نامه‌یه‌ک له‌ '' تاران '' ه‌وه‌ .

بوڕهان گیڤارا

بۆ /

پارت و لایه‌نه‌ سیاسییه‌کان..

که‌سایه‌تییه‌ شۆڕشگێڕه‌کان .

رێکخراوه‌کانی مافی مرۆڤ له‌ ئێران و کوردستان..

'' ئاسال محه‌مه‌دیی '' و '' به‌هنام محه‌مه‌دیی '' خوشک و  برایه‌کی  کورد بوون و  له‌ گه‌ڕه‌کی  ده‌ربه‌ندی  شاری تاران ده‌ژیان ، ئاسال رشته‌ی کۆمپیوته‌ری له‌ '' زانکۆی ئازادیی '' ته‌واو کردبوو . به‌هنام له‌ چێشتخانه‌ کاری ده‌کرد .

رۆژی 18.2.1386 له‌خۆپیشاندانی خوێندکارانی زانکۆی ئازادیی و  ئه‌میر که‌بیر  له‌ مه‌یدانی ئینقلابی شاری تاران له‌گه‌ڵ چه‌‌ند خوێندکارێکی تر ده‌گیرێن ، خۆشبه‌ختانه‌ به‌هنام خۆی له‌ده‌ست هێزه‌  ئینتیزامییه‌کانی  رژێم رزگار ده‌کا . به‌ڵام به‌داخه‌وه‌ سه‌رئه‌نجام دادگای باڵای ئینقلابی ئیسلامی حوکمی سێداره‌  به‌سه‌ر ئاسال داده‌سه‌پێنێ‌ و رۆژی 10.5.1386  له‌سێداره‌ی ده‌ده‌ن ، تا  ئێستاش  رژێم  ته‌رمه‌که‌یان  به‌ بنه‌ماڵه‌ی  ئاسال  نه‌داوه‌ته‌وه‌ . هه‌رچه‌نده‌  بنه‌ماڵه‌که‌یان په‌یوه‌ندییان به‌زۆر ناوه‌ند و سازمانه‌وه‌ کردووه‌  بۆ وه‌رگرتنه‌وه‌ی  ته‌رمه‌که‌  به‌لام به‌داخه‌وه‌ تائێستا که‌س به‌ده‌م گرفتی ئه‌وانه‌وه‌ نه‌هاتووه‌..ئیداره‌ی ئیتلاعات ده‌ڵێ ده‌بێ کوره‌که‌تان واتا - به‌هنام محه‌مه‌دیی- خۆی به‌ده‌ست ده‌وڵه‌ته‌وه‌ بدا ئه‌نجا ته‌رمه‌که‌تان ده‌ده‌ینه‌وه‌.

شه‌وی 12.10.1386هێزه‌ ئینتیزامییه‌کانی رژێم به‌بیانووی ده‌ستگیرکردنی به‌هنام هه‌ڵده‌کوتنه‌ سه‌ر ماڵی خوشکه‌که‌ی تری به‌هنام که‌ ناوی '' که‌لسوم محه‌مه‌دیی '' یه‌ و دوای ئازار و ئه‌شکه‌نجه‌دان و  بێ‌ڕێزییه‌کی زۆر پێیان  که‌لسوم و هاوسه‌ره‌که‌ی که‌ ناوی '' میلاد '' ه‌ ده‌گرن و  تا ناردنی ئه‌م هه‌واڵه‌ش هیچ ده‌نگوباسێکیان نییه‌.

له‌ کۆتاییدا  ئێمه‌ له‌رێگای  ئه‌م ماڵپه‌ڕه‌  به‌ڕێزه‌وه‌  داواکارین  سه‌رجه‌م رێکخراوه‌ مرۆده‌سته‌کان و  پارت و لایه‌نه‌ سیاسییه‌کان و  که‌سایه‌تییه‌ شۆڕشگێڕه‌کان  به‌ده‌م ئه‌م بنه‌ماڵه‌  به‌رێزه‌وه‌  بچن  که‌ به‌ دڕندانه‌ترین شێوه‌  له‌لایه‌ن رژێمه‌وه‌ هه‌ڵسوکه‌وتیان له‌گه‌ڵ ده‌کرێت .

کۆمه‌ڵێک خوێندکاری کورد له‌ تاران.

کۆمه‌ڵێک کارگه‌ری کورد له‌ تاران.

کۆمه‌ڵێک که‌سایه‌تیی کورد له‌ تاران.

بورهان گیڤارا

29.1.2008

تاران - ئێران