١٢\١٠\٢٠١٣

پارە، رەوشت دەفرۆشێ.. ناتوانێ بیکڕێ.

تاریق یوسیف    

زۆرن ئەوانەی بۆ بەدەستهێنانی چەند قڕۆشێک شکۆمەندیی و ئابڕووی مرۆیی و نەتەوەیی و ئاینیی و کلتووریی خۆیان هەرزانفرۆش کردوە و سەرگەردان و گومڕا دەبن و لە بازنەی مادەپەرەستییدا نوقم بوون.

کەم نین ئەوانەی زۆربەی تەمەنیان فرۆشتوە بۆ بەدەستهێنانی مادە و پارە کەچی بێجگە لە خۆماندووکردن پتر هیچ سوودێکیشی لێناکەن و هیچ ئامانجێکیشیان بۆی نییە.

ئایا بە راستیی پارە بۆ خزمەتکردن و دابینکردنی ژیان دروست بووە یان ئەوەی ژیان و مرۆڤایەتی بکرێتە خزمەتکاری؟ بە جێگای ئەوەی مادە یان پارە بخرێتە خزمەت مرۆڤەکان بۆ ئەوەی ئەو تەمەنە کەم یان زۆرەی مرۆڤ تێپەڕی دەکا بتوانێ بەڕێوەبچێ و توانای چێژوەرگرتنیشی لە جیهانی سروشتیی هەبێ کەچی بە داخەوە هزری پارەپەرەستیی و خوگرتن و ویست و ئارەزووی لەڕادەبەدەر و باوەڕنەهاتن وای لە مرۆڤەکان کردوە کە بە درێژایی تەمەنیان خۆیان ماندوو بکەن و گومڕا بن و تاڵیی و سوێریی زۆر بکێشن بۆ بە دەستهێنانی ئەو پارچە کاغەزە کە نێوی دینار و دۆلار و شتی لەو بابەتانەیە.

مەزنترین دەوڵەمەند ئەو کەسانەن کە باوەڕیان بە ژیانێکی سادە هەیە و پێی رازیین. دەوڵەمەندیی واتە پێکەنین، دەوڵەمەندیی واتە هەستکردن بە ئازاری مرۆڤ، دەوڵەمەندیی راستگۆیی و رێزە.. زانابوون و خۆنەدانەدەستە، دەوڵەمەندیی هەستی بەرپرسیارییە.. خۆشویستن و ئاسوودەیی بەخشینە، دەوڵەمەندیی باوەڕە.. کۆڵنەدان و خۆڕاگرییە، دەوڵەمەندیی رەنجە ئەویش رەنجێکی رەوا نەک خۆکوشتن و خۆنابووتکردن، دەوڵەمەندیی نیشتیمانپەروەریی و هەڵوێستە، دەوڵەمەندیی میللییبوون و خاکییبوونە.

سەرگەردانترین و ئاڵۆزترین ژیان ئەو کەسانە دەیگوزەرێنن کە لە گێژاوی پارەپەرەستییدا دەخولێنەوە و شەو و رۆژ هەڵپەهەڵپیانە بۆ پترکردنی چەند قڕۆشێک، مرۆڤ چەندە لە پارە نزیک ببێتە ئەوەندەش لە درۆ و فێڵ و ناڕاستییەکان نزیک دەبێتەوە و بە هەمان ئەندازەش لە راستیی و راستگۆیی دوور دەکەوێتەوە.

بە داخەوە مرۆڤەکان لە بەر تووشبونیان بە نەخۆشیی مادەپەرستیی وایان لێهاتوە خۆیان بکوژن و خۆیان تووشی دەیان نەخۆشیی جەرگبڕ و ئازاربەخش بکەن ئەویش تەنیا لەبەر زیانی مادە کە هەندێک جار لێیان روودەدا، زۆرن ئەوانەی لە خەفەتی پارە یان لەدەستدانی پارە خۆیان کوشتوە و زۆرتریشن ئەوانەی لە بەر هەمان هۆ تووشی نەخۆشیی خەمۆکیی بوونە و هەندێکیشیان گیان و جەستەیان پێیەوە تێکشکاوە.

راستە هێنانەکایەی ئەو جۆرە بیرە و ئاخنینی لە مێشکی مرۆڤەکان لە رێگەی سیستەمی سەرمایەداریی و کلتووری دەوڵەتەوەیە و دوورە لە رەوشتی سروشتییانەی جڤاکیی بەڵام مرۆڤەکانیش دەبێ بە سادەیی خۆیان گیرۆدەی ئەو نەخۆشیە نەکەن و هەندێک بیرکردنەوە و شیکردنەوەی بۆ بکەن و بە سووک و سانایی خۆیان رادەست نەکەن.

ژیان خۆی بە واتای رەنج و تێکۆشانە و چێژی ژیانیش کاتێک دەردەکەوێ کە کۆششی بۆ بکەی و بە ماندووبوون و هێزی خۆت ژیانی خۆبەڕێوەبردن واتە خۆبژێویی دەست بخەی و بۆ تێربوونی زگێک یان ئەوەی ماڵ و پارەیەک خۆی نەداتە دەست هیچ لایەن و کەسێک کە لە بتوانن کەسایەتیت کۆیلە بکەن و ئیدی بڕیاردەری ژیانت دەرەوەی خۆت بن.. یان ئەوەی لە نەزانییدا خۆت ببیتە داگیرکەری خۆت و خۆت کەسایەتی خۆت کۆیلە بکەی و لە خزمەتی پارەپەیداکردندا هەموو ژیانت لە دەست بدەی.

دەبێ ئەوە بزانین کە هۆش خاوەنی پارەیە نەک ئەوەی پارە خاوەنی هۆش بێ، زۆربەی ئەو فەیلەسووفانەی کە ژیانناس و ژیان ئافرێنەر بوون زۆربەی کاتەکان برسییان بووە و لە هەرکەسیش سادەپۆشتر بوونە، بەڵام زۆربەی کاتەکانیان لەوە خەرج کردووە کە رێگا لەو مرۆڤانە بگرن کە دەیانوێ رەوتی مرۆییان لار بکەن و بکەونە نێو کلتووری دەرەوەی خۆیانەوە کە چاوچنۆکیی و تێرنەخواردن و پیسکەییە.

دەوڵەمەندیی کاتیک واتای هەیە کە لە مرۆڤایەتی خەرج بکرێ، پارەیەک بە فریای منداڵانی برسی و بێ جلوبەرگ نەکەوێ دەبێ چ سوودێکی هەبێ و واتاکەی لە کوێ دایە؟؟

خۆ لە جیهاندا دۆلار دەبارێ و سەرمایەدارییش کارگ ئاسا سەرهەڵدەدا ئەدی بۆچی لە ئەفەریقا لە هەر کاتژمێرێکدا منداڵێک لە برسان دەمرێ؟؟؟ ئەمەیە رەوشتی سەرمایە.

ئەو نەخۆشییە گڵاوە کوردستانیشی گرتۆتەوە و مرۆڤەکانی ئەوێش کە سەردەمانێک ناوەندی سەرهەڵدانی ژیان و رەوشت بوونە وا بەرەو مادەپەرستیی و چاوچنۆکی هەنگاو دەنێن. لە رۆژئاوای کوردستان رۆژانە شەهید دەدرێ.. کاتژمێر نییە گەلی کورد و شەڕڤانانی یەپەگە لە بەرخۆداندا نەبن، لە کاتێکدا گەلەکەمان لەو پارچەیەدا لە لایەن دیندارە رووکەشەکان کە بە نێوی دینەوە شمشێریان هەڵگرتوە و فتوای کوشتنی ژن و منداڵانی کوردیان داوەو ئابڕوو و شکۆمەندیی ئەو گەلەیان بۆ خۆیان حەلاڵ کردوە، دەرگای سنوورییەکان بە رووی هاونیشتیمانیانمان داخراوە و بە هۆی نەگەیشتنی کەلوپەل و کەمبوونەوەی خواردن دەیان منداڵی کوردمان بێ هۆش و بوراونەتەوە لە برسان، کەچی سەرمایەدارە چاوچنۆکەکانی کورد کە خاوەنی دەیان ئاپارتمان و ملیۆنان دۆلارن خۆیان کەڕ کردوە و لە خەوی بێ ئابڕوویی و بێویژدانییدا وەئاگا نایەن. دەک نەفرەت لە پارە و سەرمایەیەک کە نەبێتە فیشەک و تفەنگ بۆ پاراستنی خاک و وڵات، ئەوەی ئابڕوو و ویژدانی نەبێ دەرۆزەکەرترین مرۆڤی جیهانە و هیجی نییە. وەک مرۆڤێکی ژیر دەڵێ: ''مرۆڤی سەرمایەدار و پارەکۆکەر وەک کەرە کە بارەکەی زێڕ و زیوە کەچی خۆی گەنم و جۆ دەخوا''.
 

ماڵپەڕی تاریق یوسف