|
|
|
٣\٢\٢٠١٣ مەم و لێو!
دارا ئەحمەد رەوشت وە گومانان دەسپێرم.. بیر و مەژییم* وە تەمتومان؛ کوت.. کوت جەستەم دادەوەرن هەنگاو.. هەنگاو... شۆڕ دەبنەوە.. بەرەو ژێر پێی مەم و لێوان!
ئەڤین لە خۆم وەدەردەنێم.. خۆم لە جەستە و ئارەزووەکان؛ پیت.. پیت مەژییم دادەمەزرێن هەڵتەک.. هەڵتەک... سەما دەکەن.. رێک وە رەزمی مەم و لێوان!
لە تەک ئەو دووانە بەدکار و ئەڤـیندار و تاوانـکارم لە تەک ئەو دووانە سۆزدار و ستەمکار و خزمەتکارم لە تەک ئەو دووانە زۆردار و چاکـەکار و ناحـەزکارم لە تەک ئەو دووانە دۆستدار و خەوشدار و جوانکارم لە تەک ئەو دووانە رقـدار و رۆشـنـکار و دوژمـنـدارم لە تەک ئەو دووانە دڵدار و ساخـتەکار و نایابـکارم. * * * * * ئەز تێناگەم؛ چاوچاوانێ، دیدارەکان، مۆری ماچان.. ئامێزەکان، رامووسانی شەوگارەکان.. یادگارەکان... تێکڕا گشتیان حەشار دەدەم.. خودی خۆشم لە خامۆشیی و فەرامۆشیی تقەت دەکەم.. (نافەرمانیی*)وە رووی مەم و لێو دەردەخەم؛ کەچی هێشتا هەر دەدۆڕێم.. هەر دەدۆڕێم.. هەر دەدۆڕێم!
هیچ تێناگەم! یان من هەر خۆم سادە و ساکار و ساویلکە و کۆلەوارم یان مەم و لێو.. دوو تەلیسمی پڕ لە جفرە و کۆد و راز و بڤە و نهێنیی شەوانن!؟ * * * * * کنە و کۆڵین و دیڤچوون و توێژینەوە نەما نەیکەم؛ مایە پووچ بووم، گەڕیام.. پرسیم.. سۆراغم کرد.. تا وەستیام؛* لێ هەر هیچم وە هیچ نەکرد، تا (بنی بنەوە)ی زەریای ئەڤینیش رۆیشتم؛ لێ هێشتا هەر پەی وە رازی مەمان نابەم لە ئەفسوونی گڕی لێوانیش هەر ناگەم!
لە تەک ئەو دووانە بەدکار و ئەڤـیندار و تاوانـکارم لە تەک ئەو دووانە سۆزدار و ستەمکار و خزمەتکارم لە تەک ئەو دووانە زۆردار و چاکـەکار و ناحـەزکارم لە تەک ئەو دووانە دۆستدار و خەوشدار و جوانکارم لە تەک ئەو دووانە رقـدار و رۆشـنـکار و دوژمـنـدارم لە تەک ئەو دووانە دڵدار و ساخـتەکار و نایابـکارم.
دەی قیڕوسیا، جوان.. جوان دەستان لە من بشۆن.. ئەز خوازیارم، تکا دەکەم؛ نەونەمام و خونچەگوڵانی ئەو جیهانە (مەم زیندانیی) و (لێو بەسترا)یە وە من نەچن!!! هیچ تێناگەم! یان من هەر خۆم سادە و ساکار و ساویلکە و کۆلەوارم یان مەم و لێو.. دوو تەلیسمی پڕ لە جفرە و کۆد و راز و بڤە و نهێنیی شەوانن!؟ _______________________________________ * مەژیی: مێشک. * نافەرمانیی: هەڵگەڕانەوە، سەرپێچیی، سەرکێشیی، یاخییبوون. * وەستیام: ماندیی بووم.
سەرەتای شوباتی ٢٠١٣ - لەندەن
|
|
|
