١٧\٢\٢٠١٠

من پێت ناڵێم بۆچى واتکرد، بۆچى هاتى، بۆ رۆیشتى... لەیادى ڤاڵانتاین.

بەشدار عه‌لی  

عیشق و ئەوین و خۆشەویستى و دابڕان و خیانەت و جیابونەوە دوو رووى دراوێکن،کەم عیشق و خۆشەویستى هەیە لە کوردستان بەبێ دابڕان و خیانەت کۆتایى هاتبێت،بەپێچەوانەکەشى راستە،زۆرێک لە خیانەت و دابڕان و جیابونەوەکان سەرەتاکەى عەشق و خۆشەویستى و توانەوە بوە لەناو یەکتردا.

بەهۆى بارودۆخ و وەزعیەتێک کە لەکوردستانادا هاتۆتە پێش،عیشق و ئەوین و خۆشەویستى قسەیەکى قۆڕە و پولێکى سوتاو ناکات لاى گەنجان و لاوان( هەموو عەشقى دونیا شەربەتێکى پێنایەت لە بازار،پارەى تەکسیەکى پێنادرێت و کرێى مانگێک خانو پەیدا ناکات...) کچان و کوڕانى گەنج هێندە بیریان لاى دوارۆژێکى ئابورى باشە نیو هێندە بیریان لە پێکەوە ژیانێکى خۆشەویستیانە نیە( ئابوریەکى بەهێز زۆرێک لە کێشە فەرهەنگى و کەلتورییەکانیشیان بۆ چارەسەر دەکات)،سەیارەى مۆدێل بەرز و پارە و ئاڵتونى زۆر و خانو و دەسەڵات و کاسبى باش و سەفەرەکانى ئەوروپا و دەرەوە، زەمانەتى سەرکەوتنى خێزانەکانە و بۆیە گەنجانیش ناحەقیان نیە بیر و هۆشیان لاى ئەم سەرکەوتنانە بێت!!

کەم نەبون ئەو کچ و کوڕە گەنجانەى چەندین ساڵ ئاوات و خۆزگەیان بۆ دانیشتنێک و تێرامان و نیگایەک دەخواست ،بەڵام رەشەباى بێ خانە و لانەى و نەبونى خانو و ژورێک بۆ ژیان، بەرەو دابڕان و جیابونەوەى بردن،کەم نەبون ئەو کچ و کوڕە گەنجانەى عشق و خۆشەویستیان لە لوتکەدا باڵاى دەکرد بەڵام خوازبێنى و فرسەتێکى چوون دەرەوە ،لە دەبڵدا هەمووى کوژاندەوە و کۆتاى بە هەموو شتێک هێنا،چونکە دەزانێ لەم مەملەکەتەى ئێمە چوونە دەرەوە هاتنە ژووورەوە نان خواردن و جڵ پۆشین و پیاسە و سەردان و تەنانەت حمامیش لەژێر چاودێرى دەوروبەرەکەیەتى و بەهۆى سۆز و خۆشەویستیەک دووچارى دەیان کێشە و گرفتى ئابورى و فەرهەنگى و کەلتورى دەبێتەوە بۆیە پێیان وایە( زەرەر لەنیوەى بگەرێتەوە بە قازانج حیسابە)،چونکە لە عیشقدا جگە لە کێشە و گرفت و ناخۆشى هیچیتریان دەست نەکەوت.

کەم نەبون ئەو کچ و کوڕە گەنجانەى تەنها پیاسەیەک و نامەیەک و تەلەفۆنێک خەون و خولیاکانیان لێکرا بەسەراب و بۆ هەمیشە بە خاک سپێردران و گوللە باران کران،کەم نەبون ئەو کچ و کوڕانەى تەنها لەبەر ئەوەى رەقیان لەیەکتر نیە و یەکتریان خۆش دەوێت ،بۆ هەتا هەتا نەیانهێشت لەیەکتر نزیک ببنەوە ،کەم نەبون ئەو کچ و کوڕانەى دەسەڵات و عەقڵیەتى ناو گەڵى بەرپرسان و مناڵانى بەرپرس نەیانهێشت هەناسەیەکى ئاسودە لەگەڵ یەکتر هەڵمژن..

جا لە وەزعیەت و گوزەرانێکى لەم شێوەیە،کە چارەنوس و دیاریکردنى دوا رۆژى ئینسانەکان لەدەستى خۆیاندا نەبێت،کە پیاسە و قسەکردنێک مەرگى لەدوا بێت،تەنها ژوورێکیان دەست نەکەوێت بۆ پێکەوە ژیان،سادەترین و ساکارترین پێداویستیە رۆژانییەکانیان ببێت بە خەون و خۆزگە و رۆژانە ئاهو ئاخى بۆ هەڵکێشن،کە سیستەم و یاسایەک نەبێت بۆ پاراستنى شەخێیات و کەرامەتیان و دەستدرێژى و ئیهانە و سوکایەتى پێکردن لەسەر سەرەتاترین حەزە تایبەتیەکانیان ببێت بە عادەتێکى رۆژانە،لە باخچە و هۆڵێکدا نەتوانن دوو راز و نیاز بە ئازادى بگۆڕنەوە...ئیتر عەشق و ئەوین جگە لە گاڵتەجارییەک چیترە؟! گەنجان بۆ دەستى بۆ بەرن و مێشکى خۆیانى پێوە قاڵکەن؟!

بەم شێوەیە دەسەڵاتى سیاسى بە بەرنامە و سیاسەت و سیستەم و هەڵوێست و کار و کردەوەکانى، گەنجان و لاوان و کچ و کوڕانى لەعەشق و خۆشەویستى کردە دوژمن.

لە کۆتاییدا لەبەر هەست کردن بەم وەزعیەتەى کە کچان و کوڕان تیایدا ژیاون و دەژین،لەبەر چارەنوسێکى نادیار کە چاوەڕوانى هەموو گەنجێک و لاوێک دەکات لە کوردستان،پێویستە هەموو ئێمەى گەنجانى دڵشکا و دڵ بریندار لە یادى ڤاڵانتاین ئەو رستەیەى (رۆژ کریم) بە هاوسۆزان و خۆشەویستانمان بڵێین(من پێت ناڵێم بۆچى واتکرد،بۆچى هاتى ،بۆ رۆیشتى...) بۆ ئەوەى رق و تۆڵە لە سونەت و عادەتى ئێمە جێگایەکى نەبێتەوە و بەرەو ژیانێکى پڕ لە ئەوین و خۆشەویستى هەنگاو هەڵگرین و هەموو ئەو سەنگەرانە تێکبشکێنین کە وویستویانە و دەیانەوێت کۆتایى بە عەشق و خۆشەویستى بهێنن .

Bashdar_net@yahoo.com