١٥\٤\٢٠١٤

    پێنج شیعر لە ئەریزۆنا.

فەرهاد مازێ

    وجود.
درەخت میهرەبان
گەڵا ماچ
تەفرەدانی رۆژهەڵات
پاچ
ئایەت رەشەبا
ئەنفال دۆڕاندن
ژاڵە دەمرێت
سۆڵین دەبن
وەرز ئازادی
تەفرەدان تیرۆر
قەلاقوچک مرد
ماچێکم بەسە بۆ لەدایکبوون
دەرختێک بەسە بۆ میهرەبانبوون

٢٠٠٤ - ئەریزۆنا

    رەشەبا.
رەشەبا بوو کەزی بردی
لە زەردەخەنەی با
گریان فێربووین
گریان شکستێکی جوانە،
قەڵەم نەگەیشتە ژوان و
لە نیوەی رێ شەیدای نووسین
نووسین شێتییەکی وێرانە،
با ناوەستێ
نیشتمانم با بردی
دەزگیرانم با هەڵیگرت
جەنگە با
ئامێزە با
بۆیە بام خۆشدەوێ و رقم لێیە
سۆزە، حەسرەتە با
ئازادییە و کوشتنە با
هەتا مردن جەنگ دژە با
هەتا مردن باوەش بۆ با.

٢٠٠٤ - ئەریزۆنا

    چاوەڕوانی گۆدۆ.
شەو نیوە مردنە و
بەیانی وزە ماچکردن
نیوەم موڵکی تۆیە و
نیوەم خەونی هەراسان و نووستن،
چ داستانێک تۆمار بکەم
هەناسە ئەفسانەیەکی وردوخاش
بەیانی باش ڕۆتین.
نە کاتژمێریک و
نە دووان و
سەدان
نە رۆژ و
هەفتە،و
مانگ و
ساڵ
... هتد، هتد، هتد...
بوونم گەمەی ئەنفال و،کیمیاباران،
چ قودسیەتێک و جەنگەڵستانێکە دەمژمێر
دوای شکست و،تێکشکان؟
چ قەزمیەتێکە بوون؟
ڕابەر جەڵاد،و کەر
ئێمەش بێ زمان و باڵ،،
شوورەیەکی پۆڵایینە
سیستەم گورکێکی برسی
ئێمەش گاڕان،
لە وڵاتێکی وێران و پڕ لە جەڵاد هاتمە دونیا
وانەی خوێن و نائومێدیی فێربووم،
لە دونیای مۆدێرێنیشا
دەفڕین و
باڵ لە دەست دەدەین،
لە بڕی سۆز و میهر و پێکەوەژیان
یەکتر دەخۆین،
هەرەسمان هێناوە،
دین چوکڵێتە ژەهر
ئازادیش کوشتن،
ئایەتێک بنێرە
بێ ناو و بێ پەڕ و باڵ
چاوەڕێین گۆدۆی میهرەبان.

پایزی ٢٠٠٤ - ئەریزۆنا

    مردنە مەنفا.
خەمێکی نەمر هاوڕێمە و
بەیانیان لوولم دەدا و
شەوانیش ئازار دەنووسێ،
لەو مەراقە دووڕووە و بەدفەررە تێناگەم
بوون، ئەشکەنجەیەکی سەختە و
گومانیش، گەورە بوون.
بەندەیەکی تاریکستانم
بۆیە هەمیشە نەفرەت و رەشم،
لە چاوەڕوانی گۆدۆدا
سیزیفێکم، بە جیهانبوون هەڵدەگەڕێم
خەباتم تێکشکان و شکستە
سەرابیش گەیشتن.
ونبوونێکی سەرسوڕهێنەرە
بێ ناسنامە و بێ ئایندە
مەنفا ئەدرەسی من
هیوایەکی بڵندە
سەراب و مەنفا
رۆتینی گەڵی من
دەژین بۆ تاڕاوگە و
تراویلکەیەکی بریندارتر لە وڵاتی من
دەمرین و لە گۆڕستانێک دەنێژرێین
جیا لە خاک و خۆڵی کوردستانی من.

زستانی ٢٠٠٤ - ئەریزۆنا

    دژە وێنە.
زریان هەڵچوون
سێکس دامرکاندنەوە
گومان گەمەی عەقڵ
تەمەن ئەشکەنجە بوون.
   *   *   *
سەما گەڵای پایزانە
گەڵا مردن
ژانی دارە
ماچ بەهاری بوون.
   *   *   *
نەفرەت زەمەن
گیانێک بوو مرد
شەقی خوایەکی ماندوو بوو
بەهارمان پایز بوون.
   *   *   *
گیانێکی ماندوو زێ دەیبا
هەر ئەستێرە بوو لە پێشوازییدا
تووڕە بوو دەریا
بۆ گیانی ئەو بوو زریانی هێنا.
   *   *   *
ویستی خۆم نەبوو کەوتمە غەریبیی
گیانێکی ماندوو،
لە جەستەیەکی شەکەت و ماندوو
غەریب زەلیلەو
سۆز و ترووسکە لە غەریبیدا ماندووە و نوستوو.
   *   *   *
مەنفا، مەملەکەتی مردووانە
دەمژمێرە، رۆتینە، حەسرەتە
ئاشێکە و هەست و سۆز دەهاڕێ و
ساتەکانی گیان دەژمێرێ
گەیشتنە بە کۆتایی و سەرەتای مەرگە،
مەنفا، ئەشقێکە و بێ دڵدار و ژووان
یاخی بوونە لە ژیان.
   *   *   *
ویستی خۆم نەبوو، سەری خۆم هەڵگرت
یاخی و نامۆ بووم
میوان بووم میوان
لە ماڵەکەی خۆم.
   *   *   *
چاوەڕێم رۆژێ بگەرێمەوە
لە نیشتمانم، هەناسەیەکی ئازاد هەڵمژم
خواحافیز لە مەنفا و
خەونی خۆش ببینم.

٢٠٠٤ - ئەریزۆنا

ماڵپه‌ڕی فه‌‌رهاد مازێ