|
٣١\١٢\٢٠١٥
نمایشکردنی سێ
فیلمی کوردی لە پارێزگەی هەڵەبجە کۆتایی هات.
ئازاد سەوزە
 ئەگەر
چی قەیرانەکان بەرۆکیان بەرنەداوین، بەڵام لەسایەی خوێنی شەهیدانی
کوردستان و نەبەردییەکانی هێزی پێشمەرگەی کوردستان و شەڕڤانان ، ئارامی
و ئاسوودەیی بۆ هاونیشتیمانیان فەراهەم بووە ، لەنێو ئەو کەش و
بارودۆخەداو بۆ تێکشاکاندنی قەیرانەکان بەهەوڵی دڵسۆزان و بەگیانی
خۆبەخشی فەرمانبەران و هونەرمەندانی بەڕێوەبەرایەتی هونەری سینەمای
سلێمانی و دوور لەخۆ بەماندووزانین ، لەچوارچێوەی چالاکییەکانی یادی
سلێمانیدا (سینەمای گەڕۆک) بۆ ماوەی ٤چوار رۆژ ، گەیەندرایە
بەڕێوەبەرایەتی چاکسازی گەوران و هەر رۆژێک چوار جار فیلمەکانی (١٠ دە
چـرکە - دەرهێنانی ئاکۆ عەزیز)و (سەمای ئەسپەکان .. هیوا ـ - دەرهێنانی
سەردار خەلیل)نمایشکران ، فیلمەکان لەنێو چاکسازی گەوران هەنسکی قوڵیان
دروست کرد و زۆر کەسیان گریان و زۆرکەسیشیان کردە هاوسەفەری رۆچوونەوە
بەڕەوگەی رابردووی خۆیاندا، هەربۆیە دوای تەواوبوونی نمایشەکان هەر
فیلمە و بەجیا بیروبۆچوونی جیاوازی ئامادەبووان و کەسانی نێو چاکسازی
گەورانی بەدوای خۆیدا هێنا ، ئەم دیمەنانەش مایەی تێڕامان و هەڵوێستە
کردنبوو لای لیژنەی سەرپەرشتی سینەمای گەڕۆک.
لەدرێژە ئەو چالاکییە سینەماییەدا و لەهەوڵی بەخشینەوەی جوانییەکانی
وێنە وبەتایبەت وێنە سینەماییەکان و بەڕێنمایی و جەختکردنەوەی
بەڕێوەبەرایەتی هونەری سینەمای سلێمانی بڕیاردرا:
بەچاودێری پارێزگاری سلێمانی ... بە سپۆنسەری یەکێتی هاوردەو
ناردنکارانی هەرێمی کوردستان ـــ سلێمانی
وەزارەتی رۆشنبیری و لاوان ... بەڕێوەبەرایەتی گشتی رۆشنبیری و هونەری
پارێزگەی سلێمانی
بەهاوکاری بەڕێوەبەرایەتی گشتی رۆشنبیری و هونەری پارێزگەی هەڵەبجە
بەڕێوەبەرایەتی هونەری سینەمای سلێمانی
فیلمە سینەماییەکانی (١٠ دە چـــرکە ـــ دەرهێنانی ئاکۆ عەزیز) و
(تارمایی جەنگی پێشوو ــ دەرهێنانی هاوڕێ مستەفا)و (فرمێسکی پەیکەرەکان
ــ دەرهێنانی ئازاد ناسح کەرکوکی) لەچوار چێوەی سینەمای گەڕۆک لەشاری
ئاشتی لە پارێزگەی هەڵەبجە نمایش بکات ، رۆژانی ٦ و ٧ و ٨/١٢/٢٠١٥
لەهۆڵی بۆنەکان پشت مۆنۆمێنتی شەهیدانی هەڵەبجە ، رۆژانە کاتژمێر ٣ ی
پاشنیوەڕۆ. فیلمەکان نمایشکران.
●
رۆژی ٦/١٢/٢٠١٥ فیلمی (١٠ دە چـــرکە
- دەرهێنانی ئاکۆ عەزیز) نمایشکراو سەرەڕای سەرماو سٶڵەو بەفربارین
جەماوەرێکی دڵگەرم و بەرچاوی هەڵەبجە ئامادەی نمایشەکە بوون و دوای
تەواو بوونی نمایشی فیلمەکە هەندێ بیرو ڕای جیاواز و تێبینی و سەرنج
لەلایەن ئامادەبوانەوە خرانە روو.
●
رۆژی ٧/١٢/٢٠١٥ فیلمی (تارمایی جەنگی
پێشوو ــ دەرهێنانی هاوڕێ مستەفا) نمایشکراو جەماوەرێکی باش و زۆری
هەڵەبجە ئامادەی نمایشەکە بوون و دوای تەواو بوونی نمایشی فیلمەکە
هەندێک تێبینی و سەرنج لەلایەن مامۆستا و خوێندکارانی پەیمانگەی
هونەرەجوانەکانی هەڵەبجە خرانە روو گفتوگۆ لەبارەی تێبینییەکانەوە
ئەنجام درا.
●
رۆژی ٨/١٢/٢٠١٥ فیلمی (فرمێسکی
پەیکەرەکان - دەرهێنانی ئازاد ناسح کەرکوکی)
نمایشکراو بینەرێکی زۆر ئامادەی نمایشی فیلمەکە بوون و دوای تەواو
بوونی نمایشی فیلمەکە هەندێک تێبینی و رەخنە لەلایەن بینەران و
ئامادەبووانەوە باسیان لێوە کرا و لەلایەن هونەرمەندانی لیژنەی
سەرپەرشتی وەرزی (سینەمای گەڕٶک) بە پێی پێویست وەڵامیان درایەوە .
بەشێکی زۆری بینەران و ئامادەبووان خوازیاری ئەوە بوون ئەو جۆرە
چالاکییە سینەماییانە درێژەیان هەبێت و فیلمە کوردییەکان هەلومەرجی
نمایشکردنیان بۆ بڕەخسێنرێت.
لیژنەی سەرپەرشتی سینەمای گەڕٶک لە بەڕێوەبەرایەتی هونەری سینەمای
سلێمانی بەباشی زانی و بڕیاریدا دوای تەواو بوونی کارەکانی یادی رۆژی
سینەمای جیهانی و لەسەرەتای ساڵی نوێی ٢٠١٦ درێژە بەم چالاکییە بدات و
نمایشی ئەم فیلمانە بباتە شارو شارۆچکەکانی سنووری پارێزگەی سلێمانی و
ئیدارەی گەرمیان و ئیدارەی راپەڕین (کەلار ، رانیە ، قەڵادزێ ،
چەمچەماڵ ، سەیسایەق ، دەربەندیخان ، کفری ، خورماڵ ، قەزای شارەزوور ،
چوارتا) بۆ ئەوەی هونەری سینەما لەچاوی بینەران زیاتر نزیک بکرێتەوەو
ئەو ناوچانەش بەهرەمەندببن لەبینینی توانا فیلمسازییەکانی فیلمکارانی
کورد.
azadsawza@yahoo.com
|
