|
٢٣\١٢\٢٠١٣
مافیای کورد و
دیپۆرتی پەنابەر.
- وەڵامێک بۆ ئەنوەر حسێن
(بازگر) -
جەمال کۆشش
نووسەری نێوبراو لە ژێر ناونیشانی (تێوەگلانی کورد لە تۆڕە مافیاکانی
سوێد)، وتارێکی لە ماڵپەری هاوڵاتی رۆژی ١٩\١٢\٢٠١٣
بڵاوکردۆتەوە. لە یەکەم دێردا پرسیار دەکا (ده‌بێت حکومه‌تى سوێد ئه‌م
کوردانه دیپۆرت بکاته‌وه...؟! لە سەردێری دواتردا دەنووسێ (ده‌بێت
حکومه‌تى هه‌رێمى کوردستانیش، نه‌ترسێت و بڵێت ئه‌م کوردانه دیپۆرت
بکه‌نه‌وه...!).
لەو وتارە کورتەیدا، چەندین بار و رووداوی نەخوازراو کە لە لایەن
پەنابەرە کوردەکانەوە ئەنجام دراون، لەوانە کوشتنی ٨ ژن، فرۆشتن و
قاچاغییکردن بە مادە هۆشبەرەکانەوە دەخاتەڕوو، ئەمە جگە لە کاری رەش و
قاچاغییکردن بە جگەرە و... هتد.
من پێموانییە تۆڵەسەندنەوە لەو پەنابەرانە بە دیپۆرتکردنەوە یاسایی و
مرۆیی بێ.
کوشتن لە ژێر پەردەی ئابڕوودا، دەمارگیرترین توندوتیژییە لە دژی ژنان،
بە پێی ئامارەکان نزیکەی (٣٠) هەزار ژن لە باشووری کوردستان لە ماوەی
٢٥ ساڵی رابردوودا کوژراون، دەستڕێژکردن، کوشتن بە بەرد، فڕێدانە ئاو،
سوتاندن، سەربڕین ئەو شێوازە دڕندەییانە بوونە کە بەکارهاتوون بۆ
لەناوبردنیان. چەوسانەوەی ژنان و توندوتیژیی لە دژی ژنان هەموو
سنوورەکانی تێپەڕاندووە. بەڵام دەسەڵاتی کوردی و حکومەتی هەرێمی
کوردستان، کێیان دایە دادگا و کێیان سزادا؟ کرۆکی پرسەکە هەر ئەمەش
نییە، بەڵکە زۆرێک لە گەورە بەرپرسان خۆیان راستەوخۆ دەستیان لە کوشتنی
ژناندا هەبووە، یان بە ئاگاداریی ئەوان کراوە، پاشان لە رێگای (سولحی
عەشایەریی)ەوە چارەسەر کراوە. کوشتن لەسەر ئابڕوو، یان کوشتن لە پێناو
گەڕاندەنەوەی ئابڕوو، پرۆسەیەکە کە سیاسەتی باوکسالاریی و شۆڤێنیستی
پیاوسالاریی و دابونەریتی خێڵەکیی و دین زەمینەسازیی بۆ دەکەن..
پێویستە ئێمە رەخنە لەو کۆمەڵگایە بگرین کە پیاوکوژ و ژنکوژ و
رۆژنامەنووسکوژ بەرهەمدەهێنێ، ئەوە حکومەتی هەرێمە دەستی هەبووە لە
دروستکردنی نەوەیەکی دواکەتوو و سەقەت و نەخوێندەوار و ژنکوژ.
باڵی راست لە تەواوی ئەوروپا و لە سوێدیش دەڵێ پێویستە پەنابەرانی
تاوانبار دیپۆرت بکرێنەوە. بەڵام لایەنە مرۆپەروەرەکان دەڵین پێویستە
ئەو پەنابەرانە بە گوێرەی یاسایەکانی سوێد دادگایی بکرێن، ئاشکرایە کە
یاسایەکانی دادی سوێد و هەلومەرجی زیندانیەکانیشیان مرۆییانەترن لە هی
حکومەتی هەرێمی کوردستان. پێویستە ئەوەش بڵێم کە ئەو ژنکوژانە دەبنە
پارێزەر و پاسەوانی پیاوەکانی حیزبی دەسەڵاتدار.
حکومەتی هەرێم ناترسێ و بێباک لە (کاک بازگر) ئامادەیە نەک ئەوان بەڵکە
ئەوانەی هیچ تاوانێکیان نییە و هاوسەر و منداڵەکانیشیان لە ئەوروپا
جێهێشتووە بە کەلەپچەوە وەربگرنەوە، لەگەڵ وەرگرتنەوەشدا ئەگەر
شەلاققکاریی نەکرێن.. شەوێک لە زیندان رایاندەگرن. تا ئێستا نزیکەی
٥٠٠٠ هەزار کەس وەرگیراونەتەوە.. ئەو دیپۆرتکراوانە هەر یەکەیان
چیرۆکێکی تراژیدییان هەیە پێویستیان بە دەستگیرۆیی و چاودێریی و
پشتیوانی هەیە، بەڵام لە پاش دەیان جار خۆپیشاندان و دەیان جار مانگرتن
و دەیان جار دیدار لەگەڵ بەرپەرسانی دەوڵەت و پەرلەمان.. سەرئەنجام بێ
ئاکام بووە. حکومەتی هەرێم لە حکومەتی عیراقیش دواکەوتووترە.. هیچ نەبێ
ئەوان پارچە زەویەک و هەندێک پارە دەدەن بە پەنابەرە دیپۆرتکراوەکان.
ناسنامەی کورد کاتیک لە ژێر هەڕەشەی ئابڕووپەرستیی و ژنکوژی دەردەچێ کە
مرۆڤی کورد مرۆڤێکی ئازادییخواز و یەکسانییخواز و مرۆڤدۆست بێ.
٢٠\١٢\٢٠١٣
ماڵپه‌ڕی جه‌‌مال
کۆشش
|
