|
نزمبوونەوەى پلەى
گەرما،یەکسانە بە بەرزبوونەوەى توڕەییەکان!
بەشدار
عه‌لی
ئەم هەفتانە پلەى گەرماى کوردستان لە خوار هێڵى سفرەوە تۆمار دەکرێت و
شەپۆڵێکى ووشکى و ساردى شارەکانى کوردستانى گرتۆتەوە،ئەو وەزعیەتە گەر
زەڕەیەک بەها ئینسانیەکان و خزمەتگوزارییە سەرەتاییەکان لاى
دەسەڵاتدارانەوە گرینگیەگى هەبێت و دەسەڵاتێک هەبێت بۆ کەمکردنەوەى
کێشە و گرفتەکان و چارەسەرکردنیان ،رەنگە زۆر زۆر ئاسایى بێت و
بەکەمترین باج و کێشە تێپەربێت،بەڵام لە مەملەکەتێکى وەکو کوردستاندا
کە بەرپرسان و دەسەڵاتداران خۆیان لە فرسەتدان بۆ هاتنەپێشەوەى رووداوى
ترسناک و کێشە و گرفتى جۆراو جۆردا بەسەرسەرى خەڵکەوە بۆ زیاتر قازانج
کردن(چونکە هەر یەکێکیان بگریت لە دوو سێ لاوە بازرگانیشن!)لەگەڵ
ئەوەشدا بۆ زیاتر شپرزەکردن و تێک چوونى شیرازەى ژیان کردنیان و خەریک
بوونیان بە پێداویستیەکانیان و و لێڵ کردنى کەمێک لەو سات و سەودا و
تاڵانیەى کە رۆژانە ئەنجامى دەدەن، بەڵام ئەو فیلمەش لەلایەن خەڵکى
کوردستانەوە باش هەستى پێکراوە باش دەزانن لە هاتنە پێشەوەى کێشەکان
بەرپرسان بەرپرسى یەکەمن و هەر ئەوانیش سوود وەردەگرن،بۆیە هەرگیز
ئاسایى نیە و لەگەڵ دەرکەوتن و هاتنە پێشەوەى هەر کێشە و گرفتێک هەتا
سروشتیش بێت لەگەڵ توندترین توڕەى و نارەزایەتى خەڵکەوە رووبەروو
بۆتەوە و ئەوا بە ئاسانى بەسەریاندا تێپەر نابێت،هیچ مناڵ و پیرو
پەکەوتەیەک بەسەرماى ئەو مانگەى کوردستان نەمرد ،بەڵکو ئەوە نەبوونى و
گرانى سوتەمەنى و خانووى بێدەرگاو پەنجەرەو و کەلاوەکان و نەبوونى
دەرمان و پێداویستیەکانى تەندورست و بێ دەربەستى دەسەڵاتداران پەکى
خستن و ژیانى لێسەندنەوە و دووچارى بەڵاى گەورەى کردن،ئەگەر ساکارترین
پێداویستیەکانى ژیانکردن و کەمترین بڕىسوتەمەنى کارەبا و ئاو بۆ
قوتابیانى بەشە ناوەخۆییەکان دابین بکرایە ئەوا شپرزە و سەرگەردانى
نەدەکردن و لە نێو پێخەفى خزم و ناسیاوانیان نەدەکەوتن،بۆ چەندین جارى
تریش سەرماى زستان و نزمبوونەوەى پلەى گەرما و نەبوونى سوتەمەنى و
پێداویستیەکان قوتابیانى بەشە ناوەخۆییەکانى لە هەولێر و سلێمانى بە
بەتانیەوە هێنایە سەر شەقام و و توڕەى و نارەزایەتیەکانى خەڵکیشى چەند
کێرڤێکى تر بردە سەرەوە و یەک بە گەروویان هاوار دەکەن ،سامان و
سەروەتى ئەو وڵاتە هێندەزۆرە ئەگەر لەدەست و ئەو دز و گەندەڵانە
دەربهێندرێت دەتوانێت ژیانێکى شایستەى ئینسان بۆ هەموو کەسێک لە
کوردستان دابین بکرێتِ،هەر بە پارەى میهرەجان و ڤیستیڤاڵ و کۆر و
کۆبوونەوە و شەکراو خواردنەوەکان و دەعوەت و دیارییەکان و بەسەربردنى
شەوە سوورەکانى ئەم مانگەى بەرپرسان لە هەولێر و سلێمانى دەتواندرا بە
زیادەوە هەموو پێداویستیەکانى بەشە ناوەخۆییەکانى خوێندکاران دابین
بکرێت، کە جگە لەبەسەر بردنى چەند کاتێکى (ئاسوودەى)بۆ خۆیان کەسێکى تر
سوودى لێوەرنەگرتووە و لێوەرناگرێت،ئەگەر هەر ئەو مانگە ئەگەر بەرپرسان
لە بەرەوپێش بردن و زیادکردنى سەروەت و سامان و کڕینى هەمەر و
مۆنیکاکانیان و دورستکردنى کۆشک و کۆمپانیا و ڤێلاکانیان دەستیان
هەڵگرتایە،دەتواندرا لە بازارى رەشیش( کە هەر خۆیان کۆنترۆڵیان کردووە)
بە زیادەوە پێداویستى سووتەمەنى و دەرمانى ئەو سەرماى زستانەى
.خەڵک دابین بکرێت و ئەو وەزعیەتە بێٍ
مەترسى تێپەرێت
ئاخر بێ هۆ نییە
گەنجان و لاوانى کوردستان بێ ئومێد و بێ هیوان و هیچ شتێک بەم وڵاتەیان
نابەستێتەوە و دەزانن خوێندن و زانکۆ و دیراسات و ماندووبوون و کارکردن
نایانگەیەنێتە ئەنجام،بۆیە دووچارى دەیان نەخۆشى دەروونى و جەستەى و
فیسیۆلۆجى هاتوون و لەنێو توڕەى و دڵەراوکێ و بێ .ئۆقرەى و لادان و
ئاڵودەبوون بە مادەى بێ هۆشکەر و رێگاى هات و نەهاتى کۆچ و سەفەرا،
دەخولێنەوە
هەر لێرەشدا پێویستە ئاماژە بەوە بکرێت لە
چەند ساڵى رابردووەوە بەهۆى خراپى و ژیان و گوزەرانى خەڵک و نایەکسانى
و سەرکوت و ئیستبداد و کار و کردەوەى دەسەڵاتداران و وەڵام نەدانەوە بە
پێویستى و کێشەکانى خەڵک،خۆپیشاندان و مانگرتن و نارەزایەتى بە شێوازى
جیاواز لە شەقام و زانکۆ و قوتابخانەکان و بازارەکان بەدیدکراوە
سەربارى دورستکردنى جەوێکى تۆقێنەر،بەڵام ئەمانە نەگەیشتنە ئاستى
چاوەروانکراوى خەڵک بەهۆى نا یەکگرتووە و رێکخراو نەبوون و کۆبوونەوە
لە دەورى یەکدا،بۆیە پێویستە هەرچى زووتر پەلە بکەین لە دورست کردنى
رێکخراوێکى سەراسەرى .سەربەخۆى یەکگرتوو کە داوا و خواستەکان وەکو خۆى
ریز بکات،هەر ئەمەش زامنى سەرکەوتنمانە بۆ بەهرەمەند بوون لە ژیانێکى
شایستەى بەشەر
Bashdar_net@yahoo.com
|
