٣٠\۴\٢٠١٠
    نامه‌کانی یه‌کی مه‌ی.

به‌ندی عه‌لی

-1-

ئه‌گه‌ر هه‌موو ڕووباره‌کان
بچنه‌ سه‌ریه‌ک
ئاخۆ ئه‌بێ سه‌مای شه‌پۆل
چه‌ن به‌گوڕ بێ
ئه‌گه‌ر هه‌موو هه‌وره‌کانیش
ببن به‌یه‌ک
ئاخۆ ئه‌بێ لێزمه‌ باران
چه‌ن به‌خوڕ بێ
ئه‌گه‌ر هه‌موو دره‌خته‌کان
ببنه‌ یه‌ک دره‌ختی مه‌زن
ئاخۆ چ ته‌ورێ ئه‌توانی
بیبڕێته‌وه‌
ئه‌گه‌ر هه‌موو ده‌سته‌ زبرو
ماندووه‌کانیش ببنه‌ یه‌ک ده‌ست
کام که‌له‌بچه‌ به‌رگه‌ ئه‌گرێ
نه‌پچڕێت و
کام سنووره‌ به‌رگه‌ ئه‌گرێ
نه‌سڕێته‌وه‌.

-2-
له‌و دیوی ڕه‌نگه‌کانه‌وه‌
ئه‌تانبینم
یه‌ک زه‌مینی به‌خه‌م ته‌نراو
نیشتیمانی هه‌موومانه‌
له‌و دیوی ده‌نگه‌کانه‌وه‌
گوێم له‌هاواری ناختانه‌
به‌ هارمۆنی
یه‌ک سروودی ناڕه‌زایی ئه‌ڵێنه‌وه‌
یه‌ک په‌ڕه‌ی سووری مه‌ینه‌تییش
مێژوومانه‌.

-3-
ساڵی یه‌ک ڕۆژ
هه‌موو هه‌وره‌کانی ئاسمان
ڕه‌نگێ ئه‌گرن
له‌ڕه‌نگی سورباوی پێکی ئێواره‌یه‌ک
که‌سه‌رلێوه‌ له‌شه‌رابی ماندووێتی و
به‌ئومێدی سپیده‌یه‌ک
روون و بێ گه‌رد ، بێ خه‌می نان
سپیده‌یه‌ک ، شایسته‌بێ
به‌مانای پیرۆزی ژیان
ساڵی یه‌ک ڕۆژ ، شنه‌باکان
باڵه‌کانیان لێک گیر ئه‌که‌ن
بۆ پرۆژه‌ی گه‌رده‌لولێ
گه‌ر ئه‌و ڕۆژه‌ درێژه‌ی بێ
با ، که‌فیله‌ به‌گۆڕنانی
عه‌رشی یه‌کجار زه‌به‌لاحی
جه‌خارستان
ساڵی یه‌ک ڕۆژ
خواوه‌نده‌کانی سه‌ر زه‌وی
پاسه‌وانه‌ فریشته‌کانی مه‌له‌کوت
به‌ شمشێر و قه‌ڵغانه‌وه‌
به‌رئه‌ده‌نه‌ گیانی شه‌قام
وه‌ک ئه‌و ڕۆژه‌ ، له‌ته‌قویمی
چاخی به‌ردا
ڕۆژی حه‌شر و قیامه‌ت بێ
دوا سه‌ر ئه‌نجام.

-4-
ئه‌گه‌ر هه‌موو ڕۆژانی ساڵ
ڕۆژی تۆ بن
ئه‌مڕۆ ته‌نیا ڕۆژی منه‌
ئه‌ی گابه‌ردی بێ هه‌ست و هۆش
تۆ ناتوانی ڕێم پێ بگری
من شه‌پۆلی به‌رزی ده‌ریام
ئه‌گه‌ر هه‌موو ڕۆژانی ساڵ
تۆ شاهه‌نشای عه‌رشی که‌ون بێ
ئه‌مڕۆ من ڕابه‌ری دنیام
ئه‌ی گێژه‌ڵۆکه‌ی چاوچنۆک
تۆ ناتوانی تاکو ئه‌زه‌ل
چاوم به ‌خۆڵ بۆ بڕێژی
ئه‌گه‌ر هه‌موو ڕۆژانی ساڵ
تۆ خودا بی
ئه‌مڕۆ من خالقی ته‌نیام
ئه‌ی که‌له‌بچه‌ی جه‌ور و سته‌م
ئاڵتوونی سه‌د عه‌یاریش بی
ئه‌تپچڕێنم
ئه‌گه‌ر هه‌موو ڕۆژانی ساڵ
تۆ قه‌ڵا بی
ئه‌مڕۆ مارشی ملیۆنه‌هام.

2009

ماڵپه‌ڕی به‌‌ندی عه‌لی