٧\٤\٢٠١٤

پەنجەرە.

یوسف خەلیل     

سات لە نێو گەرمەی کردەدا، گەرەکە خەریک کەین ،تا پەی بە نهێنییەکانی نڤار ببەین ، لێیەوە بە وێڵبوون دەستی پێبکەین ، تا ئەو خۆزگانەی لە گەرووماندا خەفە و مەڵاس دراوە ئازاد بکەین ، بەمەش دەکرێت بڵێین خەریکی بەدیهێنانی هیوایەکی مرۆڤانەین.

ئەو کاتەی تەنگ و چەڵەمە و دەردەسەرییەکانی رۆژانە و کار و کردە قێزەونەکان و شکستی هەوڵ و تەقەلا دێتە ئارا ، مرۆ خۆی لە نێو گۆشە گیری و بێ هیوایدا دەبینێتەوە ، زۆرجار ئەم خەمە بۆ مرۆی دەسەپاچە دەبێتە هەمیشەیی و بۆ هەتا هەتایە بەو نەخۆشییە چاوەڕوانکراوانەوە دەتلێتەوە کە لە ئاکامیدا بەرجەستە بووە.

رێڕەوی ژیان بەردەوام بەرەو ژوور پێک نەهاتووە! بەڵًکو دەبێت چاوەڕوانی هەموو ئایندەیەک بکرێت لە کار و کردەوەکانەوە ، کورد واتەنی (چی بچێنیت ئەوە ئەدرویتەوە) مرۆ بە هەوڵ و کۆششی بەردەوام دەگات بە هەندێ‌ شت ،لێیەوە بەرنامەی ئایندەی دادەڕێژێت ، ئاکامیش پەیوەست دەبێت بە سەرەتاکانی دروست بوونەوە ،کە تا چەند چەمکی هزری کامڵ و چڕ کردۆتەوە؟ هەندێ‌ جاریش ئاکام پێچەوانە دەشکێتەوە! ئەمەش چاوەڕوان نەکراوە ،نابێ مرۆ بەم ئاکامە هەرەس بە هەموو شتێک بهێنێت ، بەڵکو دەبێ ئەوە بسەلمێنێ‌ کە لە هەموو تارکییەکەوە گەرەکە لە دووی رووناکی ئاوات وێڵ بێت! ئەو گۆشە نیگایەش دەبێتە پەنجەرە و لێیەوە دەروازەکانی ژییان بۆ جارێکی دیکە رووبەڕووی دەکرێتەوە ، واتە لەگەڵ هەموو شکستێکدا هیوای ئایندە دەبێت بەدی بکرێت ،گەر مرۆ بە چۆکدا نەیەت و نەبەزێت ،چونکە لەگەڵ بەزیین دا مردن دێتە ئارا و لەگەڵ خۆیدا هییواش زیندە بە چاڵ دەکات و ئایندەش بەرەو گۆڕ دەبات!!

گەرەکە و پێویستە هەمیشە بە هیواوە کاروانی ئەرک و ماندووبوونمان بەڕێ بکەین ،بەڵکو بتوانین بەری رەنج بکەینە ئایندەیەکی جوان و پڕ خەندە بۆ خۆمان و دەور و بەرمان دەستەبەر بکەین ، بەمەش دەکرێت ساتێک بڕەخسێنین لە نێو نەغمەی پاساری و ئاوازی کەناری و شنەی کەنار دەریا و ،زەردەپەڕی ئێواران و پێکەنینی بێگەردی مناڵان و چاوبڕکێ‌ و دەست بازی لاوان و پەراوەی خۆشبەختی ژینی ئاسوودە بۆ مرۆڤایەتی و چیتر بە درۆ خۆمان لە خشتە نەبەین چونکە بەر پرسیارین بەرامبەر هەموو ئاکامێکی ئایندە!

ماڵپەڕی یوسف خەلیل