|
٢٧\١٢\٢٠١٤
مانیڤێستی پێگەی
ڕۆحی سەردەم!
پێگەی ڕۆحی سەردەم!
 ١-
پێگەی ڕۆحی سەردەم،پێگەو مانیڤێستێکی ڕەخنەیی - تێوریی گشتگیری
ڕەخنەگرانەیە لەکۆی کایە سیاسیی و کۆمەڵایەتیی و فەرھەنگیی و
نەرێتییەکانی کۆمەڵگە.
٢- لە ڕوانگەی پێگەی (ڕۆحی سەردەم)ـەوە کۆمەڵگەی کوردستان(باشور) بە
گشتیی دەرگیری کێشەگەلێکی گەورەو بنەمایی و ئالۆزی سیاسیی،
فەرھەنگیی،فیکریی و مۆراڵیی ترسناکن.ھەموو ئەو کێشانە بەسەر یەکەوە
قەیرانی کوشندەی ژیانیان دروست کردووە،قەیرانی ژیان،واتە ئیتر شتێک
نەماوە یان نەڕزیبێت یان لە دۆخی ڕزان و پوکانەوەدا نەبن.
٣- لەناو ئەو ئەو فەزا کۆماڵایەتییە شێواوەو لێکھەڵوەشاوەدا،کایەی
ڕۆژنامەگەریی ئەگەر خراپتریین و بێئاسۆتریین کایە نەبێت،ئەوا قەیران و
لاوازیی و تەنانەت ترسناکییەکەی لەسەر ژیانی ئێستاو ئاییندەی کۆمەڵگەی
کوردستان لەوانیتر کەمتر نییە.ئەو کایەیە نەیتوانیوە یەک ھەنگاو
روانیین و مەنتالیتێتی دەسەڵات تێپەڕێنێت،نەیتوانییوە تەنانەت لە یەک
جومگەی ژیانی سیاسیی و کۆمەڵایەتیی و فەرھەنگییدا چ فەرھەنگی دەسەڵات
تێپەڕێنێت چ دەستکاریی یەکێک لەو سەدان جومگە ناشیرین و بەدانە بکات کە
کۆمەڵگەو مرۆڤی کوردی گیرۆدەو لە تاریکییدا ڕاگرتووە.کایەی ڕۆژامەگەریی
بێئاسۆو ئامانجە ,ستراتیجی ڕوونی نییەو بەو ھۆیەشەوە لەناو قەیران و
ئاژاوەی بێھزرییدا پەلدەھاوێت.خەم و ژان و چاوەڕوانیی گەورەی نییەو
بەتاڵە لە خەون و تەقەلاو ئاسۆ گەورەکانی گۆڕانکاریی کۆمەڵایەتیی.
٤- ھەر بەوشێوەیە کە کۆمەڵگەو کایەکانی لە قەیرانی خنکێنەردا قەراریان
گرتووە،کایەی ڕۆژنامەگەریی لە چەند دەیەی ڕابردوودا نەک توانیوێتیی ئەو
قەیرانە تێپەڕێنێت و ئاسۆێکیتر بخاتە بەردەم کۆمەلگە،بەڵکو لەھەر
کایەێکیتر زیاتر بێئاسۆو پڕکێشەو قەیراناوییترە.پێگەی ڕۆحی
سەردەم،لەناو ئەو فەزا شێواوو قەیران و تاریکییەدا خۆی ڕادەێنێت.پێگەی
ڕۆحی سەردەم ھەوڵ و تەقەلاێترە بۆ وەڵامدانەوە بەو ئاژاوە
کۆمەڵایەتییەو لە ڕاستای خولقاندنی ڕۆحێکی کۆمەڵایەتییتر.
٥- دابەشبوونی چین و توێژە کۆمەڵایەتییەکان لە سیستەمی
کاپیتالیزمدا،بەرھەم و بەرئەنجامی سروشتیی ھەموو سیستەمە
چینایەتییەکانە،واتە کۆمەڵگەی چینایەتیی لەخۆیدا کۆمەڵگەێکی دابەشبووی
چین وتوێژە کۆمەڵایەتییەکانەو دابەشبوون و سەنگەربەندیی سیاسیی و ھزریی
و فەرھەنگیی خەسڵەتێکی ڕەھاو نەگۆڕی سیستەمی چینایەتییە،بەڵام
دابەشبوون لە کۆمەڵگەی کوردستان(باشور)دا بەشێوەێکی ترسناک دابەش
بووە.دەسەڵاتی کوردیی لە ساڵانی ڕابدروودا،مرۆڤەکانی لە دەوری ھیچ
بەھاو خەون و ئامانجێکی ھاوبەش کۆنەکردەوە،بەڵکو ئەو دەسەڵاتە تەنھا
میکانیزمێک بوو بۆ کەرت و پەرتکردنی کۆمەڵایەتیی،بۆ پارچەپارجەکردنی
ھەموو کایەێک و ھەموو دوو مرۆڤێک لەیەکتر.جیاوازیی و دابەشبوونە
کۆمەڵایەتییەکان لە باشوردا لەمێژووی ٢٣ساڵی ڕابردوداو لەھیچ شوێنێکدا
نەبووە مایەی دیالۆگێکی سیاسیی و ھزریی،تەنانەت بەتاڵ بوو لە دیالۆگ و
فیکرو فیکر بەرھەمھێنان،بەڵکو ھەموو جیاوازییەک،بچووک یان
گەورە،پڕناوەڕۆک یان پووچ،بێجگەی ڕق و بوغزو بێزھاتنەوە لەیەکتر ھیچیتر
نەبوو.باشور لە ٢٣ ساڵی ڕابردودا نەیتوانی تەنانەت لەسەر یەک بەھای
سیاسیی،فەرھەنگیی و ئەخلاقیی ھاودەنگیی و ھاوسۆزیی کۆمەڵایەتیی دروست
بکات،یەک نۆرمی سیاسیی و کۆمەڵایەتیی نییە مرۆڤی کورد لەسەری ڕوابێت و
لێیەوە بەرەو ئاسۆێکیتر گەنگاو بنێت و ئاراستە بگرێت،پێیەوە ڕیشەی
داکوتابێت و ئامادە بێت بەرگریی لێبکات تا بژییت.ئەو دابەشبوونە ترسناک
و ناتەندروستە تەنانەت مێدیاو کایەی ڕۆژنامەگەریشی گردۆتەوە،مێدیاو
ڕۆژنامەو پێگەی ڕاگەیاندن ھەیە بنەماڵەو یان پێڕی ھاوڕێیەتیی و
دۆستایەتیی دەستی بەسەرداگرتووە،لەوەھا دۆخێکدا یان دەبێت لە ئەوان
بچیت یان لە دەرەوەیان و لە باشتریین دۆخیشدا لە پەراویزێکی بێواتاو
بێبەھادا شوێنێکت بۆ قایل دەبن.
لەو ڕووەوە پێگەی ڕۆحی سەردەم،ویستی تێپەڕاندنی ئەو فەزا ناشیرین و
ناتەندروستە ڕۆژنامەگەرییەیەو دەخوازێت ببێتە پێگەی دەنگی مرۆڤ و پێگەی
نماییشی ئازادیی ھەموو مرۆڤێک.پێگەی ڕۆحی سەردەم،ھیچ باێخێک و
ئیمتیازێکی تایبەت و لەپێش بۆ ھیچ کەس و گروپێکی کۆمەڵایەتیی
دانانێت،واتە ھەموو مرۆڤێک جا سەربە چ پێگەێکی کۆمەڵایەتیی یان
کولتورییە کاتێک لەچوارچێوەو بەھای مرۆڤایەتیی و بەھای ئازادیی و
ھزرییدا خەریکی نماییشی توانا ھزریی و ڕۆحییەکانی خۆێتیی،دەتوانێت لە
پێگەی ڕۆحی سەردەمەوە بەبێ ھیچ سانسۆرێک تواناکانی خۆی نمایش بکات.
٦- پێگەی ڕۆحی سەردەم،بانگەوازی ھەموو مرۆڤێک دەکات،ھەموو ئەوانەی
خۆیان بە ھاوبەش،ھاوسۆزو ھاودەنگ لە لەمانیڤێستیدا دەبینن و چ خەونی
گۆڕانی ڕیشەیی کۆمەڵایەتییان ھەیە،لەھەر ئاست و ڕێیەکەوە
پێیاندەکرێت،ھاوکارو پشتیوانیی بکەن.پێگەی ڕۆحی سەردەم،دەخوازێت ببێتە
پێگەی ڕۆحی ئەو دەنگانەی تەنانەت لە یەک خاڵداو لە یەک ئامانجی بچووکی
سیاسیی و کۆمەڵایەتیی و فەرھەنگییدا لەگەڵیدا یەکدەگرنەوە،ئەوەش واتای
کاری ھاوبەش لەپێناو خەون و ئامانجە ھاوبەشەکان.
تراژیدیای سیاسیی،کۆمەڵایەتیی،کولتوریی و مۆراڵیی لە باشوردا ئەوەیە:کە
لە دوای ٢٣ ساڵ نەیتوانی کۆدەنگیی و ھاوسۆزیی کۆمەڵایەتیی لەسەر ئامانج
و خەونە ھاوبەشەکان دروست بکات.وەک پێشتر لە لێیدواوین،ئەوە بەرئەنجامی
ئەو ھەڵسوکەوتە ترسناک و ناتەندروستەیە کە چین و توێژو نوخبە
کۆمەڵایەتییەکان لەگەڵ یەکدا کردوویانە.پێگەی ڕۆحی سەردەم،وەک چۆن
ڕەخنەگرێکی ڕیشەیی سەرتاپاگیریی کۆی کایە سیاسیی و کۆمەڵایەتیی و
کولتورییەکان دەبێت و لەو ڕووەوە ڕەھا سازشھەڵنەگرە،ھاوکات دەخوازێت
ببێتە پێگەو بەرامبەرکێی جیاوازییەکان و لێرەوە جەنگی ھزر جێی جەنگی
ناشیرینی ڕق و بوغزو سوکایەتییکردن بگرێتەوە.
٧- لەم دۆخە تازە ترسناک و ئاییندەسازەدا کە لە کۆمەڵگەی کوردستاندا
ھاتۆتەپێش،وەک لێرەبوونی داعش و مەترسییەکانی،بەتایبەت کێشەو نەبەردی
کۆبانێ و ڕۆژئاوا،لاێن و بابەتێکی بێڕادە بۆ پێگەی ڕۆحی سەردەم
گرنگەو(پ ڕ س)بە ھەموو توانایەوە لەپشتی نەبەردی کۆبانێوە ڕادەوەستێت و
پشتیوانیی بێدرێغی دەکات.لە روانگەی پێگەی ڕۆحی سەردەمەوە،لەپاڵ
نەبەردی بەرجەستەی کۆبانێدا،ھەنگاوی دووھەم تێگەیشتنە لە ڕەھەندو
کاریگەرییە ئێستایی و مێژووەییەکانی،پ ڕ س،چاودێرێکی وردو ھەمیشەیی
نەبەردی ڕۆژئاوا دەبێت.
ھەڵبەتە پشتیوانییکردن لە ڕوانگەی(پ ڕ س)وە تەنھا پیاھەڵدان و
نماییشکردنی جوانیی و لاێنی پۆزەتیڤی نەبەردی کۆبانێ نییە کە بێگومان
نابێت ھەرگیز جوانیی و قارەمانێتییەکەی لەبیر بکەین،بەڵکو پشتییوانکردن
بەم واتایانەش دێن:ڕەخنەکردنی لاێن و ڕوانگە لاوازەکانی،ڕاکێشان و
ئاراستەکردنی بۆ ھەرچیزیاتر شۆڕشگێڕبوون لەباری ھزریی و
فەرھەنگییەوەو..تاد.
٨- پێگەی ڕۆحی سەردەم،لە نوسیین و ڕوانیینی ھیچ کەسێک بەرپرس نابێت.
٩- ...
١٠- ...
کازم قادر
بەڕێوەبەری پێگەی ڕۆحی سەردەم
٢٤\١٢\٢٠١٤
http://www.pegey-rohi-serdem.ch/index
https://www.facebook.com/pages
|
