|
١٦\٤\٢٠١١
ئۆپۆزسیۆنەکەمان و
منداڵەکەی (نەدی و بدی)!
فریاد حه‌سه‌ن
لە هەموو قۆناغەکانی سەردەمی شاخ یا با بڵێین سەردەمەکانی خەباتی
چەکداریی هەموو ململانێکان لە نێوان لایەنە سیاسیەکان لە رێگەی چەک و
توندوتیژییەوە کراوە، کامە حیزب خۆی زۆر پێ پێشکەوتوخواز و
دیموکراتخواز بووە، کە گروپێک یان جەماعەتێک لە ناویدا بیر و ڕای
جیاوازیی هەبووە، ئەم جیاوازییە بۆتە مایەی خوێنڕشتن و ماڵوێرانیی،
مێژووی بزاڤی رزگاریخوازی کوردستان چەندە ناز و شانازیی بە سەرکەوتن و
سەروەریەکانی دەکا، بە قەد ئەوەش پڕیەتی لە یەکترکوشتن و
یەکترقەبوڵنەکردن.
لە دوای راپەڕینیشەوە ماوەیەکی زۆر و بەشێکی زۆری ئەم قۆناغە هەر بە
شەڕی براکوژیی کاتەکە بە فیڕۆ چوو، کە دەکرا
لەم بیست ساڵەدا بە پێچەوانەوە بێ، بەڵام لەبەر ئەوەی تا ئەم
چرکه‌یه‌ش کەلتوور
و عەقلیەتی شاخ و یەکترقەبوڵنەکردن زاڵ بووە، دەبوو ئەو رووداوانە
رووبدەن و باجەکەشی بدرێ، لەم چەند ساڵەی دواییدا وردە وردە هەست دەکرا
وا خەریکە ئۆپۆزسیۆنێک پەیدا ده‌بێ رۆڵی
ئۆپۆزسیۆنێکی کارا لە مەیدانی سیاسیدا بگێڕێ، سەرەتا لە راگەیاندن و
میدیای ئەهلی و ئازادەوە دەستیپێکرد، پاشان
وای لێهات قەوارەی سیاسیش دروستبوو و بەشداریی
هەڵبژاردنەکانیشی کرد. پێش خۆپیشاندانەکانی ئێستا وای لێ هاتبوو لە
هەموو شوێنەکانی کوردستان ناڕەزایی و خۆپیشاندان
ده‌بوو بە نه‌ریت و کەلتوور، بەڵام
ئێستا بۆ خەریکە بە ئاقارێکی تردا ده‌ڕوا؟
ئەمە پرسیارێکە پێویستی بە هەڵوەستەکردنە و لێرەدا
ده‌کرێ بە دوو خاڵ وەڵام بدرێتەوە:
یەکەم: هەندێک لە سەرکردە کۆنەکانی
ئۆپۆزسیۆن ئێستاش بە عەقڵی شاخ و سڕینەوەی بەرامبەر بیرده‌کەنەوە
بیرکردنەوەیەک کە ده‌ڵێ:
(ئەگەر بەرامبەرەکەم بە جارێک تێکنەشکێنم ئەوا من دۆڕاوم)،
لە دونیای سیاسەتکردن و ئۆپۆزسیۆنی مەدەنی ئێستاش ئەم بیرکردنەوەیە نەک
ناچێتەسەر بەڵکو سیما و ناوەڕۆکی ئۆپۆزسیۆنیش ده‌شێوێنێ،
بۆ سەلماندنی ئەو قسەیەشمان رۆژانە داواکاری زیاتر و زمانی (بێ
به‌ند و مه‌رج) و
پێداگرتن لەسەر هەندێک خاڵ کە بە
راستی ئەگەر داواکارییە هەنووکەییەکانی خەڵک جێبەجێ بکرێ ئەوا
ئەو خاڵەی ئۆپۆزسیۆن پێداگریی له‌سه‌ر ده‌کا
لە پێناوی خەڵک نییه، بۆ نموونەش
پێداگرتن لەسەر لادانی سەرۆکی ئێستای حکومەت و هەڵوەشاندنەوەی ئەو
حکومەتە، جا کە داواکارییەکانی خەڵک جێبەجێ کرا (ئازاد
یان نه‌وزاد) سەرۆکی حکومەت بێ، بۆ خەڵک هیچ جیاوازییەکی
نییه، بەڵام بۆ بیرکردنەوەی کلاسیکی و کۆنی
هەندێ سەرکردەی ئۆپۆزسیۆن وەک ئەوە وایە هیچی نەکردبێ مادام تەخت و
تاراجی تێک نەشکاندووە! ئەمەش بە داخەوە ده‌بێتە
مایەی شێواندنی داواکارییەکانی شەقام و شێواندنی ئەو ئۆپۆزسیۆنە هێمنەی
کە ده‌مانەوێ بەردەوام چاودێرێکی چالاک بێ
بەسەر دەسەڵاتەوە.
دووەم: ئۆپۆزسیۆن و داواکاریی خەڵک و
داواکاریی ئایدیۆلۆژیای توندڕەو، سێ شتی لە
یەکتر جیاوازن، ئۆپۆزسیۆن داواکاری سیاسی هەیە،
مافێکی ره‌وای خۆیەتی بۆ ئەوەی هەوڵ بدا بگاتە دەسەڵات و
بەرنامەی خۆی جێبه‌جێ بکا و
مافی خۆشیەتی سواری شەپۆڵی ناڕەزایەتییه‌کان
بێ، چونکە ئەوە دەسەڵاتە وای کردووە ناڕەزایی خەڵک هەبێ، جیاوازییەکەی
داواکاریی خەڵک داواکاریی
خزمەتگوزاریی و
یه‌کسانیی کۆمه‌ڵایه‌تی و نەمانی (مەحسوبیەت)
و... هتد ئەمانە
هەمووی ده‌چێتە خانەی خزمەتگوزاریی،
هەرچی داواکاریی ئایدیۆلۆژیای توندڕەوە (کە
من نایخەمە ناو خانەی ئۆپۆزسیۆن، چونکە هەر ئەوەندە ئۆپۆزسیۆنە تا
دەگاتە دەسەڵات پاشان ئایدیۆلۆژیایەکەی وایە هەموو بیروبۆچوون و لایەن
و کەسانی جیاوازی خۆی سەرببڕێ!) مه‌ترسییه‌که
لێرەدایە ناڕەزایی خەڵک و ئۆپۆزسیۆن خۆنیشاندان ده‌کەن،
ئەوان دێن سواری شەپۆڵه‌کە دەبن نەک بۆ
بەرژەوەندیی خەڵک و جێبەجێکردنی
داواکارییەکان بەڵکو بۆ ئەوە دێن هەموومان بسڕنەوە! کار وا بڕوا و
ئۆپۆزسیۆن بەرنامە و ستراتیژێکی هێمن و مەدەنیانەی هەنووکەیی و
درێژخایەنی خۆی دیار نەکا، ئۆپۆزسیۆنیش وەک مەسەلە کوردیەکەی لێدێ کە
ده‌ڵێ (نەدی و بدی
کوڕێکیان بوو کیر و گونیان بڕی!) با رەفتار
و گوفتار و کرداری ئۆپۆزسیۆنی کوردیش وەک هه‌ر
وڵاتێکی پێشکەوتووبێ، زۆر پێشکەوتووش نا بەس
لانی کەم ئەو وڵاتانەی سیستەمی دیموکراتی و
ئه‌زموونی بوونی ئۆپۆزسیۆن و رۆڵی ئۆپۆزسیۆنی تازە
تێدا جێگیربووە.
ماڵپه‌ڕی فریاد
حه‌سه‌ن
|
