٢\١١\٢٠١٠
نەوتى رەش و
بازاڕى رەش و ماڵى سپى.
حوسێن ئیسماعیل خان دەلۆ
لە نێوان رەش و سپیدا وەکو هاوڕێیەکم کە مامۆستاى کۆلیژى
هۆنەرەجوانەکان بوو لە وڵامى پرسیارێکمدا ووتى: لە نێوان ئەو دوو
رەنگەدا ئەوەى چاوى مرۆڤ تواناى بیبینێ هەیە( 10 ملیۆن ) رەنگە ، ئاخۆ
لە پشتى چاوى مرۆڤەوە چەند رەنگى تر هەیە کە مرۆڤ مەحرومە لە بینینى و
ناتوانێ چاوى بە دیداریان شاد بێت؟ ئەوە کارى خودایە و ئێمە هەقمان
پێوە نییە.
ئەگەرچى ژمارەى پیتەکانى رەش و سپى وەکو یەکە و هەریەکێکیان بە سێ پیت
دەنوسرێن بەڵام لەرووى ناوەرۆک و ماناوە جیاوازى زۆریان هەیە ، کورد
دەڵێت : ماڵى سپى بۆ رۆژى رەش ، هەروەها قسەى تر هەر لە بارەى رەش و
سپییەوە هەیە دەڵێن : بازاڕى رەش و درۆى سپى و بەختى رەش و نێوچاوانى
رەش و دەست و پێى سپى و ... هتد .
قەدەرى کورد لە هەڵکەوتى جوگرافیاى شوێنەکەیدا ئەگەر ئاو گەورەترین
سامانى سروشتى بێت بۆ هەنوکە لە نەوتدا زۆرترین و بەبایەخترین سامانى
سروشتى هەیە ، نەتەوەى کورد تاکو ئێستا قوربانى و باجدەرى ئەو نەوتەیە
کە بە ئاڵتونى رەش ناو دەبرێت ، بوونى نەوت وەکو سامانێکى سروشتى ژێر
زەوى ئەگەر بۆ وڵاتانى دیکە مایەى و هۆکارى ئاسودەى و خۆشگوزەرانى و
خۆشنوودى بوو بێت ئاوا بۆ کورد پێچەوانەکەى بووە و بووەتە فاکتەرى
رەشەکوژى و قەڵاچۆکردن و پاکتاوى نەژادى ماڵ کاولى و ماڵ وێرانى و
دەربەدەرى و دەردە سەرى، داگیرکەرانى کوردستان وەکو پورەى هەنگیان لە
کلوەدارێکدا دۆزیبێتەوە خۆشحاڵ بوونە بە دۆزینەوەى نەوتى لەکوردستاندا
شیلەیان زیاتر بەکوردستان چووە و دواى داگیرکردنەکەش ویستویانە خاوەن
ماڵیش بکوژن و سامانەکەش بەتاڵان ببەن ، هەر بەو سۆنگەیەوە وڵاتانى
زلهێز و بڕیار بە دەستەکانى جیهان هەمیشە هەوڵیانداوە ئەم ناوچەیە بێ
کێشە و قڕەوبڕە نەبێت و بەرەوام چاوى لە هێز و دەسەڵاتى ئەوان بێت بۆ
چارەسەرکردنى کێشە و گرفتەکانى ناوچەکە ، کورد کیشەى نەتەوایەتى و خاکى
هەبووە و ئەوانیش دزى ماڵى کورد و چاویان لە سامانى کوردستان بەگشتى و
نەوتى ژێر زەویەکەى بووە ، هەر لەبازاڕى کڕین و فرۆشتنى نەوتدا لە
جەزائیر لە ساڵى 1975 شۆڕشى گەورەى ئەیلولیان خنکاند.
نەوت وەکو شمەک و کاڵایەکى سەردەمیان تاکو ئێستا لە برەودایە و بازاڕى
گەرمە و بووتە هۆکارى بنەڕەتى بزاوت و جۆڵە سەرەکییەکانى مرۆڤ و ئامێر
و بەشێک لە ئامێرە تەکنۆلۆژییەکان و هەرەها نازانرێ ئاخۆ کەى
تەکنۆلۆژیا و پێشکەوتن و داهێنان دەتوانێ ئەلتەرناتیفێک بۆ نەوت
بدۆزێتەوە یان هەر نایدۆزێتەوە.
ئەگەر ئەلتەرناتیف و جێگەرەوەیەک بۆ نەوت دۆزرایەوە رەنگە ئەو کات
بازاڕى ئەوەندەى ئێستا گەرم نەبێت و وڵاتانیش ئەوەندە چاویان لەسەر
کوردستان نەبێت (هەرچەند رەنگە لە ئایندەدا شەڕى ئاویش بەرۆکى کورد
بگرێت) و ئەوکات مانەوەى نەوتیش بۆ ئێمە ئەوەندە بە فڕ و پیت و بەرەکەت
نەبێت و زۆر بەباشى خێر بۆ ئێمەى کورد نەداتەوە کە لە شەڕەکەیدا کورد
زیانێکى زۆرى بەرکەوتووە.
چەند ساڵێکە گێرمەوکێشەى نێوان حکومەتى هەرێمى کوردستان و حکومەتى
فیدریاڵى عێراق لە سەر یاساى نەوت و غاز بووە و ئەمسەرو ئەوسەرێکى زۆرى
تێدا کراوە و تاکو ئێستاش ئەو کێشەیە بەباشى یەکلا نەبووەتەوە و ماڵ بۆ
خاوەن ماڵ حەڵاڵ نەکراوە .
ئەو گرفت و کێشانە واى کردووە دەست بردن بۆ ماڵى خۆمان بەدزى و ناشەفاف
و لە پێچ و پەناوە بێت، هاوکات ئەو کردووەیەش دەرگا بۆ ئەوە بکاتەوە
خۆمانیش لە خۆمان دزى بکەین و دەروازە بووە بۆ فێرکردنمان دزیکردن و
چۆن گزى و فزى لە خۆمانیش بکەین ، هاوکات گرێبەستە نەوتییەکانیش لەگەڵ
کۆمپانیا بیانیەکاندا بەنرخى زیاتر و ب بەشە پشکى ئەوان زیاتر بێت
ئەنجامدراوە.
وامان بەرگوێ دەکەوێت فڵان بەرپرس و فیسارە کەس بەشە پشکى لەنەوتى
رەشدا هەیە بۆ گیرفانى خۆى و بەرژەوەندى خۆى سوود لەو بازاڕە رەشە
وەردەگرێت ، من نازانم تاکو چەند ئەو قسە و باسانە راستن و چەند خراوتە
سەرى و زیادەڕەوى تێدا کراوە، بەڵام ئەوەندە دەڵێم نابێت حکومەت رێگا
بەو جۆرە کارانە بدات و ئەو سامانە هى هەموو تاکێکى کوردە و نابێت
بەهەدەر بڕوات.
جێگاى سەرسوڕمانە! نەوتى رەش و بازاڕى رەش و فرۆشتنى لە تاریکییەوەیە
واى کردووە هەمووان بە گومان بین لەوانەى بەو ئەرکە هەڵدەسن تەنانەت
لێپرسراوەکانیش لە یەکتر ، ئەوەى من ئاگام لێبێت لێدوانەکانى بەرپرسانى
حکومەت بۆ کەناڵە جیاجیاکانى راگەیاندن بە تایبەت سەرۆکى حکومەت و
وەزیرى سامانە سروشتیەکان سەبارەت بە فرۆشتنى نەوتى کوردستان هاوتەریب
نەبوو دوو لێدوانى جیاواز بوون .
تاکو ئێستا رۆژانە چەندین ملیۆن بەرمیلە نەوت لە چاڵە نەوتەکانى
کەرکوکەوە بۆ دەرەوە هەناردە دەکرێت و بەشێکى زۆر کەمى بۆ بودجەى
کوردستان بەسەد منەت و حنەت دەگەڕێتەوە ، ئەمە وێڕاى ئەوەى کە
کەرکوکییەکان نەک سوودمەند نەبوونە لە بوونى نەوتەکە بگرە ئەوەندە
سووتەمەنیان نادەنى کە بەشى پێداویستى ئەو پارێزگایە بکات کە بەناچارى
دەبێت بچنە بەغدا و دواى زیاد کردنى بەشە سوتەمەنى بکەن ئەویش ئەگەر
گوێیان لێبگرن و داواکەیان بۆ جێبەجێ بکەن دەکەونە ژێر منەتى ئەوانەوە
، من لێرەدا باسى ئەو چەرمەسەرى و دەردەسەرییە ناکەم کە کوردەکانى
کەرکوک بەدەست بوونى نەوتەوە لەو شارە چێشتوویانە و تاکو سەر ئێسقان
زەرەرمەند بوونە.
ئەوانەى ئێستا لە بەغدا دەسەڵاتدار و فەرمانڕەوان ماف بە خۆیان دەدەن
نەوتى کوردستان بفرۆشن و بەشێکى ئەو پارەش بچێتە گیرفان و خەزێنەى
ئەوانەوە لە کاتێکدا هیچ فڕ و مافێکیان نییە بەوەى خۆیان بە خاوەنى
سامانى سروشتى کوردستان بزانن و ئەوەى خاوەن شەرعیەتە کورد خۆیەتى .
فرۆشتنى نەوت بۆ حکومەتى هەرێمى کوردستان رەوایە بەڵام بەو مەرجەى کەڵک
و سوودى بۆ هەمووان بێت و هەر تاکێک کوردى کە لەم هەرێمدا دەژێت کەڵک
لە داهاتى نەوت وەربگرێ و شەفافانە بێت وەزیر و سەرۆکى حکومەت یەک
قسەبن لە فرۆشتنى ، من رام وایە کاتى ئەوە هاتووە نەوتى کوردستان بۆ
خەڵکى کوردستان و ئاوەدان کردنەوەى کوردستان بەکار بێت و پارەى فرۆشتنى
نەوت لە پێشکەوتن و ئاوەدان کردنەوە و بنیتنانەوەى کوردستان خەرج بکرێ
و بۆ بوژاندنەوەى ژێرخانى ئابوورى هەرێمى کوردستان بەکار بێت نەک بۆ
دەوڵەمەندى کردنى چەند کەسانێک.
ماڵپهڕی حوسێن ئیسماعیل خان دهلۆ
|