|
|
|
١٤\٦\٢٠٢٥ نارنجییان!
دارا خونچە ئەو گوڵە ناسک و نازەنینە نارنجییانەی لە پشت ئاگایی و هۆشیارییم پارێز دەستێنن.. بەرزەفتم دەکەن نەک هەر تەنێ بینایی و باری سەرنجم تێکڕای هەبوونم وە لەنجە و سەما دەخەن!
ئەو ئەفسوونە نارنجییەی وا دەمی زەردەی خۆرەتاوێ لە نێوان زەوی و عاسمانێ دادەگیرسێ و دەجمجمێ.. نیگام وە پرتەپرت دەخا هاوسەنگیی جەستەم تێکدەدا! هاوسانییم خواروخێچ دەکا! هاوشانییم گێڕووێڕ دەکا! هاوبیرییم لێرووێر دەکا! ........... ........ .....
ئەو جۆتە نارنجە یاخییەی لە قووتەقوتی خۆی ناکەوێ و شەڕ دەگەڵ عاسمانان دەکا.. گورزە هەرە پڕ لە ژان و پڕ چێژەکەی وەبەر من و تاقە کەسێ دی دەکەوێ ئەویش ''خۆم و خۆم ئاسا''نە!
ئیدی ئەمن سووچم چیە؟! لە هەر سووچەک لێی دەڕۆنم و هوورددەبمەوە؛ هەرگیز ناشێ و ناکرێ و نابێ لە نارنجییانم دابڕن و دین و دەلوو و سەرشێت نەبم.. یان لەگینە هەر دەمودەست هەناسەشم لەبەرببڕێ و گیانم دەرچێ! هێێێییی نارنجییان هێێێییی نارنجییان لەبەر من نا.. لەبەر خۆتان؛ ''باو'' لە مەژییتان ''قاو''بدەن سۆز و ناز و میهرەوانیی و جوانییەکانتان هەر ئی ئەوەن بیانبەخشن... مایسی ٢٠٢٥ - لەندەن
|
|
|
