٢٣\٩\٢٠١٧

مەیدانەكە چۆڵ مەکەن!

ئەرسەلان مەحمود  

بارودۆخی كوردو ناوچەكە بەگشتی، زۆر ئاڵۆزە، ئەوەندەی تێبینی کراوە ھەتابێ‌ بەرەو ناجێگیری زیاتریش بچێت، لەبەر ئەوە تەحلیلكردن و لێكدانەوەی هەروا سادەو سانا نیە، لەو بڕوایەدام زۆرینەی هەرە زۆر لەوەی دەگوترێت، ڕاو سەرنج و بۆچوونی تایبەت و تاكە كەسییانە بێت، ئەمەیش مافەو تا ئەو شوێنەیش نابنە مایەی تێكدانی ئاسایشی كۆمەڵایەتی و نانەوەی پشێوی شتێکی ئاساییە، ئەوەی نا ئاساییە خەڵكی بەڕەهاییەوە بیانكەنە خۆراك و دەرخواردی خەڵكی بدرێت، چونكە لەڕوی زانیاری وردو ڕەخنەی جیددی و زانستییانەوە زۆر كەم خوێنن و بەهایەكی ئەوتۆیان نیەو، نابێت، لەسەر ڕەوەندی ڕوداوەكان، ڕەخنەو هەڵسەنگاندن و شرۆڤەی بابەتیانە، ئاگایی و زانیاری و سەلیقەی وردو دیقەتێكی زانستیانەو توانایەكی زۆر بەهێزو بێلایەنانەی ماریفی دەوێت.

خۆشبەختانە، هێشتا دەرگەكانی دیالۆگ لەنێوان هەولێرو بەغدادا بەكراوەیی ماونەتەوە، بەڵام بەدبەختیەكە ئەوەیە كەس نیە لەودیووی دەرگەكان میتینگ و دیالۆگی جیددی بكات، سەرنج بدەن: بەدرێژایی هەموو ئەو ماوەیەی ڕابردوی نزیك و دور، ئەگەر جارێك هەولێر داوای دیالۆگ و گفتوگۆی كردبێت، لەبەرامبەردا بەغدا بەجۆرێك لەجۆرەكان لەبری بەدەنگەوە هاتن داوای شەڕی كردوە، ئەمە پێچەوانەكەیشی هەر ڕاستە، نامەوێ‌ بچمەوە سەر هێنانەوەی نمونەكاری، خوێنەری هۆشمەندو بەئاگا ورد لەمە تێدەگات، دیارە هەر كاتێكیش شەڕ هاتبێتە ئاراوە، هەردولا مەیدانی شەڕو جەنگینەكەیان نەك هەر چۆڵكردوە بگرە داویانەتە دەست داعش وەك لایەنی سێیەم و هەڵتۆقێندراو، هەروەك ئەوەی لەموسڵ و شەنگاڵ ڕویدا!!

ئەمە بەر لەهەر شتێك، لێكەوتەو بەرئەنجامی هەرە لەپێشی نەبوونی دیالۆگی جیددی و لێكتێنەگەیشتن بووە لەنێوان هەردولادا، كورد عیراقێكی هاوسەنگی گەرەكەو، عیراقیش مەركەزیەت و هەیمەنەو هەژمونپێكردنی تائیفی و مەزهەبگەرایی، هەردولاش لەبری ئەوەی بگەنە ئەنجام و دەرئەنجامێكی هاوبەش، دەیانەوێ‌ تێگەیشتنەكانیان بسەپێننە سەر یەكتری، ئەمەیش نەك هەر ئیزافەی دروست نەكردوە، ئەوەتا بەیەكەوە ژیانیش لەچوارچێوەی ئەم عیراقە بەزۆر بەیەكەوە لكێندراوەدا وەك ئەوەی دەگوزەرێ‌ كەوتووتە ژێر پرسیارو مەترسییەوە.

ئەگەرچی بەرژەوەندییە هەرێمایەتییەكانی چوار دوژمنە دراوسێكەی كورد، مەبەست لە" عیراق، ئیران، توركیا، سوریا " یە، نەهەمان ئەو بەرژەوەندییە هاوبەشەی چەند دەیەی ڕابردون و، نە وەك دەوڵەتیش خاوەن ئەو پێگەو مقەوماتە لەپێش و هاوبەشە بەهێزەو زاڵەی جاران ماون، جارێ‌ ئەوە سوریا وەك یەكێك لەوان لەگیانەڵڵادایە، بەڵام ناكرێ‌ كورد جموجۆڵە سەربازی و دیبلۆماسیەكانی تایبەت ئەم ماوەیەی ڕابردوو ئێستایان بەهەند وەرنەگرێت، ئەوان هێشتایش هەر هیچ نەبێت‌ لەڕێگەی جوڵاندن و بەگەرخستنەوەی هزری فاشیزمی مەزهەبییەوە دەتوانن بگەنەوە یەك لەكەوانە دوژمنكارییەكەی كورددا، هەڵوێستە لاوازو فرسەتبازییەكانی كۆمەڵگەی نێودەوڵەتیش لەهەمبەر كورد، هێندەی دی وزە دەبەخشێتە جەمبوونەوەو هەنگاوەكانیان لەواقیعدا، لەبەر ئەوە ئەمە مەترسیدارە.

بەڵام ئەمەیش دیسانەوە مانای ئەوە نیە كۆتایی ڕێگەو ڕێبازە خۆسەرییەكەی كورد بێت، ماکیاڤیلی دەڵێت: دەنگی خەڵک دەنگی خودایە. واتا ئەوەی یەكلاكەرەوەیە دواجار دەنگی خەڵك و جەماوەرە، هەروەك چۆن خودی مۆدێرنێتەیش دواجار ڕەوایەتی دەسەڵات و هەژموونی خۆی هەر لەخەڵک و جەماوەر وەرگرت. لەبەر ئەوە ترسی ناوێت، ترس ئەوەیە ناتەبایی خۆبەخۆیی كورد مەودا نەدا دەربازمانبێ‌ و، وەك هەمیشە لەبازنەیەكدا بخولێینەوەو، نەگەینە ترۆپكی سەركەوتن و بەدەستهێنانی سەربەخۆیی و دامەزراندنی دەوڵەت.

ماڵپه‌ڕی ئه‌رسه‌لان مه‌حمود