٣\١٢\٢٠١١

مەلای وتارخوێنی هاورده‌چیی لە سیمێڵ و زاخۆ، پەتیان پچڕاند.

ھیوا رەش      

بەناو بەھاری عەرەبی ، لە باتی سەوزایی ، ڕەشایی کردە دیاری دەستی بۆ گەلانی سەرکوتکراوی عەرەب ، لە ئاکامی ترسانی ھێزە عیلمانییەکان لە دیموکراتییەت، دیکتاتۆریەت وەکو مڵۆزم بووە سایە و سێبەری ھاوڵاتییان ، سەرکەوتنی ئیسلامییەکان لە ھەڵبژاردنەکانی تونس و میسر و مەغریب و...!!! ئەمانەی ڕوویان دا ئەنجامن و ھۆکارەکانی دەگەڕێنەوە بۆ ئەو سیستمە ناتەندروستەی ھێزە فەرمانڕەواکانی ڕابردوو کە ئازادییان لە خەڵک زەوت کردبوو.

دەمێکە پەنھانچییەکان لە ھەوڵی بێوچاندان بۆ شوبھاندنی کوردستان بەو وڵاتانەی بەر ڕەشەبای ( بەھار ) ی عەرەبی کەوتوون ، بێگومان ھەندێک کەناڵ و ھێزی کوردستانیی بێئاگایانە و بێلێکدانەوەی زیانی لێکچواندنی ھەلومەرجی کوردستان ( نەک ئیدارەکەی ) بەو وڵاتانەی خاوەن کورسیی نێودەوڵەتی و ئاڵای فەرمی و سنوری دانپێدانراو و ئابوری سەربەخۆی خۆیانن ، بەو زوڕنایە کەوتبوونە ھەلەکە سەما بێدرککردن بەوەی ئەو زوڕنا نەشازە بە چ لێوێکەوەیە و بە کام دەمەوە گیر کراوە و لە کام قوڕگەوە فووی پێدا دەکرێ ؟ ! بێگومان ئیمپراتۆریەتی پیاوە نەخۆشەکەی تورکەکان و فارسە ئاخوندیزمەکان و ئیخوانە عەرەبیزمەکان ، خەون بە بەخڵتان خوێنکردنی ئەزمونی گەلی کوردستانەوە دەبینن ، کە لە دیوەخانی ئیسلامی سیاسیدا گەرای پیسی خۆیان داناوە و دەیانەوێ سواری پشتی ئەو ناڕەزایەتییانەی خەڵک ببن کە ساڵانێکە دەسەڵاتی کوردی لەبەر ھەڵپەی دزی و تاڵانیی زەمینەیان بۆ ڕەخساندووە ، بۆ ئەمەش مەلا حیزبییە فەتواچییەکان کە شارەزان لەوەی ئایین و سیاسەت لە مێزەردا ئاوێتەی یەک بکەن ، لە کونجی میحرابی ھەندێک مزگەوتی بەبارەگاکردوو دەرھێنا و لەسەر جیھاد پرۆڤەیان پێکردن ، لەبەر دەرکی سەرای شاری سلێمانیدا کەوتنە ختوکەدانی خەڵک و پەلاماردان.

ناڕەزایەتیی خەڵک لە دەسەڵاتی گەندەڵی پارتی و یەکێتی لە ترۆپکدایە ، تا دێت پایەکانی دیموکراتییەت شلۆقتر دەبێت ، ئازادییەکان بەرتەنگتر دەبنەوە ، نادادپەروەرییەکان بەبرەوتر دەبن ، گەندەڵییەکان ژمارەی سەرمایەدار و کۆمپانیا حیزبییەکان زیادتر دەکەن ، ئەم ھۆکارانە زەنگێکی مەترسیدارن بۆ ئەوەی ( بەھاری ڕەشی کوردی ) ببێتە ئەنجام و بەردەرگامان لێبگرێت ، ئەگەر وا نەبێت بە قسەی مەلایەکی نابەرپرس خەڵکی زاخۆ نەدەڕژانە شەقام ، کە ڕژانە شەقام بێدروشم و بێئامانج خۆیان نماییش نەدەکرد ، کە خۆشیان نماییش کرد وەکو ھێزێکی تاڵانچی و تۆڵەستێن ھێرش و پەلاماریان دەست پێنەدەکرد ! خۆزگە ئەو مەلایانەی لەبەر دەرکی سەرای سلێمانی ھوتافی ئازادی و یەکسانییان دەکێشا و بە ساختەوە سەرقاڵی گۆڕینی ناوی مێژوویی سەرای سلێمانی بوون بۆ سەرای ئازادی ، ھاونیازەکانیان لە زاخۆ تەڵقینی ئازادییەکانیان دانەدەدا ، خەڵکییان بۆ زەوتکردنی ئازادیی بەرامبەر ھان نەدەدا ، موڵکی گشتییان دەپاراست و دوکانی مەبفرۆشیی و مەساجیان گڕ تێبەر نەدەدا ، ھەموو ئەمانە ماکی دەردێکی کوشندەن و سەرچاوەکەشی ڤایرۆسی ئیسلامی سیاسییە ، ئەو ئیسلامە سیاسییەی یەکێتی و پارتی بۆ ملشکاندنی یەکتر لە خەڵک و خۆیان کرد بە کەڵەگا و ئێستا قۆچ لە بەرھەمی قوربانییەکانی گەلەکەمان دەدەن.

یەکێتی و پارتی ، ئەزمونی گەلی کوردستانیان کردۆتە بەردەبازی چەتەیی خۆیان ، مەسەلە نەتەوایەتییەکانیان خستۆتە ئەرشیفەوە و لە ڕەفەدا جێگەیان بۆ خۆش کردووە ، بودجە و یاسای نەوت و غاز و پلان بۆ دزینی موچەی خەڵک و گەمەکردن بە نرخی کالا و قوتکردنەوەی کۆمپانیا و ئاودیوکردنی سامانی ژێرزەوی و قۆرخکردنی بازاڕ بۆتە ستراتیژیان و لە سەرووی ئاساییشی نەتەوەییەوە دایان ناون ، دەنا ئیسلامی سیاسیی وەکو ماری پەپکەخواردووی سڕ ، ھەنوکە نەسەری دەلەقاند و نە زمانی دووفاقیی لێدەردەھێناین و بە فیشکە ئاماژەیان بە ناشیرین کردنی جوانییەکان نەدەدا و موڵک و ماڵی خەڵک و ھاوڵاتییان نەدەسوتاند ! جا بەر لە ئیسلامییە سیاسییەکان پارتی و یەکێتی تاوانبارن ، بۆیە گرنگە بیر لە گۆڕینی سیستمی ئیداری بکرێتەوە و بەرەو باشتر نەک ڕەشتر ھەنگاو بنێین ، ئەگەر وا نەکەین تاریکی لە دەرگامان دەدا ، دار بەڕووەکان لم دایاندەپۆشێ و گەردەلولی عروبە و بیابان لە بن ھەڵیاندەکێشێ ، ئەوسا چۆن براکانی باکورمان بە تورکە شاخاوییەکان و ئەوانەی ڕۆژھەڵاتمان بە زددە ئینقیلاب ناوزەد دەکەن ، ئێمەش دەکرێینە خەواریج و عەرەبی ھەڵگەڕاوە ، چونکە ھیچ کەس و سیستمێکی ئیسلامی دانی بە بونمان نەناوە و نانێ ، ابو سیف و ابو جھلەکان دەبنەوە بە برا ، ئینجا لە زوڕنا دادەنێن و فوو دەکەن لە چرا ، وەکو چیای تاریق بن زیاد لە ئیسپانیا ، چیای قەندیلیش ناوی دەگۆڕدرێت بە ئوسامە و ھەندرێنیش دەبێت بە ئەبو موسعەب و پیرەمەگرونیش بە خالید بن وەلید و زۆزکیش بە سەعد بن ئەبی وەققاس ، خۆمان عەبد و ژنەکانمان جاریە و ماڵمان دەبێتە غەنیمەت و ئەزمونەکەمان ئەنفال دەکرێت و چەپ و ڕاستیش دەکرێنە ھەمبانەی مێژووەوە ، لەجیاتی مەی ئیتر بەنگ و تلیاک سەراپای وڵات داگیر دەکات و فڵچە و مەعجونی ددان دەبێتە موحەڕەمات و بە سیواک سیواکمان دەردەھێنن و گازەرای پشتمان دەبێتە لانەی جەڵد و ڕەجم ڕەحم بە کەسمان ناکات.

ماڵپه‌ڕی هیوا ره‌ش