١٢\٩\٢٠١٦

مامۆستا بۆ کراوەتە ئامانج؟!

بەشدار عوسمان     

کاتێک کە نمونەمان بە مامۆستا هێناوەتەوە وەکو بەشێک لە چینی رۆشن بەخشی نەوەی ئێستا و داهاتووی کۆمەڵگایە،ئەگینا هەموو ئەوانەی ویستویانە و هەوڵیانداوە کۆمەڵگا و تاکەکان هۆشیاربن و بە ماف و ئازادییەکانیان ئاشنابن کەوتوونەتە بەر ئامانج و پەلاماردانی هێزە تاریک و ڕەشەکان.

لەنێو هێرش و پەلاماردانەکانی دەسەڵاتداران و فەرامۆشی و گوێ نەگرتن لە خواست و داواکارییەکانی چین و توێژە جیاوازەکان و لەنێویشیاندا مامۆستایان و فەرمانبەرانی کەرتی پەروەردە و فێرکردنە. لەماوەی دەیان ساڵی رابردوو کەمترین خواستەکانیان جێ بەجێکراوە،لەماوەی دوو ساڵی رابردووش سەرەڕایی فشاری بەردەوامی مامۆستایان بەشێوازی جۆراو جۆر تەنانەت تەنها یەک داواکاریان جێبەجێ نەکراوە و هەمیشەش بونەتە ئامانجی بێ ئەرزشکردنی ئەرکێک کە تەنها کەرت پەروەردە و فێرکردنە دەتوانێت کۆمەڵگا رزگاربکات لە هەموو ئەو قەیرانانەی دووچاری دەبێتەوە، ئەوە تەنها مامۆستایانن دەتوانن بناغەی مەدەنیەت و شارستانیەت و ئازادی و یەکسانی لەنێو هز و بیرکردنەوەی تاکەکان دورست بکەن.

بەووردبونەوە لەم رستانەی سەرەوە ئاسانە لە ئامانجی پشتەوەی فەرامۆشی مامۆستایان تێ بگەین و مەغزایی پشتەوەی هەڕەشەکانیش هەڕەشەی جدین لەلایەن هێزێک لە دەیەوێت کۆمەڵگا بەتەواوی مۆنۆپۆلک بکات و بێدەنگی زیاتر باڵ بکیشێت ،ناوەندەکانی خوێندن و مامۆستایان و فەرمانبەرانی پەروەردە وەکو هێزی هۆشیاری تاکەکان بۆ بەدەست هێنانی ماف و ئازادییەکانی کۆمەڵگا، مەترسیەکی گەورەن بۆسەر دەسەڵاتە چینایەتی و ستەمکارەکان، بچن مێژوو بخوێنەوە لەهەموو دنیا هەمیشە هێزە خێڵەکی و ستەمکارەکان،دەسەڵاتە سەرمایەدار و چینەکانی بۆرژوازی بەشێوازی جۆراو جۆر لەهەوڵی پاشەکشە و داتەپینی کەرتی پەروەردە و فێرکردن بووین،هەمیشە پلان و بەرنامەیان بووە کۆمەڵگا لەناو نەزانی و خورافیات و ناهۆشیاری بمێنێتەوە و درێژە بە دەسەڵاتی چینایەتی و ستەمکاری خۆیان بدەن، بۆیە لە بارودۆخی ئیستای کوردستاندا کە دەسەڵاتێکی ستەمکار و خێلەکی بەڕێوەی دەبات و نوێنەری چینی سەرمایەداری کۆمەڵگان ،ئەوان هدفمەندانە هەڕەشە لەمامۆستایان دەکەن و عاقڵانە خواست و وویستەکانی مامۆستایان فەرامۆش دەکەن،ئەگەر ساڵی پیشووتر بەپێی ئامارەکان (٣٠٠) هەزار قوتابی و خوێنکار وازیان لە خوێندن هێنابێت، لە ئەمساڵدا دەیانەوێت ببێت بە دوو هێندە و سێ هێندە بۆ ئەوەی زۆرترین هێز بۆ پارت و رێکخراوەکانی خۆیان دورست بکەن، بێگومان هێزی ئەوان لەنێو نا هۆشیاری و نەزانی برسیەکانی کۆمەڵگا دورست دەبێت.

ئەوان ژیان و گوزەران و خێزان و ماڵ و مناڵ و هەموو شتێکیان جیاوازە لە تەواوی خەڵکی کوردستان،هەموو داهاتی کۆمەڵگا بۆ خۆشگوزەرانی خۆیان بەکاردەهێنن،قوتابخانە و نەخۆشخانەکانیان جیاکردۆتەوە لە خەڵک،کاتێک خەڵک برسی دەکەن و هەموو کاراکتەرە زیندووەکان دەخەسێنن،ئامانجەکەی هەر ئەوەیە کە ئیستا بە بەشێکی گەیشتوون و بە بەهانەی قەیرانی دارایی دەیانەویت بەهەمووی بگەن، کۆمەڵگایەک لێواو لێو لە رەفاهیەت بۆ خۆیان و بەشی هەرە زۆری خەڵکیش لەنانی شەوانی دڵنیا نیە،مناڵان و گەنجان واز لەخوێندن و قوتابخانە بهێنن و کاری دەست نەکەوێت و بەناچاری ببێت بە بەشیک لەم هێزە نەخوێندەوارەی دەزگا جاسوسی و سەرکوتکەرەکانی ئەوان،بۆیە مامۆستایان و ناوەندەکانی خوێندن کراونەتە ئامانج . دەسەڵاتیک یەک زەڕە بیری لە باشکردنی ژیانی خەڵک و دەرکێشانیان لەنەزانی و برسیەتی کردبێتەوە،حکومەتیک ئۆزقاڵیک لەخەمی ئازادی و مافی مرۆڤدا بێت هەرگیز کەرتی پەروەردە و فێرکردن بەم فەرامۆشی و وێرانیە ناسپێرێت.

٨\٩\٢٠١٦
ماڵپه‌ڕی به‌شدار عوسمان