من پشتیوانی لە نانبڕین دەکەم.

   
عەلی مەحموود محەمەد

ئۆلیڤەر بیسانسینۆ کرێکاری پۆست سەرۆکی گروپێکی چەپگەرا لە فەرەنسا، لە دوا هەڵبژاردنی سەرۆکایەتی فەرەنسا لە ساڵی 2007 بە 3000 ئەندامەوە ملیۆن و نیوێک دەنگی هێنایەوە .ئەم پیاوە چەپگەرا خاکییە بەیانیان کرێکاری پۆستە ، وەکو هەموو کرێکارانی دیکە ماڵ بە ماڵ و دوکان بە دوکان و فەرمانگە بە فەرمانگە دەگەڕێت و پۆستیان بەسەردا دابەش دەکات، ئێوارانیش سیاسەت دەکات و سەربەرزانە باس لە ڕزگاری چینی کرێکار و بەشمەینەتان دەکات ، کاندیدی سەرۆکایەتییە و پارتەکەی بەڕێوە دەبات ، لە جیاتی وەرگرتنی ئیمتیازات مانگانە بە ڕێک و پێکی ئابوونەوەی خۆشی دەدات،کرێچییەو خاوەند هیچ کەناڵێک ڕاگەیاندن و خانووی فەرعەونی و گرد و تەپۆلکە نییە، ئەم نموونەیە تەنها بۆ پەندە و هیچی دی .

ماوەیەکە ینک کەوتۆتە مانگانە بڕین و گواستنەوەو دەرکردنی ئەو بەشە لە کادران کە لەگەڵ لیستی گۆڕاندان ، بێشک لەم جیهانە کەسێک نییە لەگەڵ نان بڕیندا بێت مەگەر ینک و پدک ،لێ من بە پێچەوانەی ئێوە لێرە بیردەکەمەوە ئەم نان بڕینە بە سۆسیال –فاشیزم نازانم ، بۆ ؟،هیوادارم ئەگەر هەڵەم ڕاستم بکەنەوە ، ئەگەریش ڕاستدەکەم لێگەڕێن نانبڕاوانی سیاسەت با لە برسا بمرن.

سەرەتا با بزانین ئەمانە کێن و ئەم نانەیان چۆن پەیدا کردووە کە ئێستا بە واژۆی قەڵەمە سەوزەکەی مامە دەبڕدرێت .ئەم بەڕێزانە ئەو بەشە لە جەماوەرن تا ئێستا بەشداربوونە لە گەندەڵییەکانی دەسەڵات لە سەر بنچینەی تەسکییە و ئەندامبون لە ینک دامەزراون و مانگانەیەک باش یان وەزیفەیەکی نایاب یان خانەنشینییەکی نا موستەهەقیان وەرگرتووە وەکو تەواوی گەندەڵکارانی دیکەی ناو هەردوو پارتە دەسەڵاتدارەکە تەنها لەبەر ئەوەی ینک بوونە و هیچی دیکە لە نازو نیعمەتا ژیاون ، نان پەیداکردنی ئەمانە لەسەر بنچینەی لێهاتووی و خزمەت و ڕەوایی نەبووە ، بەشێک زۆری ئەمانە تاکو چەند ڕۆژیک لەمەوپێش شەریکە بەشی تاڵانکردنی سەروەت و سامانی کوردستان بوونە و بەشداربوونە لەو گەندەڵکاریانە و ئیمتیازاتیان لێوەی دەستکەوتووە و لە لیستی ڕەشی جەماوەردان، واتە بەشی زۆری ئەمانە بەشێکن لە چینی بۆرژوادزەکانی کوردستان ، بە چونیان بۆ بەرەیەکی دیکە و بە بانگەشەی گەورە پاک نابنەوە لە گەندەڵییەکان ،ئەمانە بە ڕاستی هێزی کۆنترا گۆڕانن.ئاخر کەی ڕەوای هەقە خەڵک نان نەبێت بیخوات هەزاران و دەیان هەزار موچەخۆری حیزبی لە کوردستاندا لە هەموو ئیمتیازاێکیان بۆ دابینکراوە تەنها لەبەر ئەوەی لە ناو حیزبدا بوونە،زۆربەشیان تەنها لەبەر ئەو ئیمتیازاتە پەیوەندیان کردووە ، بەشێک لەمانە کە سەنگەر دەگوازنەوە دەیانەوێت لەم گۆڕانکارییە شوێنی باشتریان دەسکەوێت و متمانەیان بە لاکەی دیکە نەماوە ،دەنا ئەوانە ئەهلی دژایەتی گەندەڵی و گۆڕانکاری و داکۆکی لە مافی خەڵک نین. بەشی باش لەمانە وێڕای مانگانەی حیزبی، بە پلەی بەرزی سەربازی و کاڕگێڕی خانەنشینکراون لە کاتێکدا هیچ بەرهەمێکیان لە ڕابردوو و ئێستا بۆ گەل نەبووە ،لە داهاتووش هیچیان لێ هەڵناکڕێنین، ئێمەش زەقەی چاومان هاتووە و ماڵ و منداڵمان جەمی خواردنەکانمان کەمکردەوەو چای خواردنەوە لە ماڵەکانمان قەدەغەکرا و گۆشت تەحرم و پەنجەرەی ماڵانمان بۆی فرۆشت ،ئێستاش پێمانی دەفرۆشنەوە .ئەوانەی وا ئێستا دەرەکرێن بۆ یەکێکیان نەهات بڵێت گەلۆ : ئەم ئیمتیازاتەی دەیدەن بە ئێمە ناڕەوایە ، با مانگانەکەی ئێمە بۆ هەژاران و لێقەوماوان بێت ، کێ هات بڵێت چۆن منتان بە فەرماندەیی خانەنشین کردووە یان وەزیر و گزیر ئاخر ڕۆژێک لە ڕۆژان من نە فیشەکم بۆ ئەم گەلە تەقاندووە و نە کارێک بە سودم بۆی هەبووە ، ...... ، هەموو وەریان گرت و خواردیان و لە ناهەقیەکە شەریک و بێدەنگ بوون، ئێستاش کە لە ڕیزی داخیلەکە نەمان ئەوا مانگا مرد و دۆ بڕا .

ئەم بەڕێزانە معاش خۆری حیزبن و حیزبیش بە ناڕەوا دەستی بەسەر سەروەت و سامانی گەلدا گرتووەو تەخشان پەخشانی دەکات ، ئەگەر بڕیار بێت لێپرسینەوەی دادپەروەرانە هەبێت پێویستە هەموو دادگایی بکرێن بەمانەی وا ئێستا مانگانەکەشیان دەبڕدرێت .

ئەم دەرکراوانە حیزب دایناون لەسەر بودجەی دەوڵەت کراون بە ماڵ ، کە لە حیزب نامێنن ئەوا مانگانە دەڕوات و ئیمتیازاتی حیزبایەتی نامێنێت ، چونکە ئەوەی وەریدەگرن بەرامبەرە بە کاری حیزبایەتی و ملکەچی بۆ سیاسەتەکانی ، خۆ بە کار و پسپۆری نەگەیشتوونە بەو پلە و پایەیە، ئەگەر بڕیار بێت ئەوانە لە حیزب دەرکرابێتن و شەرعییەتی ئەندامەتیان نەمابێتن ئەوا ئیمتیازاتەکەشیان نامێنێت ، ئێستا تۆپەکە لە گۆڕەپانی میلەتە و پێویستە ئێمە داوای بڕینی موچەی هەموو ئەوانە بکرێت لە کوردستان نانی سیاسەت دەخۆن و بوونە بە بازرگانانی سیاسەتکردن بەسەر گەلەوەو ئەوانەشی لە ڕێگەی بەشی حیزبەوە کاری بەرزیان دەستکەوتووە.

ئەرێ گەلۆ ، کام بەرپرسی مام ناوەندی هەبووە ، بە چاک و خراپەوە ، گەندەڵ و پاکیزەییەوە ، بە کارێکی هاکەزایی ڕازی بووبێت و بە ڕەنجی شانی نانی پەیدا کردبێت ؟؟، تاکو ئێستا لەگەڵ دەرکردنیا نان بڕاو بێت و ناڕەوایی بەرامبەر کرابێت؟؟.بۆیە من نەک لەگەڵ گەڕاندنەوەی ئیمتیازاتی دەرکراوان نیم ، بەڵکە بانگەوازی دەرکردنی هەموو ئەوانە دەکەم نانی سیاسەت دەخۆن، نانی سیاسەت و حیزبایەتی دەبێت لە کوردستانا ببڕدرێت .
 

Alimahmud2001@yahoo.com