|
٢٢\١٢\٢٠١٢
نابێ
رێگا بدرێ ئیسلامییەکان
قوتابخانەکان بکەن بە مەیدانى ترس و تۆقاندن!!
لە چەند ڕۆژى ڕابردوودا لە هەندێ لە قوتابخانەکانى شارى سلێمانى
لەلایەن گرووپێکی سەربە ئیسلامییە
سەلەفیەکان دەستیانکردووە بە بڵاوکردنەوەى نامیلکەى توندوتیژى دژى
مێینە کە باس لە حەرامکردنى پەیوەندى نێوان کوڕان و کچان دەکات وە هانى
خوێندکاران دەدات کە بە هەمووشێوەیەک دژى هەرجۆرە خۆشەویستیەکى نێوان
کوڕان و کچان ببنەوە، لەو نامیلکەیەدا چەندین ناونیشانى سایتى بەهەشتى
تێدایە کەلەلایەن گرووپە سەلەفیەکانەوە پشتگیرى دەکرێت و بڵاودەکرێتەوە
یەکێک لەو بڵاوکراوانە کە ناونیشانى (١٠)
کۆمەڵ لەئافرەتان کە نەفرەتیان لێکراوە تێدا (لەعنەت)لەچەندین کارى
ئافرەت کراوە بە(زۆرترین خەڵکى ناو دۆزەخ) ناوى بردوون هەروەها (دەنگى
مۆسیقا و دەنگى بەرزى ئافرەت (لەعنەت) لێ
کراوە.
ئەمانە هەمووى وەک خەسڵەتێکى هەمیشەیى ئیسلامیەکانە کە لەسەربنەماى ترس
و تۆقاندن دروستبوون. توندوتیژى بەشێکى دانەبڕاوى ئیسلامى سیاسیە، واتە
ناکرێت باس لە ئیسلامى سیاسى بکەیت و توندوتیژى تێدا نەبیت و بەدرێژاى
مێژوو ئەم ڕاستیە سەلمێنراوە، هەتا ئەو جێگایەى کەئیسلامیەکان لە
دەسەڵاتدا نەبن بەو شێوەیەى کە بۆیان بکرێت توندوتیژى بڵاودەکەنەوە لە
ڕێگەى نووسراو نامیلکەو سى دى و وتارى جۆراوجۆرەوە ، بە پارەو پوولى
دەوڵەتانى دراوسێ، هەرکاتێکیش دەسەڵاتیان هەبوو نموونەى وەک ئێران و
ئەفغانستان وسعودیە بەرجەستە دەکەن کە ڕۆژانە خەڵک لە سێدارە دەدرێت و
فەلاقەکارى دەکرێت و دەستى دەبڕدێت یاساى شەریعەتى ئیسلام جێ بەجێ
دەکرێت. لەکوردستاندا لە بیست ساڵى راِبردوودا هەمیشە ئەحزابى ئیسلامى
یەکێک لە کارە سەرەکیەکانى ئەوەبووە کە کار لەسەرمنداڵان بکات و بە
ناوى هەتیوانەو کارى بەناو خێرخوازى... هەتادواى منداڵان بە ئیسلامى
بکات و بۆئەمەش قوتابخانەکان، مزگەوتەکان، تەنانەت ماڵەکانى خۆشیان
بەکارهێناوە بۆ ئیستغلال کردنى منداڵان و دژى هەر پَشکەوتنێک وەستاون
کە لە کۆمەڵگا ڕوودەدات. ئەم کارەی کە لە قوتابخانەکاندا کردوویانە دژی
ماف و ئەندێشەی منداڵانە و نابێ ڕێگایان پێ بدرێ. هیچ گرووپ و لایەنێکی
ئیسلامی و هیچ ئایدۆلۆژیایەک بۆی نییە مێشکی منداڵان بشواتەوە و بە زۆر
بیروڕای خۆیان بکەن بە مێشکی منداڵاندا. منداڵان ئەبێ لە دنیای خۆیاندا
فێری یاری و هونەر و تێکەڵ بوون لەگەڵ یەکتر بکرێن نەک بە ترس و
تۆقاندن ڕاپێچ و ناچار بە قبوڵکردنی بیروڕایەک بکرێن. ئەم کارە
ڕاستەوخۆ ئەچێتە خانەی دژایەتی کردنی منداڵان و مافەکانیانەوە، هەر
بۆیە ئەرکی کۆمەڵگایە کە بۆ بەرگری لە منداڵان بەرامبەر ئەو گرووپانە
بوەستێتەوە.
ئێمە لە سەنتەری منداڵان وێڕای ئەوەی کە ئەو کارەی ئەو گرووپانە ڕەت
دەکەینەوە و بە پێچەوانەوە لەگەڵ دنیای منداڵان دەیبینینەوە، بە ئەرکی
دامودەزگا پەیوەندیدارەکانی دەزانین کە پێش لەوجۆرە کارە مەترسیدارە
بگرن و ڕێوشوێنی یاسایی توند لەبەرامبەریدا بگرن. سزای هەر کەس و
گرووپێک بدەن کە بەمجۆرە بیروڕای خورافی و دواکەوتوانە لە ناو
منداڵاندا بڵاو دەکەنەوە. لای خۆشمانەوە ئامادەی هەموو هاوکاریەکی
پەروەردە و خوێندنگاکان و دامودەزگا پەیوەندیدارەکانین بۆ پێشگرتن بە
کاری ئەم گرووپانە.
پێویستە ئەم کارە هەروا ئاسان تێنەپەڕێ و لیژنەی تایبەتی پێک بهێنرێ بۆ
لێکۆڵینەوە لە سەرچاوەی کاری ئەو گرووپانە و بە سزانی یاسایی توند
بگەیەنرێن.
سەنتەرى بەرگرى لە مافەکانى منداڵانى کوردستان
٢١\١٢\٢٠١٢
santarymnalan@gmail.com
|
