|
٢٥\٤\٢٠١٤
پارتی بەرپرسە لە
پاراستنی سەلامەتی رۆژنامەوان کامەران محەمەد.
 بە
پێی هەواڵێکی ئەمرۆی میدیاکانی کوردستان و لێدوانی ڕۆژنامەنووس کامەران
محەمەد لەکەناڵەکانی ڕاگەیاندن، دوێنێ نیوەڕۆ ٢٠١٤-٤-٢١ موختاری گەڕەکی
نیشتیمان لە هەولێر لە ڕێگای پەیوەندی تەلەفۆنی، هەڕەشە و سوکایەتی بە
کامەاران محەمەد دەکات.
ئەم هەڕەشەیەی موختار و کارمەندی ئاسایش لە کاتێکدایە ئەمرۆ ١١٦یەمین
سالیادی رۆژنامەگەری کوردیە، بەرپرسان لە لێدوانەکانیاندا دروشمی
ئازادی دەڵینەوە و سنگ دەردەپەڕێنن و بوونی میدیای ئازاد بە دەستکەوتی
ژێر سێبەری دەسەڵاتی خۆیانی دەزانن. لە کاتێکدایە دۆسیەی کاوە گەرمیانی
لە دادگاکاندا کایەی پێ دەکرێ ئازاری ویژدانی و ڕوحی خانەوانەدە و
ڕۆژنامەوان و خەڵکی پێ دەدەن. لە کاتێکدایە چوار ساڵ بەسەر تیرۆری
رۆژنامەوان سەردەشت عوسمان تیدەپەڕێت و تاوانباران بە ئازادی
دەسورێنەوە. ئەم هەڕەشەیە لەکاتێکدایە لەنێو گەرمەی هەڵبژاردنەکان بە
دروشمی ئازادی و عەدالەت و مافی مرۆڤ خەڵک کاس و گێژ دەکەن.
مێژووی هێرشەکان بۆ سەر ئازادی و رۆژنامەوانان لە کوردستان، سەرەتا و
هەنگاوی یەکەمی هێرش و تیرۆری رۆژنامەوانان، هەڕەشە بووە. هەڕەشەکانی
پێشووتر بۆ سەر سۆرانی مامەحەمە و سەردەشت عوسمان و کاوە گەرمیانی
هەنگاوی دواتری کوشتن و تیرۆری ئەوان بوو. بۆیە دەبێ ئەوە بەجدی
وەربگرین، ئەوەی هەڕەشە لە کامەران دەکات تەنیا کەسێک نییە. ئەو
هەڕەشەیە بەشێکە لە کارنامەی دەسەڵاتێک دەستی سورە بە خوێنی
رۆژنامەوانان و گەنجانی کوردستان.
پشتیوانی لە کامەران محەمەد ئەرکی هەموو مرۆڤێکی ئازادیخواز و
ڕاگەیاندکارانی کوردستان و ڕێکخراوە مەدەنیەکانی کوردستانە. هەر هێرش و
هەڕەشەیەک بۆسەر هەر کەس و رۆژنامەوانێک، هەڕەشەیە بۆسەر هەموومان و
کۆمەڵگە.
ئێمە لە "ڕێکخراوی سەردەشت عوسمان بۆ داکۆکی لە ئازادی" وێرای پشتیوانی
جدی خۆمان لەئازادی و ئازادی ڕۆژنامەگەری و کامەران محەمەد. بەتوندی
ئیدانەی ئەو هەڕەشانە دەکەین. لەئێستاکەش پارتی دیموکراتی کورستان بە
پرس دەزانین لە پاراستنی سەلامەتی ڕۆژنامەوان کامەران محەمەد.
رێکخراوی سەردەشت عوسمان بۆ داکۆکی لە ئازادی
٢٢\٤\٢٠١٤
serdasht.osman@gmail.com
|
