ناوەندی چاک پشتیوانی دەکات لە داواکاری خۆپیشاندەرانی ساڵی 1982 ی کەرکووک.

خۆپیشاندانی ڕێکەوتی 6-5-1982 ی کەرکووک یەکێکە لە لاپەڕە پرشنگدارەکانی خەبات و تێکۆشانی خەڵکی شاری کەرکووک دژ بە سیاسەتی نکۆڵیکردن و سڕینەوەی ناسنامە .

لە دوانیوەڕۆی 6-5-1982 سەدان قوتابی و گەنجی ئەم شارە ، لە گۆڕستانی شێخ محێدینەوە بانگەوازی نایان دا بە ڕوی دەسەڵاتدارانی فاشی بەغدا، سەلماندیان کەرکووکییەکان لە خۆشی و ناخۆشیدا بەشێکن لە جەماوەری کوردستان ، هیچ هێزێک ناتوانێت ئیرادەیان پێشێل بکات .

لە کاتێکدا دەبوایا هەردوو دۆسیەی ڕاپەڕینی 1982 و 1987 دوو دۆسیەیەی گرنگی دادگای باڵای تاوانەکان بونایە و سەرانی بەعس لە پای ئەنجامدانیان دادگاییبکرابانایا ، وەلێ مخابن بەهۆی خەمساردی دەسەڵاتدارانی کوردییەوە ، ئەم دوو دۆسیە گرنگەش وەکو دۆسیە گرنگەکانی دی کورد پشتگوێخران ، ئێستا هەنگاوی ئێوە بۆ کارکردن لەسەر ئەم دۆسیەیە کارێکی مەزن و هەنگاوێکی گەورەیە و نەتەوەکەمان شانازییان پێوە دەکات ، ئێمە وەک ناوەندی چاک ، سەرباری ئەوەی خۆمان بە بەشێک لەو دۆسیەیە دەزانین ، هاوکات بە هەموو توانایەکمانەوە لە پشتان ڕادەوەستین ، لێرەوە داواکارین :

- لە دادگای باڵای تاوانەکان دۆسیە بۆ ئەو تاوانە بکرێتەوە کە بەعسییەکان لە ڕیچکەوتی 6-5-1982 لە شاری کەرکووک ئەنجامیان دا ، وەکو تاوانی دژ بە مرۆڤایەتی سەیر بکرێت .
- مۆنمێنتێک بۆ شەهیدانی ئەو خۆپیشاندانە درووستبکرێت .
- موچە بۆ شەهیدان و برینداران و زینانییەکانی ئەو خۆپیشاندانە لەسەرئەرکی حکوومەتی هەرێمی کوردستان ببڕدرێتەوە ، کەمئەندامان و نەخۆشانیان چارەسەر بکرێن .
- کۆمەکی ئەو کۆمەڵەیە بۆ کارکردن لەسەر ئەو دۆسیەیە دروستکراوە بکرێت و بودجەی بۆ تەرخان بکرێت و بارەگای بۆ بکرێتەوە .
- تاوانبارانی ئەم تاوانە " لە پارێزگاری ئەوکات ئەمن و مخابەرات ، ئەوانەی خەبەریان لە خەڵک داوە و سیخوڕییان کردووە " ئێمە ناوی چەند دانەیەکیمان لایە " دادگاییبکرێت و سزای خۆیان وەربگرن .
- ڕۆژی 6-5-1982 وەکو ڕۆژێکی گرنگ لە خەباتی جەماوەری خەڵکی کوردستان سەیر بکرێت.
- ڕوفاتی شەهیدان بدۆزرێنەوە و بگەڕێنرێنەوە بۆ کەرکووک .
- ئەم خۆپیشاندانە بە دۆکۆمێنت بکرێت ، لە بواری هونەریدا تەعبیری لێبکرێت .
 

ناوەندی چاک
11-5-2008