په‌یوه‌ندیپه‌رتووکخانه‌رۆشنبیرییلینکئه‌رشیفنووسه‌رانده‌سپێک

١١\٢\٢٠١١

ململانێی سیاسی لە هەرێم،
زمان هەر زمانە سواو و نه‌ریتییه‌که‌ی هەشتاکانە!


فریاد حه‌سه‌ن   


پاش چەند رۆژێکیتر پێ دەنێینە بیستەمین ساڵڕۆژی راپەڕینە مێژووییه‌کەی ١٩٩١، بیست ساڵە کورد لەم هەرێمەدا خۆی خۆی بەڕێوەدەبا، هەموو کەموکوڕیی و کێشە و قەیرانەکانی بیست ساڵی رابردوو، گومانی تێدا نییه‌ ئەگەر هەندێکیش لەو کێشە و گیروگرفت و قەیرانانە لە دەرەوەی ئیرادەی سەرکردایەتیی سیاسیی کورد بووبێ، ئەوا بەشی شێری ئەو گرفت و کێشە و قەیرانانە سەرکردایەتیی سیاسیی کورد لێی بەرپرسیارە، بە تایبەتییش هەردوو حیزبی سەرەکیی خاوەن پێگه‌ی زۆرینە، بە واتایه‌کیتر ئەزموونی بیست ساڵی رابردوو بریتییه‌ لە رەنگدانەوەی توانست و فەلسەفەی حوکومڕانییه‌تی دەسەڵات بە هەموو لایەنە ئه‌رێنیی و نه‌رێنییه‌کانییه‌وە.


دیارە سەرەتای ئەم بیست ساڵی ئازادییە تا نزیکەی ناوەڕاستی ئەم ماوە دوور و درێژە بە شەڕێکی ماڵوێرانکەر و کارەساتهێن بەسەر بردرا و ئێستاش و تا داهاتووێکی دوور و درێژیش جێپه‌نجه‌ی بەسەر کۆمه‌ڵگه‌دا هەر ده‌مێنێ، پاش ئه‌و ئەزموونە تاڵەش شەڕی گەرم و خوێناویی نەما، بەڵام پەتای دوو ئیدارەیی هەموو جەستەی دامەزراوەکانی حکومەتی تەنییه‌وە و ئێستاش دامەزراوە گرنگ و سەرەکیی و بنەڕەتییه‌کانی حکومەت (ئاسایش و پێشمەرگە و دارایی) هەر لەژێر چنگی ئەم پەتایەدا دەناڵێنێ!


راستە لە هەرێمی کوردستاندا پڕۆسەی ئاوەدانکردنەوە و پەرەپێدانی بازرگانیی و بوژاندنەوەی ژێرخانی ئابووریی تا رادەیەکی باش کراوە و پەرەی سەندووە بە تایبەتیش دوای رووخانی رژێمی سەدام و تەرخانکردنی بوودجەیەکی باش لە لایەن حکومەتی ناوه‌ندیی بەغداوە، بەڵام هێشتا کەموکوڕییه‌کان و پێداویستییه‌کانی خەڵک و دادگه‌ریی لە به‌جێهێنانی دەسەڵات وەکو پێویست نییه‌، دابینکردنی پێداویستیە سەرەتاییەکانی ژیانی خەڵک لە لایەن حکومەتەوە ئه‌رکه‌، کارەبا و ئاو و ئاوەڕۆ و شه‌قام و رێگەوبان و خوێندن و پەروەردە و سەقامگیرکردنی ئاسایش و ئارامیی بۆ هاوڵاتیان، ئەمانە هەمووی ئه‌رکی حکومەتە شتێکی لە ئه‌رک پتری تێدا نییه‌. لە بەرامبەر نەبوون یان کەموکوڕیی لە پێداویستیە سەرەتاییەکانیش خەڵک و ئۆپۆزیسیۆن و رێکخراوەکانی کۆمه‌ڵگه‌ی مۆدێرن نەک هەقی خۆیانە بەڵکو بۆ ئەوانیش هەر ئه‌رکه‌ دەنگ هەڵبڕن، بە تایبەتیش دەنگهه‌ڵبڕین لە بەرامبەر گەندەڵیی و (مەحسوبیەت) و هەموو دیاردە نه‌رێنییه‌کانیتر، بەڵام شێواز و زمانی ناڕەزایی و ده‌نگهه‌ڵبڕینیش به‌رپرسیاریێتییه‌، وەک چۆن حکومەت و دەسەڵات برپرسه‌ بەرامبەر که‌موکوڕیی و دیاردە خراپەکان.


ئەوەی لەو دواییەدا و لە کۆمەڵێک بەیاننامەدا روویاندا سەلمێنەری ئەوەیە کە بڵێین هێشتا سەرکردایەتیی کورد بە دەسەڵات و ئۆپۆزیسیۆنەوە لە ئاستی گۆڕانکارییه‌کاندا نین و بەیاننامەکان هەر بە زمانی ساڵانی هەشتاکان و پێشتریش نووسراون و هەمان زمانی ململانێی ئەو کاتانەی بە روونیی پێوە دیارە (نابێ ئۆپۆزیسیۆن جاڕی رووخانی حکومەت بدا، بەڵکو ده‌بێ داوای گۆڕین بکا . دەسەڵاتیش بە چ مافێک بە دەنگی هەق و رەوای ناڕەزایی خەڵک بە گێرەشێوێن و تێکدەر پێناسه‌ ده‌کا و جاڕی تێکشکانیان دەدا؟!) هەقە ئۆپۆزیسیۆن لە رووکەش و ناوەڕۆکدا گوزارشت لە ئۆپۆزیسیۆنێکی هێمن و پێشکەوتووخواز بکا، دیارە پێچەوانەی ئەوه‌ ئۆپۆزیسیۆنیش ده‌شێوێ و شێواندنی ئۆپۆزیسیۆنیش بە دڵنیاییەوە خزمەت بەو کەس و ناوەندانە ده‌گەیەنێ کە ده‌یانەوێ باره‌که‌ بە بێ چاکسازیی و گۆڕانکاریی هەروا لە شوێنی خۆی بە چەقبەستوویی بمێنێتەوە.

 

ماڵپه‌ڕی فریاد حه‌سه‌ن