کەسانەی کە بەدڵی دەسەڵات بیریان نەکردۆتەوە و نەیانخوێندۆتەوە و نەیان نوسیوە ، ئازار دراون و تیرۆر کراون و زیندانی کراون و بەر بە چالاکی سیاسی و تەواوی چالاکییەکانیان گیراوە ، بەڵام دەسەڵاتی کوردی ئێستا دەیەوێت لە ڕێگەی قانونێکەوە شەرعییەت بەو سەرکوتگەرییە بدات و بەر بەو ڕەخنەو گلەی و گازندە و فشارانە بگرێت کەمیدیاکانی جیاواز لە دەسەڵات و ئازادیخوازان و یەکسانی خوازان هێناویانە بۆ دەسەڵات .

دەسەڵات هەتا خەڵکی بێ ئاگا بکات و بەربگرێت لەو میدیا و نوســەرانە و لەو حیزبانەی کە ڕەنگیان لە ڕەنگی زەردی ئەوان ناچـێت ، هێندەی تر زەمینە لەبار دەکات بۆ سەروەت و سامان هەڵـوشینی خەڵکی ڕەش و ڕوتی کوردستان ، بەڵام بەهەوڵی چەندین ساڵەی یەکسانی خوازان و ڕۆشنبیران و کۆمۆنیستەکان تووانراوە تا ڕادەیەک خەڵکی کوردستان هۆشیار بکرێتەوە و ئەم نابەرابەری و نا عەدالەتییە قبوڵ نەکەن . بۆیە ئێستا دەسەڵاتی کوردی کەوتۆتە خۆی و ئەیەوێ مشورێ لە وەزعی خۆی بخوات ، دەسەڵات ئێستا دەیەوێت خـەڵکی کوردستان جگە لە خۆیان گۆێ بۆ کەسی دیکە نەگرن و بینەری هیچ میدیا و TV یەک نەبن جگە لەمیدیاکانی خـــۆیان و نوسینی هیچ کەس ولایەنێک نەخوێننەوە جگە لە ڕۆژنامەی کوردستانی نوێ و ڕۆژ نامەی خەبات .

جا بۆ ئەگەری ڕودانی هەر قانونێک یاخود هەر بڕیارێکی لەم شێوەیە پێویستی بەوەڵامدانەوەی بەهێزی یەکگرتوی ڕووناکبیران و یەکسانی خوازان و کۆمۆنیستەکان هەیە .

reben_faruq@yahoo.com