١٥\٨ رۆژی رۆژنامه‌گه‌ریی ئازاد و بێلایه‌نی کوردی.
 

١٥ساڵ له‌مه‌وبه‌رو له ‌١٥ی ئابی ساڵی ١٩٩٤ یه‌که‌م رۆژنامه‌ی کوردی بێلایه‌ن‌و ئازاد به‌ناوی (رۆژنامه‌ی ئه‌مڕۆ)له‌ شاری هه‌ولێر دامه‌زراو سنووری سه‌ختی رۆژنامه‌گه‌ریی حیزبی و حکومیی تیێکوپیک شکاند ‌و یه‌که‌مین به‌ردی ‌بناغه‌ی رۆژنامه‌گه‌ریی بێلایه‌ن‌ و ئازاد و سه‌ربه‌خۆی له‌ کوردستان دانا.

هه‌ڵبه‌ته‌ سه‌رهه‌ڵدانی ئه‌و رۆژنامه‌یه‌ وه‌ک رووداوێکی گرنگ‌و پڕبایه‌خ بۆ ووشه‌ی ئازادو رۆژنامه‌گه‌ریی کوردی‌و به‌رانگژبوونه‌وه‌ی ره‌هه‌نده‌ رامیارییه‌کانی ئه‌وکاتی بارودۆخی ‌کوردستان بێ‌گرفت و هه‌ر وا به‌ئاسانی جێگای خۆی نه‌گرت به‌ڵکه‌ به‌خه‌بات‌ و تێکۆشانێکی پڕ سه‌خت و پێشمه‌رگانه‌ی کۆمه‌ڵێک نووسه‌رو رۆژنامه‌نووسی دوای راپه‌ڕینی ئاداری ١٩٩١ که‌ زۆربه‌یان به‌ پێنووس و به ‌چه‌ک پێشمه‌رگه‌ی پێش ‌راپه‌ڕین بوون سه‌ریگرت ، هه‌رچه‌نده‌ ئه‌و رۆژنامه‌یه‌ له‌نێو گه‌رمه‌ی شه‌ڕی کۆنه‌په‌رستانه‌ی نێوخۆ و دیموکراسییه‌ سه‌یروسه‌مه‌ره‌که‌ی نێوان پارتی و یه‌کێتیی‌و باری بێسه‌روبه‌ریی ‌و نه‌بوونی ‌یاسا و ته‌نانه‌ت یاسایه‌کی دواکه‌وتووانه‌ش سه‌ریهه‌ڵداو نه‌یانهێشت رۆژنامه‌که‌ وه‌کو خۆی درێژه‌ به‌ره‌وتی ئازادانه‌ی خۆی ‌بدا و پێویستیی ‌و بواره‌کانیتری گه‌شه‌کردنی خۆی فه‌راهه‌م و ده‌سته‌به‌ر بکا به‌ڵام وه‌ک گوتمان ئه‌و رۆژنامه‌یه‌ سه‌ربه‌رزانه‌ یه‌که‌م به‌ردی بناغه‌که‌ی دانا و ئیدی له‌پاش ئه‌و زۆر رۆژنامه‌ی تر هاتن و به‌ردی تریان خسته‌سه‌ری تا وه‌ک ئه‌وه‌ی ئه‌مڕۆ ده‌یبینین ته‌لاری رۆژنامه‌گه‌ریی ئازاد و بێلایه‌نی کوردی گه‌یشتۆته‌ ئه‌وه‌ی که‌ ئیتر ترسی رووخانی نه‌مێنێ‌و تا دێ به‌رزو به‌رزتر ده‌بێته‌وه‌ به‌تایبه‌تیش له‌م سه‌رده‌مه‌ی ئێستا که‌ماڵپه‌ڕه‌کان ده‌رفه‌تێکی فراوانتریان له‌لایه‌نی ئازادیی ‌و لایه‌نی‌ مادیی‌ و ته‌کنیکیی‌و ئاسانکارییه‌کانیتر له‌به‌رده‌مه‌ گه‌شه‌سه‌ندن و پێشکه‌وتنێکی به‌رچاویان به‌خۆوه‌ دیتووه‌ .. ئێستا کاتی ئه‌وه‌ هاتووه‌ که‌ دلسۆزانی ووشه‌ی ئازادی کوردی به‌ شێوه‌یه‌کی له‌ خۆبووردووانه‌ له‌نێو گۆڕه‌پانی ئه‌نته‌رنێت رۆلی پێویستی‌ خۆیان بگێڕن‌ و جله‌وی رۆژنامه‌گه‌ریی و ته‌واوی میدیای ‌کوردی له‌ده‌ست حیزب ‌و حکومه‌ت ده‌ربهێنن‌ و ئیدی رووبه‌ری ئازادیی نووسین ‌و راده‌ربڕین‌ له‌نێو رۆژنامه ‌و میدیاکانی تر فراوان و فراوانتر بکه‌نه‌وه‌و کاروانی رۆشنبیریی به‌ره‌و ئاقاری ئاوات و ئامانجه‌کانی مرۆڤ ته‌کان‌پێبده‌ن که‌ سه‌ره‌تا و پێش‌هه‌رشتێک ئازادیی و یه‌کسانییه‌ بۆ ته‌واوی کۆمه‌ڵی مرۆیی.

ئێمه‌ لێره‌دا جگه‌له‌وه‌ی به‌یادی ئه‌و رۆژه‌ مه‌زنه‌ له‌ مێژووی ووشه‌ی ئازادو بێلایه‌نی کوردی به‌ ناوی ستافی ( ماڵپه‌ڕی ئه‌مڕۆ ) که‌ خۆمان به‌ درێژه‌پێده‌ری ره‌وتی رۆژنامه‌گه‌ریی ئه‌و رۆژنامه‌یه‌ ده‌زانین پیرۆزبایی له‌تێکڕای نووسه‌ر و رۆژنامه‌نووسه‌ ئازادیخوازه‌کان‌و تاک‌به‌تاکی خه‌ڵکی‌ کوردستان‌ ده‌که‌ین‌ ئه‌و ده‌ستپێشخه‌ریی ‌و جه‌ربه‌زه‌ییه‌ی ئه‌و پۆڵه‌ نووسه‌ر و رۆژنامه‌نووسه‌ ئازادیخوازه‌ش به‌رز هه‌ڵده‌سه‌نگێنین که‌ له‌ رۆژێکی وا ره‌شدا له‌ژێر مانشێتی یه‌که‌م ژماره‌ی رۆژنامه‌که‌یان: ( ئازادیی رۆژنامه‌گه‌ریی ، هه‌ر ته‌نیا مۆڵه‌ت‌پێدانی ده‌رکردنی رۆژنامه‌ نییه، به‌ڵکو ده‌بێ ئازادی راسته‌قینه‌ی راده‌ربڕینیشی له‌گه‌ڵدابێ .. که‌ رێگاخۆشکه‌ره‌ له‌به‌رده‌م داهێنان و کاروانی رۆشنبیرییدا) یه‌که‌م چرای‌گه‌شی ‌ئازادکردنی ووشه‌ی‌کوردیان له‌نێو زیندانه تاریکه‌کانی رۆژنامه‌گه‌ریی و میدیای حیزبیی و حکومیی داگیرساند.
ئیدی هه‌ر ئازاد و ئازادتر بێ ووشه‌ی کوردی.

ده‌سته‌ی به‌ڕێوه‌به‌ریی ماڵپه‌ڕی ئه‌مڕۆ
١٥\٨\٢٠٠٩
له‌نده‌ن - به‌ریتانیا