نزاى ژنێک.
                                  

                                      که‌ژاڵ ئیبراهیم خدر
1

تۆ لەپایزێکى رەنگ زەردى پایزدا
بە ناخى مندا گوزەرت کردو
خەمێکى پیرۆزت ئاشناى خەمەکانم کرد
تۆ لەبەهارێکى تەمەنى مندا
گوڵاوى بۆنى چڵە نێرگزێکت دا لەقژم و
بەڕەنگى پەلکە زێڕینەو دەنگى باڵندە
کۆچەرییەکان ئاشنات کردم

2
دەزانم لەشەوە زەنگێکدا
ئاوێزانى خەمەکانت دەبم و
خەمەکانم تێکەڵ بە کۆڵانەکانى ڕۆحت دەبێ و
دەزانم شەوێک لەگەڵ شیعرێکمدا
سەردەبڕدرێمء کەسێک لەخوێنەکەم ناپرسێ

3
تۆ شنەباى پێدەشتى بەهەشتى هەستم
بوویت و
دڕکەکانى مەرگ و چاوەکانى گوناهت
ڕاپێچ کرد
تۆ پەرداخێ شەراب بوویت و
لەبەردەم حەزێکى سەرشێتدا
ڕژایتء ناتوانیت خۆت کۆبکەیتەوە

4
ئەى باڵندە
بەسەر خەونەکانى مناڵیما بفڕەو
دەنوک لەحەزەکانم بگرە
تۆوى گوڵە گەنمەکانم بۆ بێنە
با لەباخچەکانى دڵما بیچێنم و
وەک دوو مناڵى لادێ نشین
دەسکەنەى گوڵە گەنمەکان کۆ بکەینەوە

5
ئەى باڵندە دەنووک مەگرە
لەپەڕەى گوڵەکان
تۆ فێر نەبووى خوێنى پەڕەى گوڵ بڕێژى
بۆن بە جەنگەوە مەکە
کە تۆ کوڕیژگەى ژێر دەوارى هەوارێکى
سازگارى کوێستانى

6
پێم بڵێ
لەنێوان مەستى چاوەکانء
مەستى پێکى شەرابەکەتدا
کامیان هەڵدەبژێرى
لەنێوان خەونەکانى ئێستاو مناڵیما
کامیان فەرامۆش دەکەى
لەنێوان پەنجە ناسکەکانى کچەکانى نێو قەڵاو
پەنجە قڵیشاوەکانى کچە قەرەجەکان و
پەنجە بەشیر تەڕبووەکانى بییەکدا
کامیان هەڵدەبژێرى

7
کە مردم
رەنگى کفنەکەم بگۆرە
بە رەنگى روخسارى خۆت
چۆن ڕازى دەبى
ڕەنگى کفنەکەم و جلى بوکێنیەکەم
سپى رەنگ بێ

8
تۆ نابێ هاوڕێی مردوو شۆرەکان بى
ئەوان هەمیشە لەچاوەرێى مەرگدان و
نانیان لەمەرگى تۆو
تیرۆرى مندایە

9
هەور لەمن ئاسودەتر ،کە گریا
زەوى فرمێسکەکانى دەخواتەوە
من چوار وەرزە بۆت دەگریم و
دەمێ نییە فرمێسکێکم بخواتەوە

10
بەرلەوەى تۆ بێى من هاتم
بەرلەوەى من بێم تۆ هاتى
نەبڵێ زۆرت خۆش دەوێم
نە دەڵێم زۆرم خۆشدەوێى.

Kazhal_3@hotmail.conm