٣\۴\٢٠١٠

پێنج خەونە چیرۆک.

هیوا ڕەش   

- 1 -

پڵنگێکم دروست کرد ، کەڵبەیم کێشاو چڕنووکیم قرتاند و بەڕەڵام کردە ناو دارستان ، پاشان کە بینیمەوە لەباتى ئەوەى لەپى لە بیناقاقاى گیر بکات، دەستى کردبووە ملى ئاسکێک و لەناو سەوزە گیایەکدا پیاسەیان ئەکرد .

- 2 -

هەموو گیانەوەرەکانم بێ زیان و بێ تاوان و یەکسان دروست کرد ، مەلائیکەتەکانم خانەنشین کرد و بەهەشت و دۆزەخیشم داخست ، خۆم لە سەرئێشەى (یوم الحساب) ڕزگار کرد .

- 3 -

مرۆڤم دەسکارى کرد ، عەقڵیم دەرهێنا ، زمانم لێى ستاندەوە و پشتیشیم چەماندەوە ، کردم بە ڕووەکخۆرێکى کێوى و بەڕەڵاى دەشت و دەرم کرد ، دواى ماوەیەک تەماشام کرد وەکو برا بێ جەنگ و بێ دەنگ و بێ قڕکردنى یەکتر ئەژیان .

- 4 -

خانە شەڕانگێزى و ئاژاوەگێڕییەکانى مێشکى شەیتانم لەکار خست ، هیچ گیانەوەرێک بیرى لەوە نەئەکردەوە پەلامارى ئەوى تر بدات ، کەزانیم شەیتانم بەهەڵە دروست کردووە بەیەکجارى مراندم .

- 5 -

ئیزرائیل هاتە سەرم و ووتى : تۆ خەونى خراپ ئەبینى ! دەستى نایە گەرووم و خنکاندمى ، دوو مەلائیکەت دەستیان نایە ژێر باڵم و بەرەو ئاسمان بردمیان .
خەلقەندەکانم بوون بە پارێزەرى داکۆکیکارم بەڵام سەرۆکى دادگا گوێى لێ نەگرتن و بە تۆمەتى ( کودەتا ) فەرمانى سووتاندنى هەتاهەتایى بۆم دەرکرد .
 

07701309524

Hewarash1@yahoo.com